Şamaxı rayon Göylər kənd Folklor evi artıq  2-ci əsrdir ki, fəaliyyət göstərir.  Ancaq görkəmli binadan geriyə sadəcə xatirələr qalıb.  Bina o dərəcədə qəzalı vəziyyətdədir ki, üfürən olsa uçar. Və yaşanacaq təhlükənin fərqində olsalar da  hələ də bu binada çalışanlar var.

Göylər kənd sakinləri 300 nəfər tutumu olan folklor evində keçirilən çox sayda tədbirləri, məşhur müğənnilərin konsertlərini hələ unutmayıblar. Ancaq söhbət yaşlı nəsildən gedir. Gənclər üçün isə folklor evi bu gedişlə ancaq xarabaxalığı ilə yadda qalacaq. 2016-cı ildə baş vermiş zəlzələdən sonra onsuz da istismar müddətini başa vuran bina daha təhlükəli vəziyyətə düşüb. Binanın divarlarının bir hissəsi uçub,  qapı və pəncərələri dağılıb, tavan və döşəmələr çökmək üzrədir. Ən acınacaqlısı isə odur ki, qəzalı vəziyyətdə olan bina hələ də faəliyyət göstərir. Kənd kitabxanası və Göylər kənd Folklor evinin mədəniyyət işçiləri bu binada çalışır. Həmçinin sakinlər asudə vaxtını burada keçirir. Məsələ ilə bağlı həm folklor evinin işçiləri, həm də kənd sakinləri dəfələrlə aidiyyatı qurumlara müraciət edib. Ancaq nə işçiləri köçürən olub, nə də binaya bir əncam çəkən. Görünən odur ki, Göylər kənd sakinləri hələ bir müddət daha qəzalı folklor evindən istifadə etməli olacaqlar. Əlbəttə ki, bu müddət ərzində hər hansı bədbəxt hadisə baş verməsə. 

Bu il ərzində Qax rayonunun 7 kəndində əhalinin içməli suyla təminatının yaxşılaşdırılması üçün müvafiq işlərin görülməsi nəzərdə tutulub.  Hazırda rayonun Qaratala , Amannı və Ağyazı kəndlərində artezian quyularının qazıntısına başlanılıb. Həmin quyularda iş tamamlandıqdan sonra digər dörd kənddə Calayir, Şıxlar, Tasmalı və Güllük kəndlərində quyuların qazılmasına start veriləcək. Ümumilikdə Qax rayonunda iki subartezian və beş artezian quyusunun qazılması planlaşdırılır.

Şəkidə şəhər Uşaq incəsənət məktəbinin şagirdlərinin  "Şuşa ilinə" həsr olunan konserti baş tutub. Konsertdə yerli və xarici bəstəkarların əsərlərindən hazırlanmış 11 musiqi nömrəsi və "Vətənə qayıdış" adlı rəqs kompozisiyası təqdim olunub. Musiqi əsərlərinin seçilməsi zamanı üstünlük vətənpərvərlik motivlərinə verilib. Kifayət qədər uğurlu alınan konsert proqramı tamaşaçıların alqışlarını qazana bilib. Qeyd edək ki arxada qoyduğumuz il Şəki şəhər Uşaq incəsənət məktəbi üçün olduqca uğurlu alınıb. Belə ki, 2021 ci il ərzində müxtəlif yarışma və müsabiqələrdə şagirdlər tərəfindən 1 kubok, 1 Grand Pri, 64 medal və 64 diplom qazanılıb.

Koronavirus infeksiyasının yayılmasının qarşısının alınması, bu sahədə aparılan tədbirlərin effektivliyinin yüksəldilməsi məqsədilə Zaqatala rayonunda tibbi-profilaktik və dezinfeksiyaedici tədbirlər davam etdirilir. Bu gün Zaqatala şəhərində növbəti kütləvi dezinfeksiya işləri həyata keçirilib. Şəhərin prospekt və küçələri, yeraltı keçid, yaşayış məhəllələrinin əraziləri, çoxmənzilli binaların giriş blokları və pilləkənlər suya xüsusi dezinfeksiyaedici maddə qatılmaqla yuyulub, satış mərkəzlərində, bankomatların yerləşdiyi ərazilərdə təmizlik və dezinfeksiya işləri görülüb. Eyni zamanda, mobil qruplar tərəfindən karantin rejimi ilə əlaqədar müəyyənləşdirilmiş qaydalara əməl olunmasını təmin etmək üçün ictimai nəqliyyatda, ticarət və ictimai iaşə obyektlərində, əhalinin sıx olduğu məkanlarda reydlər keçirilir, vətəndaşlar arasında maarifləndirici təbliğat işləri aparılır. Reydlər zamanı vətəndaşlara pandemiyaya qarşı mübarizədə qoruyucu vasitələrdən, xüsusilə tibbi maskalardan istifadə edilməsinin, gigiyena qaydalarına riayət olunmasının, sosial məsafənin saxlanılmasının, həmçinin, COVID-19 infeksiyasına qarşı peyvənd olunmanın vacibliyi ətraflı izah olunur, tövsiyələr verilir.

Şamaxının Mədrəsə qəsəbəsi və Kərkənc kəndində abadlıq və quruculuq işləri aparılır. Hər iki yaşayış məntəqəsində elektrik təsərrüfatı yenilənir. Rayon İcra Hakimiyyətinin başçısı və Milli Məclisin deputatı Tamam Cəfərova aparılan işlərlə tanış olub, sakinlərin problemlərini dinləyiblər.  İndiyədək Mədrəsə qəsəbəsində ümumilikdə 603 ədəd 0.4 kV-luq, 50 ədəd 10 kV-luq elektrik dirəyi yenilənib, 5000 metr SİP kabel çəkilib və 5 transfarmator məntəqəsinin yeri hazırlanıb. Bu da qəsəbənin fasiləsiz və dayanıqlı elektrik enerjisi ilə təminatında müstəsna əhəmiyyət kəsb edir. Kərkənc kəndində isə 80 ədəd 0.4 kV-luq dirək yenilənib, 2 transfarmator məntəqəsinin yeri hazırlanıb. Hazırda yenilənmə işləri sürətlə davam etdirilir.