Artiq 4 gündür ki, Qobustanın Acıdərə kəndinə yağan yağışlar  bir sıra çətinliklər yaradıb. Dağlardan gələn sel-suları nəticəsində avtomobil yolu suyun altında qalaraq yarasiz vəziyyətdə düşüb. Sakinlərin rayon mərkəzinə gediş-gəlişi çətinləşib. Yolların palçıq qatıyla örtülməsi avtomobillərin hərəkətini məhdudlaşdırıb. Sakinlər rayon mərkəzinə getmək üçün trkatorlardan istifadə edirlər. Sel-suları sakinlərə məxsus yaşayış evlərinə , fərdi təsərrüfatlara və fermalara da ziyan vurub. Ərazidə torpaq sürüşməsi də baş verib. Sakinlər hər gün davam edən sürüşmənin evlərə doğru hərəkət etdiyini deyir. Qeyd edək ki,  bölgədə qeyri sabit hava şəraiti davam edir.

Şəkinin Baş Küngüt kənd sakinləri mavi yanacağının təzyiqinin az olmasından şikayətçidirlər.  Kəndə verilən qazın qışda qış normasına, yazda isə yaz normasına uyğun olmadığını iddia edirlər. Xüsusilə də qeyri-sabit hava şəraitinin hökm sürdüyü son günlərdə təbii qazın çox zəif olması səbəbindən sakinlər sinmək üçün elektirik enerjisindən istifadə etməyə məcbur qalıblar. Nəticədə ikiqat ziyana düşüblər. Kənd sakinləri qonşu kəndlərdə bu cür problemin mövcud olmadığını deyirlər. Sakinlər məsələ ilə bağlı dəfələrlə aidiyyatı quruma müraciət etdiklərini lakin problemin həll olunmadığını deyirlər. Məsələ ilə bağlı Zaqatala Regional Qaz İstismarı İdarəsindən isə problemlə bağlı araşdırma aparılacağı bildirildi. Qeyd edək ki, Baş Küngüt kəndinə təbii qaz 3-4 il öncə çəkilib. Kənd sakinləri mövcud problemin bu ildən yaşandığını qeyd edirlər. 

Şəkidə ev yanıb. Hadisə rayonun Zunud kəndində baş verib. Ümumi sahəsi 180 m² olan ikimərtəbəli 4 otaq və 2 aynabənddən ibarət evin yanar konstruksiyaları və içərisindəki ev əşyaları yanıb. Yanğın zamanı evin içərisində həcmi 50 litr olan 1 ədəd məişət qaz balonu yanğınsöndürənlər tərəfindən təhlükəsiz əraziyə çıxarılıb. Bitişik köməkçi tikili yanğından mühafizə olunub. Yanğın yanğından mühafizə bölmələri tərəfindən söndürülüb.

Zaqatalada motosiklet yük maşınına çırpılıb. Hadisə günorta saatlarında rayonun Yuxarı Tala kəndi ərazisində baş verib. Zaqatala şəhər sakini, 24 yaşlı Anar Musayevin idarə etdiyi motpsiklet eyni istiqamətdə hərəkət edən Yuxarı Tala kənd sakini İsmayıl Ağayevin idarə etdiyi “Ford” markalı yük maşınına arxadan çırpılıb. Nəticədə müxtəlif dərəcəli bədən xəsarətləri alan Anar Musayev və İsmayıl Ağayev Zaqatala Rayon Mərkəzi Xəstəxanasına aparılıblar. İsmayıl Ağayevin xəsarəti yüngül olduğundan ona ilkin yardım göstərildikdən sonra evə buraxılıb. Anar Musayev isə qarın boşluğuna qan sızması dioqnozu ilə əməliyyata qaldırılıb.Faktla bağlı Zaqatala rayon Polis Şöbəsində araşdırma aparılır.