1918-ci ilin əvvəllərindən başlayaraq S.Şaumyanın tapşırığı ilə Şamaxıda böyük mülk, var-dövlət sahibi olan Stepan Lalayev gizlincə Şamaxı şəhərində, eləcə də Mədrəsə, Kərkənc, Saqiyan, Zarxı, Meysəri kəndlərində yaşayan ermənilərə, həmçinin də malakanlar yaşayan kəndlərə silah, sursat paylatmış, onları başdan-ayağa silahlandıra bilmişdi. S.Şaumyanın məqsədi azərbaycanlılara qarşı soyqırımını bütün ölkə miqyasında həyata keçirmək idi. S.Lalayevin və eləcə də bir çox erməni mülkədarlarının mülkləri şəhərin yuxarı hissəsində yerləşirdi. Cinayətkar dəstənin başçılarından olan S.Lalayevin mülkündənsə şəhərin müsəlman məhəllələri ovuc içi kimi görünürdü. Elə buna görə mülkün zirzəmisi əvvəlcədən silah-sursatla doldurulub. Mülkdən atılan toplarla Cümə məscidinin həyətini vurmaq da çox asan olub. S.Lalayevin əmri ilə erməni əsgərləri şəhərin 12 məhəllə məscidinə, həmçinin VIII əsrə aid  Cümə Məscidinə sığınan şəhər sakinlərini diri-diri yandırıblar. Şamaxı sakinlərinin müqaviməti ilə üzləşən vandallar hiyləyə əl atırlar. Qriqoryan kilsəsinin keşişi Baqrat və rus icmasının din xadimləri yerli müsəlmanlarla görüşüb sülhə and içirlər. Şamaxının ən çox soyqırımına məruz qalan yaşayış məntəqələrindən biri də Əngəxaran kəndi olub. Belə ki, erməni silahlı birləşmələri martın 18-də sübh çağı şəhərlə yanaşı Əngəxarana da qəfil hücum ediblər. Kəndə soxulan erməni və molokanlar kəndi mühasirəyə alaraq oradakı əhalini qırıb, kəndi qarət edib, yandırıb, sağ qalan əhalini isə əsir alıblar. Məlumata görə, Əngəxaranda 510 nəfər qətlə yetirilib, onlardan 74 nəfərinin başı "Qanlı dərə" və ya "Əngəxaran dərəsi" adlanan yerdə  vaxtilə Şamaxıda qəssab işləmiş bir erməni tərəfindən kəsilib. Kənddəki 186 evdən 184-i yandırılıb, 7 aşığın külliyyatı məhv edilib. Şamaxıda iki dəfə törədilmiş azərbaycanlıların soyqırımı zamanı şəhərin 21.127 nəfər müsəlman əhalisindən təqribən 8-10 min nəfəri qətlə yetirilib. Yaşayış məhəllələri və məscidlərlə yanaşı, şəhərdə bütün ictimai binalar, bazarlar, yüzlərlə dükan, anbar, dəyirman və digər mülki obyektlər yandırılaraq tamamilə məhv edilib. Şamaxıda baş verən soyqırımı 1918-ci ilin iyul ayının ortalarında Türk-Azərbaycan qoşunları tərəfindən azad olunana qədər davam edib. Həmin dövr ərzində ümumilikdə Şamaxı qəzasının 106 kəndi yandırılaraq dağıdılıb, ümumilikdə isə 110 kəndin sakinləri erməni quldur dəstələrinin hücumlarından zərər çəkib. 

Salyan rayonunda soyqırımı qurbanlarının xatirəsi hüznlə anılıb.  Tədbir iştirakçıları 31 Mart Soyqırım qurbanlarının xatirəsinə ucaldılmış abidə-kompleksini ziyarət edərək, ermənilərin azərbaycanlılara qarşı törətdiyi qətliamda həlak olan həmvətənlərinin unudulmaz xatirəsi qarşısında öz ehtiramlarını ifadə edib, abidə önünə gül-çiçək dəstələri düzüblər. Sonra həmvətənlərimizin soyqırımının qarşısının alınmasında erməni işğalçıları ilə vuruşaraq qəhrəmancasına həlak olmuş türk əsgər və zabitlərinin şəhər qəbiristanlığındakı məzarları ziyarət edilərək ruhlarına dualar oxunub. Xatırladaq ki, erməni-bolşevik quldur dəstələri indiki Salyan və Neftçala rayonlarının ərazisində 18 kəndi yandırıb, 2000-ə yaxın dinc sakini isə qətlə yetirib.

