Bağlardan hər gün adambaşına 250-300 kiloqram məhsul yığılır. Üzümçülüyün onlar üçün həm gəlir mənbəyi, həm də dədə-babalarından qalan bir sahə olduğunu deyən Durdanə nənə, məhsul yığımını yaxın vaxtlarda yekunlaşdıracaqlarını bildirir. Son iyrimi ildə müxtəlif növ üzüm sortları yetişdirən sahibkar Habil Əzimovun sözlərinə görə vaxtilə üzümçülük rayonu kimi tanınan bölgədə son illər bu ənənəvi və gəlirli sahənin inkişafı artmaqdadır. Bu işdən həm sahibkarlar həm də kəndlilər gəlir əldə edir. Fermerlər üzümçülükdə müəyyən problemlərin olduğuna da diqqət çəkir. İlk növbədə qiymət onları qane etmir.   Ən keyfiyyətli üzüm 80 qəpikdən satılır. Bu da fermerin bağlara çəkdiyi xərci belə ödəmir. Hazırda bağlardan toplanan məhsul satış üçün yerli və xarici bazarlara çıxarılır. Həmçininqış aylarında satış həyata keçrimək üçün soyuducu anbarlara yığılır. İlkin mərhələdə daha tez yetişən “Prima” və “Kardinal” süfrə sortlu üzüm yığılıb. Növbəti mərhələdə şirə və şərab üçün nəzərdə tutulan məhsulların tədarükünə başlanılıb.Vaxtilə üzümçülük rayonu kimi tanınan bölgə üzümçüləri əvvəlki şöhrətlərini geri qaytarmaq əzmindədirlər.  Həyata keçirilən Dövlət proqramı da üzümçülüyün yenidən dirçəldilməsində mühüm rol oynayıb. Sahibkarlara dəstək məqsədi ilə subsidiyalar verilib, yeni üzümçülük təsərrüfatları yaradılıb. Xatırladaq ki,ötən əsrin 70-80-ci illərində Şamaxı Azərbaycanın ən böyük üzümçülük rayonlarından birinə çevrilmişdi. Sonradan bu sahə tənəzzülə uğradı. Hazırda isə Şamaxıda 1870 hektar üzüm bağı var. Bunun da 1700 hektarı bar verir. Məhsul yığımı bütün ərazilərdə, xüsusilə Meysəri, Məlcək, Mirikənd, Qaravəlli, Həmyəli, Sabir, Adnalı, Çarhan, Mədrəsə, Şəhriyar inzibati ərazi dairələrində daha mütəşəkkil aparılır. Hər gün sahələrə 300-350 nəfərə yaxın işçi qüvvəsi çıxır. 

Ayaqqabısının yırtıq olmasına baxmayaraq əlindəki son pulunu orduya ianə edən Hikmət baba sadəliyi və yardımsevərliyi ilə hamının qəhrəmanına çevrilib.  İki il keçməsinə baxmayaraq hələ də onun bu xeyirxah əməlindən qürurla danışılır. Bir xeyirxah əməliylə milyonların qəlbinə yol tapan Hikmət baba, yardımsevərliyi ilə yenidən gündəmə gəlib. Belə ki, yaşadığı Şəkinin Baş Küngüt kəndində yerləşən dünyəvi şairimiz Nizami Gəncəvinin heykəlini restavrasiya etdirməyi planlaşdırır. Bunun üçün danışıqlar aparan və hələlik heykəlin ətrafını təmir etdirən Hikmət baba indi heykəli əvvəlki görkəminə qaytaracaq mütəxəssis axtarışındadır. Sonda, Hikmət babaya bitmək-tükənmək bilməyən arzularını, xeyirxah əməllərini reallaşdırmaq üçün sağlam ömür arzulayırıq.

