Şəki Şəhər Polis Şöbəsi əməkdaşlarının tərəfindən keçiridiyi əməliyyat zamanı rayon ərazisində narkotik vasitələrin qanunsuz dövriyyəsi ilə məşğul olan şəxs tutulub. Rayon sakini Rüstəm Xəlilov şübhəli şəxs qismində saxlanılıb. Onun üzərində daşıdığı çantaya baxış keçirilən zaman 2 kiloqram 65 qram qurudulmuş marixuana aşkar edilərək götürülüb. Rüstəm Xəlilov ifadəsində narkotik vasitəni becərdiyi çətənə kollarından əldə etdiyini və satış məqsədilə üzərində daşıdığını bildirib. Faktla bağlı cinayət işi başlanılıb, zəruri istintaq hərəkətləri davam etdirilir.

Bu gün sentyabrın 12-dən 13-ə keçən gecə Ermənistan silahlı qüvvələrinin bölmələrinin Azərbaycan-Ermənistan dövlət sərhədinin Daşkəsən, Kəlbəcər və Laçın istiqamətlərində törətdiyi genişmiqyaslı təxribatların qarşısını alarkən sentyabrın 14-də qəhrəmancasına şəhid olan xüsusi təyinatlı Fərid Lətivovun ad günüdür. Yaşasaydı 21 yaşını qeyd edəcəkdi. Doğum günündə şəhidin ailə üzvləri, yaxınları, dostları məzarı başına toplaşıb,xatirəsini yad edib, onun haqqında xatirələrini bölüşüblər. Xatırladılıb ki, Fərid Lətifov 44 günlük Vətən müharibəsinin qəhramanlarından biri olub. Müharibə dövrü ərzində demək olar bütün cəbhə boyu vuruşan Fərid düşmənin qorxulu yuxusuna çevrilib. Buna görə də “Şücaətə görə” , "Füzulinin, Xocavəndin, Cəbrayılın, Kəlbəcərin və Şuşanın azad edilməsinə görə" medalları ilə təltif edilib. Şəhid Fərid Lətifov sentyabrın 15-i Şəki şəhidlər xiyabanında dəfn edilib. 

Şamaxının Niyazi Nəcəfov küçəsinin sakinləri də uzun illərdir yol həsrəti çəkirlər. Maraqlısı budur ki, küçə salınan bu yana asfalt üzü görməyib. Şamaxı rayonunda yerləşən Niyazi Nəcəfov küçəsi istismara yararsız olduğundan yaşlı insanlar, məktəblilər, eləcə də digər sakinlər rahat hərəkət edə bilmir. Sakinlərin sözlərinə görə, payız-qış aylarında, əsasən də yağıntılı havalarda küçə daha da keçilməz olur. İri çuxurlar, çay daşları piyada və sürücüləri burdan keçməyə peşman edir. Sakinlərin sözlərinə görə, taksi sürücüləri bir çox hallarda bu əraziyə gəlməkdən imtina edir və ya daha baha qiymətə aparırlar. Yolun təmirsiz olması təcili yardım və yanğınsöndürən maşınlarının da işini çətinləşdirir. Problem ilə bağlı Şamaxı Rayon İcra Hakimiyyətindən isə bildirildi ki, Şamaxı şəhərinin abadlaşdırılması istiqamətində tədbirlər davam etdirilir. Tezliklə Niyazi Nəcəfov küçəsinin yol problemi də öz həllini tapacaq.