Şəkinin yol problemi artıq illərdir ki, sakinləri təngə gətirib. Bu mövzu ilə bağlı bir çox sujetlər yayımlanıb, növbəti buraxılışlarımızda da toxunacağıq. Bu, öz yerində.. Amma bir də uzun illərdir təmir olunmayan daxili küçələr var. Hansı ki, kanalizasiya xətti çəkilişindən sonra onsuz da təmirsiz olan küçələr tamamilə bərbad hal alıb, keçilməz vəziyyətə düşüb. Belə küçələr həddindən çoxdur. Çəkiliş etdiyimiz Ziya Bünyadov və İzzət Həmidov küçələrinin timsalında mövcud vəziyyəti işıqlandırmağa çalışmışıq.  

   Şəkinin Ziya Bünyadov küçəsinin yolu bərbad vəziyyətdədir. Şəhid Vasif Həmidovun da evinin yerləşdiyi küçəyə su və kanalizasiya xətləri çəkildikdən sonra yolları daha çox dağılıb. Təəssüf ki, bura üz tutan hər kəs yayda toz duman, qışda isə palçıqlı küçədə hərəkət etmək məcburiyyətini yaşayır. Yoldakı çala-çuxurlar maşınların da burdan keçməsini mümkünsüz edir. Şəhid İzzət Həmidovun adını daşıyan küçədə də vəziyyət  ürəkaçan deyil. Hər gün bu yoldan ən az iki dəfə keçmək məcburiyyətində qalan azyaşlı uşaqlar problemi daha çox yaşayırlar. Sakinlər dəfələrlə aidiyyatı orqanlara müraciət etdiklərini, ancaq boş vədlər aldıqlarını bildirirlər. Məsələ ilə bağlı Şəki şəhər İcra Hakimiyyətinin Tikinti və Memarlıq şöbəsindən bildirildi ki,  hazırda bu cür ara küçələrin asfaltlanması gündəmdə deyil. Yalnız su-kanalizasiya layihəsi tam yekunlaşdıqdan sonra həmin ara keçələrin də asfaltlanmasına başlanacaq. Layihənin yubandığını və hələ daha 3 il davam edəcəyini nəzərə alsaq belə görünür, bərbad halda olan bu cür küçələrdə sakinlər bir müddət də yaşamağa davam edəcəklər. 

Qax rayonunun Oncallı kəndində, Oğuz qəbirstanlığında Sufi şerinin görkəmli nümayəndəsi, Türk dünyasının böyük şairi Yunus Əmrənin məzarı bu gün də qorunub saxlanılır. Bu yer bir ziyarətgah kimi ziyarətçiləri tərəfindən yad edilir.

Anadolu türkcəsində yazan Şeyx Yunus Əmrənin şeirlərinin dil xüsusiyyətləri Oğuz türklərinin məkanı olan Qax rayonunun Oncallı kəndində çox sevilirdi. Yunus Əmrə bir neçə nəfərlə Anadoludan səfərə çıxıb və Qaxda yaşayıb-yaratmağı qərara alıb. Elə burda da dəfn olunub. Oğuz qəbirstanlığında Yunus Əmrənin məzarı ilə yanaşı, həm də onun mürşidi Hacı Tapdığın qəbri  var.  Türkiyədən gələn mütəxəssizlər   o dövrün xəritəsinə baxmaqla, qəbrlərin ara məsafələri və yerdən hündürlüklərini də ölçərək məzarların dahi şəxsiyyətlərə aid olmalarını təsdiqləyib. Şeyxin məzarı ilə bağlı bir çox fərziyyələr iddia edilsə də bu qəbirstanlıqdakı Hacı Tapdığın məzarı bütün suallara aydınlıq gətirir. Ziyarətgaha hər il çoxlu sayda insan baş çəkir. Onların arasında xarici turistlər də yetərincədir. Onu da qeyd edək ki, ərazi daim dövlət nəzarətində saxlanılır, təmizlənir və qorunur.

Bu gündən etibarən, peyvəndin ikinci dozasının üzərindən 6 aydan çox vaxt keçmiş şəxslərin "Peyvənd sertifikatı" etibarsız sayılır.  Belə ki, buster doza, yəni 3-cü doza vaksini qəbul etməyən vətəndaşlar bir çox yerlərə daxil ola və xidmətlərdən istifadə edə bilməyəcəklər. Qadağanın tətbiq olunduğu günü gözləyənlər bu gün xəstəxanalarda sıxlıq yaradıb.

Yaşı 18-dən yuxarı bütün vətəndaşların  mehmanxanalar, iri ticarət mərkəzləri, kafe və restoranlar, ali və orta ixtisaas təhsili müəssisələrinə girişi yalnız 3-cü doza peyvəndlə mümkündür. Qərar sonuncu qəbul etdiyi dozadan 6 ay keçən şəxslərə də aiddir.   6 ay limiti tamam olmuyan, iki doza peyvənd olunan şəxslərsə bu cür obyektlərə daxil ola bilərlər. Qadağanın tətbiq olunduğu ilk gündən xəstəxanalara buster doza ilə bağlı sıxlıq yaşanır. Xəstəxanalarda yaşanan sıxlıq səbəbindən tədbirlər artırılıb. Mütəxəssislər son günlər sürətlə artan yoluxma hallarının qarşısının alınması, ağırlaşmaların sayının azalması üçün buster dozanı mütləq hesab edir. Belə ki, peyvənddən sonra bir müddət maksimuma çatan immunet səviyyəsi vaxt keçdikcə zəifləyir. Peyvəndin buster dozası immunitet reaksiyasını yenidən gücləndirməyi və bununla da peyvəndin effektivliyini artırmağı hədəfləyir. Onu da qeyd edək ki, ölkədə vurulan vaksinlərin ümumi sayı 12 390 636-dır. Buster doza üzrə vaksinasiya olunanlarsa 2 368 436 nəfərdir.