Şəkinin Cəfərabad kəndində Vətən müharibəsinin şəhidi Ruslan Sadıqovun anım günü qeyd edilib. Ailəsi, yaxınları, qazilər şəhidin qəbri ziyarət edib, ruhuna dualar oxuyub. Daxili Qoşunların "Yarasa" xüsusi təyinatlı dəstəsinin atəş təminatı snayper yarım qrupunun komandiri Ruslan Sadıqov 2020-ci ilin sentyabrında erməni silahlı birləşmələrinin təxribatlarının qarşısının alınması üçün başladılan əks hücum əməliyyatlarının ilk günlərindən Vətən müharibəsində iştirak edib. Füzulidən Şuşaya qədər şanlı döyüş yolu keçib, düşmənin onlarla canlı qüvvəsini və texnikasını məhv edib. Dünya hərb tarixinə düşən Şuşanın azad edilməsi əməliyyatında iştirak edən baş çavuş Ruslan Sadıqov düşmənə qan udduraraq öz qəhrəmanlığı ilə tarixə düşüb. Şəhidin 3 övladı yadigar qalıb.

Vətən müharibəsi şəhidi Fərid İzzətliyə həsr olunan "Cənab Leytenant " sənədli filminin təqdimat mərasimi keçirilib. Mərasimdə şəhər rəhbərliyi, mədəniyyət və incəsənət xadimləri, müharibə iştirakçıları, şəhid ailələri və ictimaiyyət nümayəndələri iştirak edib. Qeyd edək ki, filmdə şəhid Fərid İzzətlinin ömür səhifələri vərəqlənib, onun uşaqlıq dövrü, məktəb illəri, əldə etdiyi uğurlar, nümunəvi xidməti və Vıtın müharibəsində göstərdiyi şücaətlər geniş yer alıb.

Artıq ikinci ildir ki, uğurla təşkil olunan, Müzəffər Ali Baş Komandan İlham Əliyevin yenilməz iradəsi, xalqımızın birliyi və ordumuzun gücü hesabına qazanılmış tarixi Qələbəyə həsr edilən “Xüsusi Təyinatlı Gənclik” düşərgəsi gənclərin hərbi-fiziki hazırlığını yüksəltməyə, onları idmana və sağlam həyat tərzinə təşviq etməyə, vətənpərvərlik və həmrəylik hissinin daha da gücləndirməsinə öz töhfəsini verir. “Zəfərimiz” şüarı altında açıq hava şəraitində 7 komanda şəklində ümumilikdə 120 gənc iştirak edir. Düşərgə müddətində gənclərə simulyativ hərbi əməliyyat proqramı əsasında Xüsusi Təyinatlı Qüvvələrin ehtiyatda olan zabit və gizir heyəti tərəfindən topoqrafiya, dağçılıq, mühəndis-istehkam, kəşfiyyat, sıra hazırlığı, ilkin tibbi hazırlıq, kütləvi qırğın silahlarından müdafiə hazırlığı, ekstremal şəraitdə həyatda qala bilmə, silahla davranış, atəş hazırlığı, əlbəyaxa döyüş üzrə praktiki təlimlər keçiriləcək. Həmçinin gənclər üçün hərbi idman oyunları, təbiətə ekskursiyalar və asudə vaxtda müxtəlif əyləncələrin də keçirilməsi nəzərdə tutulub. Qeyd edək ki, 5 gün davam edəcək düşərgənin sonunda qaliblər mükafatlandırılacaq. 

İsmayıllıda avtomobil iki piyadanı vurub. Rayonunun Topçu kəndi ərazisində Qurbanəfəndi kənd sakini Dağlar Ələsgərov idarə etdiyi “VAZ-2101” markalı avtomobillə yolu keçən Bakı şəhər sakinləri Ləman Dadaşova və Dilarə Hacıyevanı vurub. Nəticədə piyada Ləman Dadaşova hadisə yerində ölüb, Dilarə Hacıyeva isə xəstəxanaya yerləşdirilib. Faktla bağlı DİN Baş İstintaq və Təhqiqat İdarəsi araşdırma aparır.

