20 Yanvar faciəsinin 34-cü ildönümü ilə əlaqədar Şamaxının Şəhidlər xiyabanında anım mərasimi keçirilib. Rayon İcra Hakimiyyətinin, hüquq-mühafizə orqanlarının rəsmiləri və ictimaiyyət nümayəndələri Şəhidlər xiyabanını ziyarət edib, şəhidlərin xatirəsinə ucaldılmış abidənin önünə əklil qoyulub, məzarları üzərinə tər çiçəklər düzüblər. Daha sonra rayon rəsmiləri Qanlı Yanvar faciəsində şəhid olmuş Şamaxı sakinləri Vidadi Məmmədov və Ağanəzər İsrayılovun Şamaxı şəhərinin Yeddi Günbəz və Laləzar qəbiristanlıqlarındakı məzarlarını ziyarət edib, ruhlarına dualar oxuyublar . Ardınca keçirilən dəyirmi masada çıxış edənlər 1990-cı il 20 Yanvar tarixinin xalqımızın milli müstəqillik, azadlıq uğrunda mübarizəsinin və yenilməz iradəsinin rəmzinə çevrildiyini bildiriblər. Saat 12:00-da isə respublikanın hər yerində olduğu kimi Şamaxıda da dövlət bayraqları endirilib, sükut elan olunub.

20 Yanvar faciəsinin 34-cü ildönümü Şəkidə də dərin hüznlə yad edilib. Səhər saatlarından başlayaraq rayon rəsmiləri, eləcə də ictimaiyyət nümayəndələri Şəhidlər xiyabanına gələrək, 20 Yanvar faciəsi qurbanlarının xatirəsini anıblar. Tədbir iştirakçıları şəhidlərin xatirəsinə ucaldılmış “Abidə” kompleksini ziyarət edib, Vətənimizin azadlığı və müstəqilliyi uğrunda şəhid olmuş igid Vətən oğullarının məzarları üzərinə qırmızı qərənfillər düzüb, şəhidlərin xatirəsini ehtiramla yad ediblər. Vurğulanıb ki, Azərbaycan xalqına qarşı törədilmiş bu cinayət xalqımızın müstəqillik uğrunda mübarizə əzmini qıra bilməyib, əksinə xalq kütlələrini daha da birləşdirib, onların mübarizliyini daha da artırıb. Saat 12:00-da isə Şəkidə də şəhidlərin xatirəsi bir dəqiqəlik sükutla yad edilib.

20 Yanvar faciəsinin 34-cü ildönümü ilə əlaqədar Qəbələnin Şəhidlər xiyabanında da anım mərasimi keçirilib. Rayon rəsmiləri və ictimaiyyət nümayəndələri Şəhidlər xiyabanını ziyarət edib. Ölkəmizin müstəqilliyi və ərazi bütövlüyü, xalqımızın azadlığı uğrunda canlarını qurban verən qəhrəman Vətən övladlarının ruhlarına dualar oxunub. Şəhidlərin xatirəsinə ucaldılmış abidənin önünə əklil qoyulub, məzarları üzərinə güllər düzülüb. Ümumxalq Hüzn Günü ilə əlaqədar saat 12:00-da rayonun bütün yaşayış məntəqələrində şəhidlərin xatirəsi bir dəqiqəlik sükutla yad edilib.

Qax rayonunda da icra hakimiyyətinin, idarə və təşkilatların rəsmiləri, rayon sakinləri Şəhidlər Xiyabanı ziyarət edib, qəhrəman şəhidlərin məzarı üzərinə əklil və gül dəstələri qoyublar.Ölkəmizin müstəqilliyi və ərazi bütövlüyü uğrunda canlarını qurban verən igid Vətən övladlarının ruhuna dualar oxunub. Bildirilib ki, həmin hadisələrdən 34 il ötsə də, Azərbaycan xalqına qarşı törədilən bu terror aktı bəşər tarixində insanlıq əleyhinə ən ağır cinayət olaraq qalacaq.Daha sonra Qax rayon mədəniyyət mərkəzinin hazırladığı ədəbi-bədii kompazisiya nümayiş olunub. Tədbirə bir dəqiqəlik sükutla yekun vurulub.

Qanlı Yanvar faciəsinin ildönümü ilə əlaqədar Zaqatala şəhərində əsaslı təmir olunmuş Şəhidlər Xatirə Kompleksinin önündə anım mərasimi keçirilib. Rayon rəhbərliyinin, şəhid ailələrinin üzvlərinin, Vətən müharibəsi iştirakçılarının, qazilərin, ictimaiyyət nümayəndələrinin iştirak etdikləri tədbirdə çıxış edənlər 20 Yanvar hadisələrinin cinayətkar mahiyyəti, onu doğuran səbəblər, faciənin acı nəticələri barədə məlumat veriblər. Faciənin günahkarlarının üzə çıxarılmasında, 20 Yanvar hadisələrinə hüquqi-siyasi qiymətin verilməsində, şəhidlərin adının əbədiləşdirilməsində Ümummilli Lider Heydər Əliyevin xidmətləri xüsusi vurğulanıb. Sonda şəhidlərin xatirəsi bir dəqiqəlik sükutla yad olunub.

