Şəkidə Novruz Bayramı şənlikləri davam edir. XVIII əsrə aid memarlıq abidəsi “Qala divarları”nın həyətində bayram tonqalı alovlandırılıb. Novruzun personajları Kosa və Keçəl məzəli zarafatları ilə tədbir iştirakçılarına xoş əhvali-ruhiyyə bəxş edib, pəhləvanlar öz məharətlərini göstəriblər. Şəki Regional Mədəniyyət İdarəsinin tabeliyində olan mədəniyyət müəssisələrinin folklor və rəqs kollektivləri, zurnaçalanlar ansamblı maraqlı konsert proqramı ilə çıxış ediblər. Şəki sənətkarlarının əl işlərindən ibarət sərgilər nümayiş olunub. Milli geyimli oğlan və qızlar əllərində Novruz xonçaları şənlik iştirakçılarına bayram şirniyyatı paylayıblar. Qoruq ərazisində bayram yarmarkası həftənin sonunadək davam edəcək... 

Şəkidə internetin keyfiyyəti baxımından vəziyyət heç də ürəkaçan deyil. Turizm şəhəri olsa da, Şəki bu sahədə müasir dövrün tələblərinə cavab verməkdə çətinlik çəkir.  Elə rayona gələn turistlər də bu problemlə üzləşdiklərini deyirlər. Rayonda əsasən köhnə texnologiya - ev telefonu ilə çəkilən internetdən istifadə olunur. Elə bunu nəticəsidir ki, internetin keyfiyyət göstəricisi və sürəti tələblərə cavab vermir. Pandemiya dövründə distant təhsilə keçid, internetə olan tələbatı daha da artırdı. Ancaq əksər evlərdə telefon xəttinin olmaması, nəticədə internetin də yoxluğu və ya tamamilə aşağı sürətli internetin olması şagird və müəllimlər üçün əsl kabusa çevrildi. Hazırda şəhərdə optik internet çəkilir. Ancaq  sadəcə bir şirkət tərəfindən edildiyi üçün bu, istifadəçilərə geniş seçim imkanı da vermir. Regionda rəqabətli mühit və vətəndaşın seçim imkanı olmadığı üçün bu internetin inkişafının da qarşısını alır. Ekspertlər hazırda bölgələrdə istifadə olunan ADSL texnalogiyasının artıq öz dövrünü başa vurduğunu deyir. Məsələnin həllini isə özəl provayderlərə bölgələrdə şərait yaradılmasında görürlər. Staistik göstəriciıər onu deməyə əsas verir ki, internetdən istifadə dinamikası son dövrlərdə durmadan artır. Ancaq bu o demek deyil ki, keyfiyyət də buna paralel olaraq gedir. Nəzərə alsaq ki, artıq həyatımızdakı işlərin əksəriyyəti internet üzərindən həyata keçirilir, hələ də internetin bu qədər çətin əldə edilməsi sual doğurur.

Şamaxı rayonu Məhəmməd Hadi küçəsində yerləşən, 50 ailənin məskunlaşdığı yaşayış binasının sakinləri qorxu içində yaşayır. Binanın həyətində olan 3 çinar ağacı illərdir ki, budanmır. Ağaclardan biri o qədər yola doğru əyilib ki, hər an aşa bilər. Üstəlik ağacın altında piyadların sıx hərəkəti müşahidə edilir. Sakinlərin sözlərinə qəzalı vəziyyətə düşən ağacın bu günə kimi aşmamasının qarşısını alan- ağacın altında olan su çənidir. Bu azmış kimi güclü külək əsən zaman ağacların budaqları yaşayış binasının pəncərələrinə çırpılaraq şüşələri qırır. Qırılan şüşə parçaları isə binanın həyətindən keçənlər üçün bir başqa təhlükə yaradır. Sakinlər deyir ki, məsələylə bağlı aidiyyatı qurumlara dəfələrlə müraciət etsələr də bir nəticəsi olmayıb. Məsələylə bağlı Ekologiya və Təbii Sərvətlər Nazirliyindən bildirildi ki, bu cür vəziyyətlərdə  sakinlər yerli bələdiyyə orqanına müraciət etməlidir. O qurum da öz növbəsində Ekologiya və Təbii Sərvətlər Nazirliyinə.... Bu müraciətdən sonra əraziyə ekpertlər tərəfindən baxış keçirilə və ehtiyac olarsa ağacın kəsilməsi ilə bağlı qərar verilə bilər. Belə görünür, qurumlararası əlaqənin itməsi sakinlərin müraciətini də cavabsız qoyub. Ümid edirik ki, bir faciə baş verməmiş məsələ öz həllini tapar...

Bu gün Şəkidə - Vətən müharibəsində qəhrəmancasına döyüşərək şəhidlik zirvəsinə ucalan şəhid mayor Xəyal Məmmədovun xatirəsinin əbədiləşdirildiyi bulaq komplesinin açılışı baş tutub. Mərasimə şəhidin ailəsi ilə yanaşı, Səfərbərlik və Hərbi Xidmətə Çağırış üzrə dövlət xidmətinin, İcra hakimiyyətinin rəsmiləri, millət vəkili, şəhidin döyüş yoldaşları, dostları, şəhər ictimaiyyəti qatılıb. 44 günlük vətən müharibəsində şəhid olanların ruhuna dualar oxunub, şəhidlərin əziz xatirəsi bir dəqiqəlik sükutla yad edilib. Çıxış edənlər 44 günlük müharibə kimi tarixə düşən İkinci Qarabağ müharibəsində Azərbaycan Ordusunun qəhrəmanlığından, 30 ildən artıq bir müddətdə işğal altında qalan torpaqlarımızın azad edilməsi ilə nəticələnən şanlı Qələbədən, şəhidimizin gənclərə nümunə olan qısa, lakin şərəfli ömür yolundan danışıblar. Şəhid Xəyal Məmmədovun qorxmazlığından, vətənpərvərliyindən, döyüşdə göstərdiyi qəhrəmanlıqlardan qürurla bəhs edilib. Qeyd edək ki, mayor Xəyal Məmmədov oktyabrın 20-də Qubadlı döyüşləri zamanı snayper gülləsi nəticəsində şəhidlik zirvəsinə ucalıb. Vətən müharibəsində hərbçi kimi peşəkarlığı yüksək qiymətləndirilib. Prezidentin müvafiq sərəncamları ilə ölümündən sonra “Vətənə Xidmətə görə” ordeni, “Vətən uğrunda” ,“Cəbrayılın, Füzulinin və Qubadlının azad olunmasına görə” medalları ilə təltif edilib. Qəhrəmanımızın iki qız övladı Vətənə əmanət qalıb. 

İsmayıllı rayon sakini bədbəxt hadisə nəticəsində dünyasını dəyişib. Hadisə rayonun Aşıqbayramlı kəndinin ərazisində bu gün saat 10:30 radələrində baş verib. Belə ki, kənd sakini 58 yaşlı Vaqif Zahidov ehtiyatsızlıqdan yaşadığı evin yaxınlığından keçən kiçik dağ çayına düşüb. Çaya yıxılan kişi köməksiz vəziyyətdə qalıb və boğularaq ölüb. Onun cəsədi sudan çıxarılaraq ailəsinə təhvil verilib. Faktla bağlı İsmayıllı rayon Prokurorluğu araşdırma aparır.