Zaqatalanın mərkəzindən 22 kilometr aralıda yerləşən ən ucqar kəndlərdən biri olan Sabunçu kəndinə getmək üçün 4 kilometrədək yolu çaylaq, daşlı ərazidən, və bir neçə çay yatağından keçməli olduq. Çətin, keçilməz relyefə məxsus dağlıq ərazidə yerləşən digər ucqar kəndlər kimi bu kəndin də ən ciddi problemi elə yolla bağlıdır. Çayda suyun səviyyəsi artdığı təqdirdə kəndin mərkəzlə əlaqəsi bəzən günlərlə kəsilir. Digər vaxtlarda isə kəndə yalnız xüsusi nəqliyyat vasitlərinin köməyi ilə getmək mümkündür. Əsrarəngiz gözəlliyi ilə göz oxşayan Sabunçuda hazırda 45-ə dək təsərrüfat və 200 nəfərə yaxın əhali yaşayır. Kənddə bir ümumi orta məktəb, kənd klubu, məscid və bir tibb bacısının çalışdığı tibb məntəqəsi fəaliyyət göstərir. Ucqar ərazidə yerləşməsinə baxmayaraq, Sabunçu kəndi elektrik enerjisi, rabitə və internet kimi vacib infrastrukturla təmin edilib. Ən qədim yaşayış məskənlərindən biri olan bu kəndin əhalisinin böyük qismi ötən əsrin ortalarında,  çətin relyeflinin olması və sel, daşqın kimi təhlükələrə görə aran ərazilərə köçürülüb. Əzgilli, Ələsgər, Qalal, Qas kimi Sabunçu kəndinin də təbiətinin gözəlliyi bu ərazidə yaşıl turizmin yaradılması üçün olduqca əlverişlidir. Yeganə çatışmayan cəhət isə, yolla bağlıdır. Ucqun, daşqın, sel kimi təbii təhlükələr bu ərazidə normal yol çəkilişini mümkünsüz edir. Lakin, bu kəndlərdə yaşayan sakinlər əmindirlər ki, mütəxxəsislər onların bu yol problemi üçündə hansısa altenativ həll yolu tapacaq.

Bir vaxtlar insanlar arasında ən populyar ünsiyyət vasitəsi hesab olunan ev telefonları müassir tələblərə cavab vermədiyindən insanlar arasında getdikcə öz aktuallığını itirib. Artıq yaşlı nəsil də, müasir tələblərə uyğunlaşan əlaqə vasitələrindən istifadə edirlər. Səbəbi isə, evdə olmayanda belə istədikləri anda hərkəslə ünsiyyət qura bilmələridir. Amma sakinlərin heç də hamısı belə düşünmür. Ev telefonu ilə mütəmadi danışanlar da var. Mütəxəssislər ev telefonlarına təlabatın əvvəlki illərlə müqayisədə xeyli azaldığını qeyd edir. Səbəb müasir texnalogiyların inkişafı və bu bazarda sakinlərə daha geniş xidmətlər təklif edən şirkətlərin artmasıdır. Hətta bir neçə ilə sabit telefon xəttləri yerini sürətli internet, televiziya kanalları ötürmə imkanına malik fiberoptik kabellərə verəcək. Tarifin artırılması əhaliyə bu istiqamətdə göstərilən xidmətlərin yaxşılaşdırılması, dünyada gedən dəyişiklilər, internet vasitəsilə əlaqələrin artması fonunda labüd olub. Həmçinin sözügedən sahənin qarşıdakı iki il ərzində tamamilə yenilənməsi nəzərdə tutulur. Xatırladaq ki, Tarif Şurasının qərarı ilə Azərbaycanda noyabrın 1-dən sabit şəbəkə telefonlarından istifadəyə görə aylıq abunə haqqının əhali üçün 2 manat 50 qəpikdən 3 manat 50 qəpiyə manata çatdırılıb. Şəhərlərarası telefon danışıqları üzrə tarif isə 5 qəpikdən 3 qəpiyə endirilib.

Bir neçə gündür respublika ərazisinə hakim olan soyuq hava, nəhayət, sərt üzünü göstərdi. Şamaxıya ilk qar yağdı. Ən çox qar rayonun Nağaraxana,Qızmeydan, Talışnuru, Ərçiman, Pirbəhli, və Dəmirçi kəndlərinə düşüb. Qışın vaxtından əvvəl gəlməsinə sakinlər hazır olmasa da, bu təbiət hadisəsi rayona gələn turistlərdə xoş ovqat yaradıb. Kənd sakinlərinin sözlərinə görə, qar əkin sahəsinə müsbət təsir edəcək. Yağan qar məhsuldarlıqla yanaşı, taxıl sahələrində yuva quran zərərvercilərin kütləvi qırılmasına da səbəb olacaq. Dağlıq ərazilərdə yerləşən yaşayış məskənlərinə 5-10 santimetrdən artıq qar yağıb. Qar səbəbindən yollarda hər hansı bir problem yaşanmayıb. Yol idarəsinin əməkdaşları gecə saatlarından vəziyyəti nəzarətdə saxlayıb. Çuxuryurd-Nağaraxana-Pirqulu istiqamətində yol açıq olsa da, Dəmirçi- Lahıc istiqamətində buzlanma və qatı duman müşahidə olunur. Gediş-gəlişdə heç bir problem yaşanmasa da qışa hazırlıqsız olan sürücülərə gecə və səhər saatlarında yola çıxmamaları tövsiyə olunur.

