Rayonun Məmmədağılı kəndində ağacların kəsilməsi faktı ilə bağlı kanalımıza edilən müraciəti araşdırmışıq. 

Qəbələnin Məmmədağalı kəndinin cənub hissəsində, Göyçay çayının sahillərində və meşə massivində Qızıl ağac, Palıd eləcə də digər qiymətli ağaclar kəsilib. Sakinlər təqribən 2 ha sahədə 300-ə yaxın ağacın məhv edildiyini iddia edir.  Ağacların bir qismi kökündən, bir qismi isə yarıdan kəsilib. Ekologiya və Təbii Sərvətlər nazirliyindən isə bildirildi ki, həmin ərazi tədarük üçün nəzərdə tutulmuş ərazidir.  Ağacların kəsimi qanunauyğun şəkildə Meşə Təsərrüfatı idarəsi tərəfindən aparılıb.

Torpaqların azad edilməsi uğrunda döyüşlərdə canını qurban verən qalib ordunun cəngavər əsgərlərini tanıtmaqda davam edirik...  Belə igid oğullardan biri də doğum günü martın 1-də olan Şəki rayonunun Qayabaşı kəndinin övladı Əziz Əzizovdur.  Ailəsi onun cənnətdəki 22-ci yaşını qürurla, fəxrlə qeyd edib. 

Əziz Əzizov 2019-cu ildə həqiqi hərbi xidmətini başa vuraraq doğma kəndinə qayıdır. Arzusu polis olmaq, vətəninə xidməti davam etdirmək idi.  İşə başlayacağı günü səbirsizliklə gözləyən Əziz  Vətən müharibəsinin başladığını eşidər -eşitməz könüllü olaraq cəbhəyə yollanır. Vətən torpaqlarının müdafiəsi kimi şərəfli vəzifənin icrasına Füzulidə başlayan Əzizin döyüş yolu Şuşaya qədər uzanır. Qızğın döyüşlərdə öz pulemyotu ilə ermənilərə qan udduran, göz açmağa imkan verməyən qəhrəmanımız noyabrın 4-də Şuşa ətrafında gedən ağır döyüşlərdə şəhadətə yüksəlir. Ancaq bütün bu dövr ərzində ailəsi onun döyüşlərdə olduğunu bilməyib. Ön cəbhə də olsa da Əziz anasını üzməmək üçün bunu ondan həmişə gizlədib. Ailəsi igid oğulları ilə qürur duyduqlarını, fəxr etdiklərini söyləyirlər.  Onu da xatırladaq ki, Taleh Əzizov da qardaşı Əziz kimi vətənin harayına hay verib könüllü müharibəyə yollanıb, Suqovuşan istiqamətində döyüşlərdə iştirak edib. Əziz özündən çox qardaşı Talehdən narahat olub. Döyüş yoldaşları onun haqqında danışarkən gözləri alovlanır. Bildirirlər ki, mühasirəyə düşəndə Əziz güllə yağışı altında qorxmadan 8 yaralı yoldaşını xilas edib. Dəfələrlə sayca qeyri-bərabər döyüşlərə girəndə Əzizin gülərək iti qovan kimi qovacağıq deyib, qorxmazlığı və cəsarətilə əsgər yoldaşlarını da ruhlandırıb.  Vətən müharibəsində göstərdiyi xidmətlərə və şücaətə görə Şəhid Əziz Əzizov ölümündən sonra “Hərbi Xidmətlərə görə”, “Vətən uğrunda”, "Cəbrayılın, Füzulinin, Qubadlının, Laçının azad olunmasına görə" medalları ilə təltif edilib.  Martın 1-də doğum günü olan Əzizi ailəsi, qohumları, döyüş yoldaşları  məzarı başında yad edib, ruhuna dualar oxuyublar...  

