Yolun ən çox yararsız hala düşən ərazisi Şəkidən Zaqatalaya qədər olan 78 kilometrlik hissəsidir. Bu hissədə çox sayda kəndlər yerləşir. Hər bir kənd üçün isə yolun çox böyük əhəmiyyəti var. Yerli sakinlər bildirirlər ki, Respublika əhəmiyyətli yolun sözügedən hissələrində dərin çalalar əmələ gəldiyindən nəqliyyat vasitələrinin hərəkətində çətinliklər yaranır. Həmçinin sakinlər təmirsiz yolun qəza şəraiti də yaratdığını deyirlər. Eyni zamanda yolda nə insanlar nə də ki, mal-qara üçün heç bir keçid yoxdur. Bu da öz növbəsində həm yolu keçən insanlar həm də heyvanlar üçün təhlükə yaradır və qəza olma ehtimalını birə beş artırır. Yolda vaxtaşırı xırda təmir işləri aparılsa da, görülən işlər müvəqqəti xarakter daşıyır. Çalalar yamanmsa da hər yağış yağdıqdan sonra yenidən açılır. Sürücülər çox zaman Şəki-Qax yolu ilə getməyə məcbur olduqlarını və bunun da əlavə vaxt apardığını deyirlər. Azərbaycan Avtomobil Yolları Dövlət Agentliyindən məsələ ilə bağlı bildirildi ki, Yevlax-Zaqatala-Gürcüstan ilə dövlət sərhədi magistral yolunun əsaslı təmir olunması üçün layihə hazırlanıb və təqdim edilib. Odur ki, yoldan mütəmati olaraq istifadə edən sürücülər və burda yaşayan sakinlər bir müddət daha dözməli olacaqlar.

Zaqatalada “İnkliuziv iqtisadi modelin inkişafı, əlilliyi olan şəxslərin əmək bazarında iştirakçılığının artırılması”na həsr olunmuş tədbir keçirilib. "İstedadlı Əlillər” ictimai birliyi tərəfindən Azərbaycan Respublikası Qeyri-Hökumət təşkilatlarına Dövlət dəstəyi Agentliyinin maaliyyə dəstəyi ilə təşkil edilən tədbirə Dövlət Qurumunun nümayəndələri və əlilliyi olan şəxslər qatılıb. Çıxış edənlər iştirakçılara layihə barədə geniş məlumat verib. Bildirilib ki, layihənin əsas məqsədi əhalinin aztəminatlı sosial qruplarından olan əlillərin sosial müdafiəsinin daha da gücləndirilməsi və bu istiqamətində həyata keçirilən özünəməşğulluq proqramlarında əlil vətəndaşların iştirakının artırılmasıdır. Tədbirdə həmçinin özünəməşğulluq proqramının əhəmiyyəti, proqrama müraciət etmə və iştirak qaydaları, ailə təsərrüfatı və ya kiçik biznesin yaradılması üçün təmin edilən dəstəklər barədə məlumat verilib. Sonda iştirakçıların sual və təklifləri dinlənilib.