Şəkidə Azərbaycan Meliorasiya və Su Təsərrüfatı Açıq Səhmdar Cəmiyyətinin sədri Zaur Mikayılovun vətəndaşlarla görüşü baş tutub. Şəki, Qax və digər rayonlardan olan vətəndaşların müraciətləri dinlənilib, ərizə və şikayətlərinə baxılıb. Sakinlərin müraciətləri əsasən suvarma suyuna olan tələbatın ödənilməsi, suvarma kanallarının beton üzlüyə alınması, nasos stansiyaların quraşdırılması, nov kanallarının qurulması, kanalların lildən təmizlənməsi ilə bağlı olub. Qaldırılan məsələlərin hərtərəfli öyrənilməsi və qanunvericiliyin tələblərinə uyğun qısa müddətdə həll edilməsi üçün müvafiq tapşırıqlar verilib. Vətəndaşların müraciətlərinin bir qismi yerindəcə həllini tapıb, araşdırılmasına ehtiyac olan müraciətlərsə nəzarətə götürülüb.

Balakəndə 4 yaşlı uşaq yol qəzasının qurbanı olub. Hadisə rayonun Hənifə kəndində qeydə alınıb. 37 yaşlı İlkin Məmmədov idarə etdiyi "VAZ-2107" markalı avtomobillə yolu keçən 4 yaşlı Mirvari Allahverdiyevanı vurub. Qəza zamanı müxtəlif dərəcəli ağır bədən xəsarətləri alan Mirvari Allahverdiyeva xəstəxanaya aparılarkən yolda dünyasını dəyişib. Faktla bağlı Balakən rayon Polis Şöbəsində araşdırma aparılır.