Zaqatalada 63 yaşlı piyadanı maşın vurub. Hadisə Yevlax-Zaqatala-Gürcüstan sərhəd magistral yolunun 132-ci kilometrliyində, Zaqatala rayonu ərazisindən keçən hissəsində baş verib. 54 yaşlı Bakı şəhər sakini Azər  Abbasov idarə etdiyi "VAZ 21074" markalı minik avtomobili ilə Zaqatala şəhəri istiqamətində hərəkətdə olarkən piyada 63 yaşlı Əliheydər İslamovu vurub. Qəza zamanı müxtəlif dərəcəli bədən xəsarətləri alan Əliheydər İslamov Zaqatala Rayon Mərkəzi Xəstəxanasının reanimasiya şöbəsinə yerləşdirilib. Onun vəziyyətinin ağır olduğu bildirilir. Faktla bağlı araşdırma aparılır.

Zaqatala Rayon Polis Şöbəsinin Dövlət Yol Polisi Bölməsinin əməkdaşları təhlükəsizlik kəmərindən istifadə etməyən sürücülərin müəyyən edilməsi məqsədilə rayon ərazisində reyd keçiriblər.  Təhlükəsizlik tədbirləri zamanı kəmərdən istifadə etməyən sürücülər aşkarlanıb. Polis əməkdaşları onlarla profilaktiki söhbətlər aparıb. Diqqətə çatdırılıb ki, qəza zamanı təhlükəsizlik kəmərindən istifadə edilməsi sürücü və sərnişinlərin həyat və sağlamlığını əhəmiyyətli dərəcədə qoruyur. Bu səbəbdən hərəkətdə olan nəqliyyat vasitəsində olan şəxslərin təhlükəsizlik kəmərindən istifadə etmələrinin vacibliyi vurğulanıb. Keçirilən tədbirlər zamanı bu kimi qayda pozuntusuna yol verən 20 sürücü barəsində inzibati tənbeh tədbiri görülüb.

Balakən Rayon Olimpiya İdman Komplekində yeniyetmələr arasında üzgüçülük üzrə rayon turniri keçirilib. "5 mart Bədən Tərbiyəsi və İdman günü" ilə bağlı təşkil edilən turnirdə 16 yeniyetmə iştirak edib. 50 metr məsafə üzrə keçirilən yarışın yekun nəticələrinə görə Turan Paçalov birinci yerə, İrakli Rəhimov ikinci yerə, Fərid Hüseynov isə üçüncü yerə layiq görülüb. Yarışın keçirilməsində əsas məqsəd, yeniyetmələr arasında bacarıqlı üzgüçüləri üzə çıxarmaq və onların asudə vaxtının daha səmərəli təşkili ilə yanaşı, həm də rayonda bu idman növünə marağın artırılmasıdır.

Şamaxıda mavi yanacağın verilişində problem olan ərazilərdə lazımi işlər görülməklə qaz təminatı yaxşılaşdırılır. Rayonun Şəhriyar qəsəbəsində torpaqla təmasda olduğu üçün korroziya səbəbindən yaranmış qaz sızmalarının qarşısının alınması məqsədilə qəsəbənin qaz təchizatı şəbəkəsi yenidən qurulur. Azəriqaz İB nin Təmir Tikinti İdarəsi tərəfindən 9200 metrə yaxın müxtəlif diametrli qaz xətlərinin tikintisi başa çatdırılaraq istismara verilib, uzunluğu 1600 metr olan qaz xəttinin tikintisi isə tamamlanmaq üzrədir. Eyni zamanda ərazidəki mənzillərin sayğacları tikinti norma və qaydalarına uyğun yeni xəttin üzərinə qoşulub, mövcud qaz sızmalarının qarşısı alınıb. Qəsəbə ərazisində ümumilikdə 650 əhali abonentinin qaz təminatı yaxşılaşdırılacaq. Şamaxı Çuxuryurd qəsəbəsində isə kiçik diametrli borulardan istifadə olunduğu üçün qazın verilişində yaranan problemlər aradan qaldırılır.