Şəhid Asif Məmmədovun doğum günündə ailə üzvləri, dostları, və kənd sakinləri Vətənin qəhrəman oğlunun məzarını ziyarət edib, ruhuna dualar oxuyub, onunla bağlı xatirələrini bölüşüblər.  Məktəblilər vətənpərvər ruhda şeirlər səsləndirib. Asif Əhmədov 2001-ci ilin aprel ayında Şəkinin Oxud kəndində anadan olub. 2019-cu ilin aprelində Vətən qarşısında öz borcunu yerinə yetirmək üçün qürurla hərbi xidmətə yollanıb. Həqiqi hərbi xidmətini başa vurmasına 2 gün qalmış Vətən müharibəsi başlayıb. Asif də minlərlə vətən oğlu kimi döyüşlərə qatılıb , Füzuli, Xocavənd istiqamətlərində vuruşub. Yaxınları Asifin müsbət keyfiyyətlərindən, vətənə bağlılığından, yardımsevər olmasından ağız dolusu danışırlar. Xatırladaq ki, 19 yaşlı qəhrəman Vətən torpaqlarının işğalçılardan geri qaytarılması üçün son nəfəsinə kimi mübarizəsini davam etdirib və 2020-ci ilin oktyabrın 21-i Füzulidə qəhrəmancasına şəhid olub. Asif Əhmədov ölümündən sonra döyüşdə göstərdiyi şücaətə görə “Vətən uğrunda” və “Xocavəndin azad olunmasına görə” medalları ilə təltif edilib.

İsmayıllı rayonunda yanğın olub. Hadisə bu gün saat 16 radələrində rayonun Qoşakənd kənd sakini,  Rafael Nəsibova məxsus ümumi sahəsi 120 kvadratmetr olan 6 otaqlı evdə baş verib.  Yanğının söndürülməsi üçün əraziyə FHN-nin İsmayıllı Dövlət Yanğından Mühafizə Hissəsinin 3 avtomobili və canlı qüvvəsi cəlb olunub. Hadisə zamanı ev və içəridəki əşyalar, eləcə də yaxınlıqdakı  tövlənin dam örtüyünün yanar konstruksiyaları və  talvarın altına yığılan 3 ton ot bağlamasının 60 kiloqramı yanıb.  Yanğın zamanı xəsarət alan olmayıb. Faktla bağlı araşdırma aparılır. 

 Vətən müharibəsində qəhrəmancasına şəhid olmuş xüsusi təyinatlı İbrahim Məmmədovun doğum günü məzarı başında qeyd olunub. 37 yaşını cənnətdə qeyd edən şəhidin ailəsi, yaxınları, qazilər onun məzarını ziyarət edib, ruhuna dualar oxuyublar. Şəhidin keçdiyi qısa və şərəfli ömür yolundan qürurla danışılıb. Bildirilib ki, Xüsusi təyinatlı qüvvələrin giziri İbrahim Məmmədov Vətən müharibəsində qəhrəmancasına vuruşub, çətin xüsusi əməliyyatları uğurla yerinə yetirib. Ermənilərin qorxulu yuxusuna çevrilən, onlara qan udduran "Canavar" ləqəbli igidimizi Hadrutda göstərdiyi şücaətlərə görə, döyüş yoldaşları Hadrut qəhrəmanı adlandırıblar. Həmçinin İbrahim Məmmədov  Füzulidə Azərbaycan bayrağını yüksəldib və azad olunmasını Ali Baş Komandana məruzə edib. Torpaqlarımızın qəsbkarlardan azad edilməsində, qisasımızın alınmasında müstəsna xidmətləri olan şəkili igidimizin həyatı və döyüş yolu tarixin şanlı səhifələrindən biri kimi gələcək nəsillərə nümunə olacaq.