Azərbaycanlıların Soyqırımı qurbanlarının xatirəsi Lənkəranda da dərin hüznlə anılıb. Minlərlə lənkəranlı soyqırımı qurbanlarına dərin ehtiramlarını bildirib, abidə önünə gül dəstələri düzüblər . Lənkəran 1918-ci ilin mart-aprel hadisələri zamanı erməni daşnaklarının təcavüzünə daha çox məruz qalan bölgələrdəndir. Ümumilikdə Lənkəran və ətraf rayonlarda 40-dək yaşayış məntəqəsi yandırılmaqla yerlə-yeksan olunub, 2000-dən çox dinc sakin qətlə yetirilib. Mərasimdən sonra Lənkəran Dövlət Dram teatrında Vətən müharibəsində 44 gün ərzində qazanılan böyük zəfərdən bəhs edən “Haqqın 44 günü” tamaşası nümayiş olunub. 31 Mart Azərbaycanlıların Soyqırımı ilə əlaqədar Şamaxı rayonunda anım tədbirində əvvəlcə iştirakçılar soyqırımı abidəsi ziyarət edib. Ardınca rayon mədəniyyət mərkəzində təşkil olunan tədbirdə məktəblilərin əl işlərindən ibarət rəsm sərgisi nümayiş olunub. Tədbirin rəsmi hissəsində ölkəmizin ərazi bütövlüyü uğrunda həlak olmuş şəhidlərimizin və soyqırım qurbanlarının xatirəsi bir dəqiqəlik sükutla yad edilib. Çıxış edənlər erməni quldurlarının törətdikləri kütləvi qırğınlar və onların nəticələri barədə tarixi faktları diqqətə çatdırıblar. Bildirilib ki, 1918-ci ilin mart-aprel aylarında təkcə Şamaxı qəzasında qəza mərkəzi və 120 kənd yaşayış məntəqəsinin 86-sı ermənilərin təcavüzünə məruz qalıb. 8027 azərbaycanlı vəhşicəsinə qətlə yetirilib. Vurğulanıb ki, mart-aprel qırğınlarına məruz qalan digər 33 kənddə isə qətliamların konkret mənzərəsi və miqyası barədə araşdırma yarımçıq saxlanılıb, tarixi həqiqətlərin üzə çıxarılması uzun illər yasaq edilib.

Ağsuda öncə soyqırımı qurbanlarının xatirəsi bir dəqiqəlik sükutla yad olunub. Çıxışlarda ermənilərin azərbaycanlılara qarşı törətdikləri soyqırımların tarixinə nəzər salınıb. 1918-ci ilin mart-aprel aylarında Stepan Şaumyanın rəhbərliyi ilə o zaman Ağsu ərazilərinin də daxil olduğu Şamaxı qəzasında ermənilərin qəza mərkəzini və 86 kənd yaşayış məntəqəsini dağıtdıqları, insanları kütləvi surətdə qətlə yetirildikləri bildirilib. Vurğulanıb ki, Ermənilərin tarix boyu xalqımıza qarşı törətdikləri bütün cinayətlərin cavabı 2020-ci ilin sentyabrında başlayan və 44 gün davam edən Vətən müharibəsində verildi.

Qax rayonunda keçirilən anəm tədbirində iştirakcılar rayon Şəhidlər Xiyabanında vətənin azadlığı uğrunda canından keçən şəhidlərin məzarını ziyarət nedib, Onların ruhuna dualar oxuyublar. Çıxış edənlər erməni millətçilərinin törətdikləri vəhşiliklərin, zorakılıqların xalqımızın yaddaşından heç vaxt silinməyəcəyini vurğulayıblar.

Zaqatalada da iştirakçılar əvvəlcə soyqırımı qurbanlarının xatirəsinə ucaldılmış abidənin önünə gül dəstələri düzüblər. Çıxış edənlər erməni millətçilərinin əsrlər boyu azərbaycanlılara qarşı törətdikləri kütləvi qırğınlar, həyata keçirdikləri soyqırımı və deportasiya siyasətinin acı nəticələri barədə geniş məlumat veriblər. Diqqətə çatdırılıb ki, yalnız Azərbaycan dövlət müstəqilliyini bərpa etdikdən sonra ermənilərin dövlətimizə və xalqımıza qarşı işğalçılıq və soyqırımı cinayətlərini araşdırmaq, əsl həqiqətləri dünyaya bəyan etmək və hüquqi-siyasi qiymət vermək mümkün olub.

İndiyədək Qarabaldır kəndinin yaxınlığından qaz xətti keçsə də kəndin qazlaşması aparılmayıb. Artıq Azəriqaz İstehsalat Birliyi kəndin qazlaşdırılmasına başlayıb. Kənddə ümumi uzunluğu 7250 metr qaz boru xəttlərinin çəkilişi nəzərdə tutulub ki, həmin xəttlərdən 1850 metri artıq icra olunub. 500 nəfərdən çox sakini olan Qarabaldır kəndində yanacaq növü kimi əsasən odundan istifadə olunub. Hətta bəzən sakinlər həyətlərindəki meyvə ağaclarını kəsməli olub. Sakinlər qazın çəkilməsinin ekoloji cəhətdən də mühüm olduğunu bildirirlər. Yaxın 3 ay ərzində Qarabaldır kəndində qazlaşdırma işləri yekunlaşacaq. Beləliklə, 500 sakin mavi yanacaqdan istifadə edə biləcək.

Şəkidə 6 nəfərə məxsus fərdi yaşayış evi yanıb. Yanğın Şəki şəhəri Cəfər Cabbarlı küçəsində ümumi sahəsi 400 kv/m olan yaşayış evlərində qeydə alınıb. Yanğının söndürülməsi üçün əraziyə Fövqəladə Hallar Nazirliyinin Şəki Rayon Dövlət Yanğından Mühafizə Hissəsinin texnikaları və şəxsi heyəti cəlb edilib. Yanğın nəticəsində binanın yanar konstruksiyaları və ev əşyaları yanıb. Yanğının yaxınlıqdakı tikililərə keçməsinin qarşısı alınıb. Xoşbəxtlikdən xəsarət alan olmayıb. Faktla bağlı araşdırma aparılır.