Ölkədə qış turizminin inkişafı üçün labüd olan bir sıra şərtlər var. Sözsüz ki, bunların başında qar və qar əyləncələri gəlir. Bu istiqamətdə hazırda önə çıxan turizm məkanlarından biri də Qəbələdə yerləşən Turizm İstirahət Kompleksidir. Kompleks turistləri yay aylarında da özünə cəlb etsə də, bura qış turizminin inkişafına xidmət edir. Son günlərdə qarın yağması ilə əlaqədar qış turizminin inkişaf etdiyi bölgələrə üz tutan turistlərin sayında artım müşahidə edilir. Qəbələdə yerləşən "Tufandağ" Qış-Yay Turizm İstirahət Kompleksində yerli turistlərlə yanaşı, xaricdən olan ziyarətçilərin də sayı artıb. Qarlı dağlarda kanatla gəzintiyə çıxmaq, xizəklə sürüşmək üçün xüsusən isti ölkələrdən Qəbələyə gələn qonaqlar bu anı yaşamaqdan zövq alırlar. Avropanın qış turizm mərkəzlərindən geri qalmayan kompleksdə bütün şərait yaradılıb. Bunun nəticəsidir ki, Qəbələ son zamanlar Avropa və MDB ölkələrindən də turistləri özünə cəlb edir. Gün ərzində 3 mindən artıq turisti qəbul etmək gücündə olan kompleksdə xizək trasında 8 sürüşmə zolağı ziyarətçilərin istifadəsinə verilib. Qeyd edək ki, 2023-cü ildə Qəbələ 80 mindən çox yerli və xarici turisti qəbul edib. Əcnəbilər arasında Səudiyyə Ərəbistanının vətəndaşları əvvəlki illərdə olduğu kimi, yenə də üstünlük təşkil edib. Belə ki, ötən il bu ölkənin 11 min 421 vətəndaşı Qəbələdə olub. Həmçinin Rusiya, Türkiyə, İsrail, Qazaxıstan, Hindistan, Birləşmiş Ərəb Əmirlikləri, Küveyt və Türkiyəli turistlər də istirahət üçün Qəbələni seçib. Bu il ərzində isə turistlərin sayında ən az 20% artım gözlənilir.

Həftə içi 5 gün səhər saat 10:00-dan 12:00-a kimi Kanal S-də "Xəbərin var?" adlı verilişin aparıcıları İsa Şükürov və Elyar Sadiqovdur.

Şəkidə görkəmli alim Tağı Musəvinin tədqiqatları üzrə hazırlanan “Şəkinin orta əsrlər tarixi” kitabının təqdimatı olub. Tədbirdə rayon rəsmiləri, deputat və ziyalılar iştirak edib. Əvvəlcə kitabın təqdimatına həsr olunmuş videoçarx nümayiş olunub. Ardınca AMEA-nın Şəki Regional Elmi Mərkəzi Tarixi irs və etnoqrafiya şöbəsinin müdiri Rahim Həsənovun və M.F.Axundzadə adına Şəki Mədəniyyət Mərkəzinin əməkdaşı Aydın Məmmədovun birlikdə tərtib etdikləri “Şəkinin Orta əsrlər tarixi” adlı kitabdan bəhs olunub.

Vurğulanıb ki, kitabın elmi redaktoru tarix elmləri doktoru, professor Mehman Süleymanovdur. Nəşrə millət vəkili Vüqar İsgəndərov ön söz yazıb. Kitabda tədqiqatçı alim Tağı Musəvinin 1969-cu ildə “Şəki fəhləsi” qəzetində hissə-hissə çap olunmuş “Şəkinin Orta əsrlər tarixi haqqında” adlı geniş məqaləsinin elmi-tənqidi mətni, XVI-XVIII əsrlər Şəkisinə aid tərcümə etdiyi rəsmi sənədlər öz izahları ilə birlikdə geniş oxucu kütləsinə təqdim olunur. Bu araşdırmala da əsasən Şəki ilə Səfəvilər dövləti arasındakı münasibətlər, Şəkinin Səfəvilər dövlətində mövqeyi, bölgədə baş verən ictimai-siyasi proseslər və s. məsələlər yer alıb.

Şəkidə İnsan Hüquqları üzrə Müvəkkil Aparatının MSK ilə birgə təşkil etdiyi "Vətəndaşların seçki hüququnun təmini" mövzusunda növbəti maarifləndirici tədbiri baş tutub. Çıxış edənlər bu kimi tədbirlərin növbədənkənar prezident seçkilərinə hazırlıq məqsədilə keçirildiyini, seçki hüquqlarının, seçki prosedurlarının daha aydın izah olunması məqsədi daşıdığını vurğulayıb. Tədbirdə həmçinin seçki hüququnun daha səmərəli təmini, hər bir kəsin iradəsini ifadə etməsi, seçimini edə bilməsi üçün şəraitin yaradılmasından, seçki prosesində aşkarlıq və ədalətlilik prinsiplərinin təmini məqsədi ilə görülən işlərdən, qarşıdan duran vəzifələrdən, müşahidəçilik institunun əhəmiyyətindən danışılıb. Yekunda tədbir iştirakçılarını maraqlandıran suallar cavablandırılıb, mövzuyla bağlı müzakirələr aparılıb.

Növbədənkənar prezident seçkiləri ilə əlaqədar MSK-nın maarifləndirmə proqramı çərçivəsində Qəbələ şəhər seçki dairələrində məntəqə seçki komissiyalarının üzvləri üçün treninqlər davam edir. Treninqlərdə secki məntəqələrinin səsverməyə hazırlanması, səsvərmə prosesi, səslərin sayılması və səsvermənin nəticələri haqqinda rəsmi protokolların doldurulması qaydaları haqqında danışılıb. Komissiya üzvlərinə “Seçki günü üçün yaddaş” kitabçası və protokol nümunəsi verilib. Sonda treninq iştirakçılarının sualları cavablandırılıb. Qeyd edək ki, 116 saylı Qəbələ seçki dairəsində fəaliyyət göstərən 59 məntəqənin komissiya üzvlərinin treninqi mərhələli olaraq yanvarın 23-dək davam edəcək.