Sabah futbol üzrə ölkə çempionatında 4-cü dövrənin oyunlarına start veriləcək. Maraqla gözlənilən qarşılaşmalardan biri Şamaxıda baş tutacaq. Şəhərin eyniadlı komandası Neftçini qəbul edəcək. Şamaxıda uzun illərdən sonra yaşanacaq futbol həyəcanına hazırlıq işləri artıq yekunlaşıb. Rayonda futbola böyük maraq var. Şamaxı Rayon İcra Hakimiyyətinin rəsmisi Rəşad Əliyev bildirib ki, satışa 1500 bilet təqdim olunmuşdu və hamısı satılıb. Hətta əlavə bilet tədarükü planlaşdırılır. Rayonda abu-havanın yüksək olduğunu bildirən Rəşad Əliyev sabah böyük izdiham gözlənildiyini deyib.

Torpaq uçqunu İsmayıllı-Lahıc-Dəmirçi-Şamaxı avtomobil yolunun keçdiyi Niyaldağ silsiləsində, Lahıc qəsəbəsi ərazisində baş verib. Son bir ayda rayona yağan qar və yağış səbəbindən hündür dağlardan gələn torpaq və daşlar avtomobil yoluna tökülüb. Nəticədə  avtomobillərin Lahıc, Sərdahar, Müdrüsə, Əhən, Burovdal, Vaşa, Yuxarı Zərnava, Namazgah, Güyüm kəndlərinə gediş-gəlişi dayanıb. Yolun açılması üçün əraziyə ağır texnikalar cəlb olunub, hərəkət bərpa edilib. Bununla belə ərazidə güclü külək müşahidə olunur. Küləyin xırda daşların yola doğru tökülməsinə səbəb ola biləcəyi ehtimalı nəzərə alınaraq Avtomobil Yolları Dövlət Agentliyinin xüsusi texnikalardan ibarət qrupu ərazini nəzarət altında saxlayır.