Şəki şəhərinin Salman Mümtaz küçəsində piyadanın ölümü ilə nəticələnən yol-nəqliyyat hadisəsi baş verib. Belə ki, Şəki rayon sakini 63 yaşlı Sərdar İlyasovun idarəetdiyi "Mitsubishi" markalı avtomobil yolu keçmək istəyən 57 yaşlı Səadət Abbasovanı vurub. Ağır bədən xəsarətləri alan qadın hadisə yerində ölüb. Faktla bağlı araşdırma aparılır.

Oğuz sakini meşədə kəsdiyi ağacın altında qalıb. Hadisə rayonun Xalxal kəndi ərazisində, meşəlikdə baş verib.Rayonun Ərmənət kənd sakini, 30 yaşlı Vüqar Mustafayev meşədə kəsdiyi ağacın budağının altında qalaraq xəsarət alıb. Yaralıya Oğuz Rayon Mərkəzi Xəstəxanasında ilkin yardım göstərilib, daha sonra Şəki Rayon Mərkəzi Xəstəxanasına göndərilib. Faktla bağlı araşdırma aparılır.

Dövlət Məşğulluq Agentliyi Vətən müharibəsi veteranları və şəhid ailələri üçün yaradılan kiçik təsərrüfatlarla əyani tanışlıq üçün növbəti mediatur təşkil edib. Şamaxı rayonunda yaradılan  təsərrüfatlarla tanışlıq zamanı jurnalistlərə 44 günlük Vətən müharibəsi şəhidlərinin ailə üzvlərinin, veteranların sosial dəstəklə təminatı tədbirləri barədə məlumat verilib. Bu tədbirlərin indiyədək 119 min şəxsi əhatə etdiyi, onlara dəstək yönümlü 243 min xidmət göstərildiyi bildirilib. Sosial dəstək paketi çərçivəsində həmçinin şəhid ailələrinin üzvləri və müharibə iştirakçılarından ibarət 15,2 min şəxsin aktiv məşğulluq proqramlarına, onlardan 8,6 min şəxsin özünüməşğulluq proqramına cəlb edildiyi də diqqətə çatdırılıb. Media nümayəndələri əvvəlcə şəhid Tərlan Amanəliyevin atası Rövşən Amanəliyev üçün özünüməşğulluq proqramı çərçivəsində yaradılan təsərrüfatla tanış olublar. Şəhid atası postmüharibə dövründə özünüməşğulluq proqramına cəlb olunaraq proqramın dəstəyi ilə avtoyuma avadanlığı ilə təmin olunub.Müharibə veteranları Samir Hacızadənin və Teyyub Nağıyevin təsərrüfatları ilə də tanışlıq olub. Özünüməşğulluq proqramı çərçivəsində verilmiş aktivlər hesabına Samir Hacızadə broyler inkubatoru, Teyyub Nağıyev isə heyvandarlıq üzrə təsərrüfatlarını yaradıblar.

İsmayıllıda aqoniya – can vremə halında olan iki at kəsilib. Həmin heyvanların 210 kq ətinin satışa çıxarılmasının qarşısı alınıb. Bu barədə Qida Təhlükəsizliyi Agentliyindən məlumat verilib. Belə ki, Agentlik əməkdaşları tərəfindən Rayon Polis Şöbəsinin əməkdaşları ilə birgə keçirilmiş reyd zamanı İsmayıllı rayonu, Yuxarıbaş kəndində vətəndaş Vüqar Ziliyevə məxsus fərdi yaşayış evinin həyətyanı sahəsində ümumi çəkisi 210 kq 2 baş at cəmdəyi qalıqları aşkarlanıb. İlkin araşdırmalar nəticəsində heyvanın aqoniya halında kəsildiyi və istehlaka yararsız olduğu müəyyən edilib. Aşkar olunmuş faktla bağlı qanunvericiliyə uyğun olaraq məhsulun toxunulmazlığı təmin edilib və nümunələr götürülərək Azərbaycan Qida Təhlükəsizliyi İnstitutunun müvafiq laboratoriyasına təqdim olunub. Araşdırmalar davam etdirilir.