8 Noyabr – Zəfər Günü Şəki rayonunda da təntənəli şəkildə qeyd edilib. İlk öncə rayon icra hakimiyyətinin, hüquq-mühafizə orqanlarının, ictimaiyyətin nümayəndələri Şəki şəhərindəki Şəhidlər xiyabanına gələrək ərazi bütövlüyümüz uğrunda canlarından keçən qəhrəman Vətən oğullarının məzarını ziyarət ediblər. Tədbir sonra Heydər Əliyev Mərkəzinin önündə konsert proqramı ilə davam edib. Proqramda vətənpərvərlik, qələbə ruhlu mahnılar səsləndirilib, rəqs nümunələri nümayiş olunub, flaşmob göstərilib. Konsertin sonunda havaya Azərbaycan bayrağının rənglərini təcəssüm etdirən şarlar buraxılıb. Zaqatalada da Zəfər günü münasibətilə keçirilən tədbirdən öncə rayon rəsmiləri ulu öndər Heydər Əliyevin abidəsini, eləcə də ərazi bütövlüyümüz uğrunda canlarından keçmiş igid Vətən oğullarının məzarını ziyarət edib, şəhidlərin xatirəsini ehtiramla yad ediblər. Ardınca Zəfər gününə həsr edilən gənclərin fləşmobu maraqla qarşılanıb. Daha sonra tədbir Heydər Əliyev Mərkəzində rəngarəng bayram konserti ilə davam edib. Bayram tədbirində şanlı qəlbmizə həsr edilən film nümayiş edilib. Rayon İncəsənət ustalarının ifaları,şux rəqslər iştirakçılarda xoş bayram əhval ruhiyyəsi yaradıb. Şamaxıda öncə iştirakçılar Ulu öndər Heydər Əliyevin, ərazi bütövlüyümüz uğrunda şəhid olmuş qəhrəman Vətən oğullarının xatirəsini ehtiramla yad ediblər. Daha sonra Şamaxı Mədəniyyət Mərkəzində təşkil olunmuş tədbirdə çıxış edənlər Vətən müharibəsinin tariximizin şanlı səhifəsi kimi gələcək nəsillərə örnək göstəriləcəyini bildirib, dövlətimiz tərəfindən şəhid ailələri, müharibə əlilləri və hərbi qulluqçulara göstərilən diqqət və qayğıdan danışıblar.Tədbir mədəniyyət işçilərinin ifasında möhtəşəm konsert proqramı ilə davam edib. Lənkəranda şəhər Heydər Əliyev Mərkəzinin, Gənclərin İnkişaf və Karyera Mərkəzinin birgə təşkilatçılığı və Lənkəran-Astara Regional Təhsil İdarəsinin dəstəyi ilə "Zəfərin Mübarək Azərbaycan" adlı ədəbi-bədii kompozisiyalı tədbir keçirilib. Çıxış edənlər vurğulayıb ki, Azərbaycan Ordusu işğalçı ermənistanın 30 il ərzində qurduğu silahlı qüvvələri darmadağın edərək, milli birlik və döyüşçülərimizin ruh yüksəkliyi sayəsində böyük Zəfərə imza atdı. Vətən müharibəsi dövründə hər bir vətəndaşımızın həqiqətən də bir yumruq kimi eyni amal uğrunda birləşməsi bizi qalib ölkəyə çevirdi. Tədbir məktəblilərin ifasında Zəfər Gününə həsr olunmuş ədəbi-bədii kompozisiya ilə başa çatıb. Respublikanın hər yerində olduğu kimi Neftçala rayonunda Zəfər Günü böyük coşqu ilə qeyd edilib. İlk olaraq ulu öndər Heydər Əliyevin şəhərin mərkəzində ucaldılan abidəsi ziyarət olunub, ruhuna ehtiram bildirilib. Sonra Heydər Əliyev Mərkəzində sərgiyə baxış keçirilib. Ardınca Zəfər Gününə həsr olunan konsertə start verilib. Çıxışlarda qeyd olunub ki, Vətən müharibısində qazanılan böyük Zəfər Azərbaycan tarixinin ən şanlı səhifələrindən biridir. Sonra incəsənət ustalarının ifasında vətənpərvər ruhda mahnılar səsləndirilib. Salyan rayonunda da "8 Noyabr- Zəfər Günü”nə həsr olunan silsilə tədbirlər səhər saatlarından başlayıb. Tədbir iştirakçıları ilk olaraq Heydər Əliyev Mərkəzinin foyesində Zəfər tariximizə həsr olunan rəsm sərgisi ilə tanış olublar. Sonra Vətən müharibəsinin iştirakçısı və Qəhrəmanı Zaur Hüseynov Qarabağın tacı olan Şuşanın qəhrəmanlıqla alınmasından söz açıb, Şuşanın azad edilməsinin Azərbaycan hərb tarixinin ən yaddaqalan və şanlı səhifələrindən biri olduğunu vurğulayıb. Tədbirdə Mədəniyyət Mərkəzinin və Uşaq İncəsənət Məktəbinin kollektivi vətənpərvərlik və qələbə ab-havalı musiqilər səsləndirib. Sonda Əməkdar artist Aybəniz Haşımova və rəhbərlik etdiyi Sənət Akademiyasının yetirmələri tamaşaçılara möhtəşəm anlar yaşadıb.