Yolumuz Qobustan rayonunun Sündü kəndində tarixi min illəri əhatə edən qədim mağaralaradır. Sündü Qobustan rayon mərkəzindən 16 km şimal-qərbdə, başdan-başa əkin sahələrindən ibarət münbit yaylalar qoynunda yerləşən və qədim tarixi olan bir kənddir. Ətrafdakı sıldırım yamaclı təpələr, dərin yarğanlar bu kəndin ecəzkar təbiətinin yalnız bəzi cizgiləridir.Qarlı havada bir qədər piyada yol qət etdikdən,dərədən,təpədən keçdikdən sonra sirli mağaralara yetişirik. Bələdçilərimizdən öyrənirik ki, xususi ilə yay aylarında yerli və xarici turistlər bu yerlərə üz tutaraq mağaralarda ocaq yandırıb,süfrə açıb, özləri ilə gətirdikləri yemək-içməklə o tarixi dövrü canlandırmağa çalışanlar da az deyil. Möhtəşəm və heyrətamiz qayalar üzərində olan bu mağaralardakı iç-içə oyma otaqlar qədim insanların yaşam tərzini və özünə necə ev qurduğunu əyani şəkildə nümayiş etdirir. Təəssüf ki, təbiət hadisələri səbəbindən bəzi mağaralarda aşınmalar qeydə alınıb.Amma buna baxmayaraq,  bizim eradan əvvəl yaşamış əcdadlarımızın yadigarı olan mağaralar hələ də, öz görkəmini qoruyub, saxlamaqdadır.Kənd ərazisində bir, iki və üç otaqdan ibarət olmaqla ümumilikdə 14 mağara mövcuddur. Sündüdə az qala hər daş, hər qarış torpaq bir tarixdir. Burda sasani hücumlarının da, xəzər-hun basqınlarının da, ölkədaxili feodal müharibələrinin də izlərini görmək mümkündür.Eyni zamanda bu mağarlardan yerli sakinlər 1918-ci ilin aprel qırğınları zamanı sığınacaq kimi də istifadə ediblər. Erməni-daşnak qüvvələri kənddəki 433 evdən 198-ni yandırıb, qaçaraq canını qurtarmağa fürsət tapmayan 295 nəfəri qətlə yetiriblər. Tarix üzrə fəlsəfə doktoru Fariz Xəlilli hesab edir ki,bu tip mağaralar qorunub saxlanılmaqla yanaşı həmçinin elmi araşdımalara ,arxeloji tədiqatlarların aparılmasına ehtiyacı var. Hər hansı böyük bir ekspedisiya bunun üzərində işləmiyib,amma müxtəlif vaxtlarda kəşfiyyat xarakterli baxışlar olub hələ bu 20 ci illərdə 1920 - 1930 cu illərdə hesabatlarda bu haqda məlumatlar var.

Sözügedən yer Şəkinin mərkəzi küçələrindən biri olan Mikayıl Müşfiq küçəsidir. Yeni yolu işıqlandırmaq üçün asfalt örtüyü yenidən bərbad hala salınıb. Ancaq qazıntı işləri tək küçənin işıqlandırılması ilə bağlı yox, həm də digər kommunal xidmətlərin çəkilməsi səbəbindən də qazılır. Elə Şəki şəhərini Şəki- Oğuz magistralı ilə birləşdirən Zərifə Əliyeva küçəsində olduğu kimi. Burada isə yeni çəkilən asflat örtüyü dağıdılıb və ərazidə yerləşən fabrikə su-kanalizasiya xətti çəkilib. Qazılan yeri sadəcə torpaqlamaqla kifayətləniblər.  Şəki şəhərinin tikinti və memarlıq idarəsindən bildiriblər ki, 2022-ci ildə Şəki şəhərində daxili imkanlar hesabına 3.5 km uzunluğunda, 31 min kavdart metrə yaxın asfalt örtüyü çəkilib. Məsələyə münasibət bildirən ekspert Cahid Həsənov deyir ki, dünyanın qabaqcıl ölkələrində təmir bərpa və ya yenidənqurma işlərində əsas diqqət qurumlararası koordinasiyaya və planlamaya yönəldilir. Azərbaycanda isə eyni regionda, eyni şəhərdə komunal xidmətlər göstərən qurumlar arasında  heç bir əlaqə yoxdur. Ancaq ümumilikdə görünən odur ki, vahid informasiya mərkəzi yaradılana və qurumlar arası koodinasiya qurulanadək yeni çəkilən asfaltların dağıdılmasına hələ də şahid olacağıq.

