Fındıqçılıq Şəki-Zaqatala bölgəsi üçün ən perspektivli kənd təsərrüfatı sahələrindəndir. Bölgə əhalisinin böyük əksəriyyətinin əsas gəliri də elə fındıqçılığa bağlıdır. Bu baxımdan, mülayim keçən qışın ardından erkən yazın qarlı, şaxtalı keçməsi əksər fermerləri ciddi narahat edib. Mütəxəssislərsə hər hansı bir narahçılığa əsas olmadığını bildirir. İqlim və Hava şəraiti ilə yanaşı, məhsuldarlığa birbaşa təsir göstərən amillərdən biri də fındıq bağlarında düzgün və vaxtı-vaxtında aqrotexniki tədbirlərin görülməsidir. Yerli iqlim şəraitinə uyğun və daha məhsuldar növlərin müəyyənləşdirilməsi üçün isə dayaq məntəqəsində hər il seleksiya işləri aparılır. Vaxtsız yağan qar hər nə qədər məhsuldarlığa təsir etməsə də bu fermerləri tam arxayın etmir. Məhsulun necə olacağı hələ yazın sonunda və yay boyu davam edəcək hava şəraitindən birbaşa asılıdır. İndi fermerlərin tək diləyi  dolu yağmaması və quraqlıq olmamasıdır.

Zərifə Əliyevanın anadan olmasının 99-cu ildönümü münasibəti ilə Zaqatala rayonunda elmi-praktiki konfrans keçirilib. Rayonun fəal qadınları və ziyalıların iştirak etdiyi konfransda Zərifə Əliyevanın şərəfli ömür yolundan ətraflı söhbət açılıb, onun peşəkar həkim olmaqla yanaşı, həm də ictimai xadim, millətinə, vətəninə, peşəsinə, ailəsinə bağlı bir ziyalı, xeyirxah əməllər sahibi kimi yaddaşlara həkk olunduğu vurğulanıb. Akademik Zərifə Əliyevanın adını daşıyan liseydə təşkil edilən tədbirdə isə əvvəlcə görkəmli oftalmoloqa həsr edilən foto stendə baxış keçirilib. Ardınca Zərifə Əliyevanın həyat və yaradıcılığından bəhs edən film nümayiş etdirilib. Tədbir məktəblilərin ifasında rəngarəng çıxışlarla davam edib.

Şəkidə  bir ailənin 4 üzvü yol qəzasına düşüb. Hadisə axşam saatlarında Şəki-Qax yolunun İnçə kənd ərazisindən keçən hissədə qeydə alınıb. Şəki şəhər İkinci Biləcik kənd sakini 36 yaşlı Elvin Süleymanov  VAZ 2107 markalı avtomobillə hərkətdə olarkən idarəetməni itirib. Nəticədə avtomobil yoldan çıxaraq aşıb. Nəticədə sürücü Elvin Süleymanov və avtomobildə olan sürücünün həyat yoldaşı və iki uşağı müxtəlif dərəcəli bədən xəsarətləri alıblar. Onlar dərhal Şəki RMX-na çatdırılıb. Sürücü Elvin Süleymanovun vəziyyətinin orta-ağır , ailə üzvlərinin vəziyyətinin isə yüngül olduğu bildirilir. Faktla bağlı araşdırma aparılır.