Zaqatalada 4 otaqlı fərdi yaşayış evində yanğın olub. Rayonun Muxax kəndində, kənd sakini İntiqam Əliyevə məxsus sahəsi 110 kv/m olan ev gecə saatlarında yanıb. Əraziyə Zaqatala rayon Dövlət Yanğından Mühafizə Hissəsinin iki yanğınsöndürən maşını və şəxsi heyəti cəlb edilib. Hadisə zamanı evin bir otağı içərisindəki əşyalarla birlikdə, digər 30 kv/m-lik otağın isə yarıdan çoxu yanıb. Məznilin qalan hissəsi və yaxınlıqdakı tikililər alovdan mühafizə olunub. Xəsarət alan yoxdur. Yanğının hansı səbəbdən başverməsi araşdırılır. 

Ölkə ərazisində qeyri-sabit hava şəraiti davam edir. Xüsusilə axşam saatlarında şaxta olması və yağan qar Qəbələdə yolların buz bağlamasına səbəb olub. Şəhərin mərkəzi küçələri, eləcə də kəndlərə gedən yollarda maşınların hərəkətində çətinliklər yaranıb. Bununla yanaşı, Qaraməryəm - İsmayıllı -Şəki magistralının Vəndam qəsəbəsi və Nohurqışlaq kəndlərindən keçən hissəsində yolun buz bağlaması nəticəsində avtomobillərin hərəkətində məhdudiyyətlər olub. Günorta saatlarına doğru hərəkət bərpa olunub. Axşam saatlarına doğru yolların yenidəjn buz bağlayacağını nəzərə alaraq bu istiqamətdə hərəkət edəcək sürücülərə ehtiyyatlı olmaları tövsiyyə edilir. 

Şəkidə sahibsiz it 57 yaşlı kişiyə hücum edib. Bu gün günorta saatlarında rayonun Kiçik Dəhnə kənd sakini Laçın Adamova yaşadığı kəndin ərazisində sahibsiz it hücum edərək onun sol aşağı ətrafının bud nahiyəsinə xəsarət yetirib. Laçın Adamov Şəki Rayon Mərkəzi Xəstəxanasına müraciət edib, ona lazımi tibbi yardım göstərilib, quduzluğa qarşı peyvənd vurulduqdan sonra ambulator müalicə almaq şərti ilə evə buraxılıb.

Ötən gündən başlayaraq Şamaxı sakinləri də Türkiyədə zəlzələdən zərərçəkmişlərə yardım kampaniyasına qoşulublar. Yardım aksiyasında yerli sakinlər, iş adamları, müəssisələr, idarələr könüllü olaraq iştirak edirlər. Böyükdən-kiçiyə hər kəs qardaş Türkiyədə zəlzələdən zərərçəkmişlərə yardım etmək üçün səhər saatlarından Şamaxı Olimpiya Mərkəzində təşkil edilən yardım toplanma məntəqəsinə gəlir, türk qardaşlarımıza dəstək olur. Rayon sakinləri isti geyimləri, əlcəkləri, corabları, yataq dəstlərini, quru ərzaqları, təmizləyici vasitələri təyin olunmuş məntəqədə çeşidləyirlər. Yardımlar toplanıldıqdan sonra yük avtomobillərinə yığılır. Son iki gündə 4 yük maşını Bakıya göndərilib. Günün sonuna kimi daha 4 yük maşını da göndəriləcək.

İsmayıllıda mağazalardan birinin kassasından soyğunçuluq yolu ilə 300 manat oğurlanıb. Polis əməkdaşlarının keçirdiyi əməliyyat nəticəsində qeyd edilən hadisəni törətməkdə şübhəli bilinən şəhər sakini, əvvəllər də narkotiklərlə əlaqəli cinayətlərə görə dəfələrlə məhkum olunmuş Ruslan Məmmədov tutularaq istintaqa təqdim olunub. Saxlanılan şəxsin yaşadığı evdə odlu silah gizlətdiyi də məlum olub. Həmin ünvana baxış keçirilərkən oradan lüləsi və qundağı kəsilmiş tüfəng aşkarlanaraq götürülüb. Faktla bağlı cinayət işi başlanılıb, Ruslan Məmmədov təqsirləndirilən şəxs qismində istintaqa cəlb edilib.

Şəkinin Aşağı Göynük kəndində Şamil Babayevə məxsus ümumi sahəsi 110 kv/m olan birmərtəbəli iki otaq və eyvandan ibarət fərdi yaşayış evində yanğın hadisəsi qeydə alınıb. Yanğının söndürülməsi üçün əraziyə Fövqaladə Hallar Nazirliyinin  Şəki rayon Dövlət Yanğından Mühafizə Hissəsinin iki yanğınsöndürən maşını və şəxsi heyəti cəlb edilib. Evin 90 kv/m-lik sahəsi və əşyaları yanıb. Yaxınlıqdakı tikililər yanğından mühafizə edilib. Hadisə nəticəsində xəsarət alan olmayıb.