Oğuzda meşəlik ərazidə meyit tapılıb. Rayonun Mollalı kəndindəki meşəlik ərazidə 33 yaşlı Toğrul Kərimovun meyitinin aşkarlanması barədə polisə məlumat daxil olub. İlkin araşdırma zamanı Kərimovu 3 gün əvvəl odlu silahla öldürüb, torpağa basdıran şəxsin 31 yaşlı, əvvəllər məhkum olunmuş Pərvin Məmmədov olduğu müəyyənləşib. O, könüllü şəkildə ərazi polis orqanına gələrək təslim olub. Faktla bağlı araşdırma aparılır.

Şamaxıda  iki qadın bıçaqlanıb. Rayon sakinləri olan 26 yaşlı Elmira və 23 yaşlı Günel Babayevalar kəsilmiş-deşilmiş xəsarətlərlə xəstəxanaya yerləşdirilib. Hazırda müalicələri reanimasiya şöbəsində davam etdirilir. Bacılara qəsd edən şəxsin kimliyi artıq müəyyənləşdirilib. Yaralılardan biri, Elmira Babayevanın əri, 28 yaşlı Novruz Babayev cinayəti törətməkdə şübhəli şəxs qismində saxlanılıb. Hadisənin təfərrüatı barədə isə heç bir açıqlama verilməyib. Faktla bağlı araşdırma aparılır.

Zaqatala Rayon Polis Şöbəsinin əməkdaşları tərəfindən narkotik vasitələrin qanunsuz dövriyyəsinə qarşı əməliyyat keçirilib. Daxil olmuş əməliyyat məlumatı əsasında keçirilən tədbir zamanı üzərində külli miqdarda narkotik vasitə daşıyan Gəncə şəhər sakini Vidadi Məmmədov şübhəli şəxs qismində saxlanılıb. Şəxsi axtarış zamanı ondan 5 kiloqramdan artıq marixuana aşkar edilərək götürülüb. Saxlanılan şəxs ifadəsində həmin narkotik vasitəni Gəncə şəhərindən Zaqatalaya satmaq məqsədilə gətirdiyini bildirib. Faktla bağlı cinayət işi başlanılıb, əməliyyat-istintaq tədbirləri davam etdirilər.

\"Yurdumuzu qarış -qarış gəzək\" layihəsi ill tanınan Aktivist rəssamlar qrupu yeni tərkibdə “Dünyanı sənət xilas edəcək”adlı layihəyə başlayıblar. Aktivst Rəssamlar yurdumuzun müxtəlif bölgələrini gəzərək canlı rəsmlər çəkir, yerli əhalidə sənətə olan marağı yenidən alovlandırırlar. Layihənin keçirilməsində məqsəd həm də yurdumuzu tanımaq,  sərgilər və festivallarda çəkilən rəsmləri nümayiş etdirməkdir. Rəssamların ilk səfəri Şamaxıya olub. Təbiətin  gözəlliklərini ağ kətanda müxtəlif rəng çalarları yaradaraq ortaya çıxaran rəssamlar yerli əhalinin də marağını cəlb edib.

Yaponiyalı sərmayədarlar ölkəmizə səfər çərçivəsində Şəki şəhərində də olublar.  Yaponiyalı qonaqlar əvvəlcə şəhərin qədim tarixi hissəsini - “Yuxarı Baş” Milli Tarix-Memarlıq Qoruğunu gəziblər. Azərbaycan memarlığının nadir incilərindən olan Şəki Xan Sarayı, “Yuxarı Karvansaray” mehmanxana kompleksi və digər tarixi abidələr barədə qonaqlara ətraflı məlumat verilib. Şəki ilə tanışlıq qonaqlarda böyük maraq doğurub. Bölgəyə səfərləri çərçivəsində yaponiyalı sərmayədarlar  Şəki və Zaqatala rayonlarında fəaliyyət göstərən tütünqurutma müəssisələri ilə də tanış olublar. 

“Aztelekom” MMC Zaqatala rayonunda 7036 ev təsərrüfatına GPON texnologiyası ilə yüksəksürətli internetə qoşulma imkanı yaradıb. Hazırda 4746 abunəçi müvafiq xidmətlərdən yararlanır. Yeni GPON texnologiyasının tətbiqi ilə abunəçilərə daha sürətli internet paketləri təklif olunur. Xidmət haqqı seçilmiş tarifdən və müştəri tələbatından asılı olaraq 18 AZN-dən 54 AZN-dək dəyişir. Qeyd edək ki, müasir texnologiyaların tətbiqi istiqamətində Rəqəmsal İnkişaf və Nəqliyyat Nazirliyinin həyata keçirdiyi “Onlayn Azərbaycan” layihəsi çərçivəsində ölkənin digər bölgələrinin də yüksəksürətli internetlə təmin edilməsi üçün müvafiq işlər planlı şəkildə davam etdirilir. 2023-cü ilin 8 ayı ərzində 491 min ev təsərrüfatının genişzolaqlı internetə çıxışı təmin edilib. Ümumilikdə isə 1,3 milyondan çox ev təsərrüfatı üçün genişzolaqlı internetə qoşulma imkanı yaradılıb. Bu, ölkədə mövcud ev təsərrüfatlarının 49%-ni təşkil edir. Cari ilin sonuna kimi göstəricinin 55%-ə çatdırılması nəzərdə tutulur.

Qeyri-Sabit hava şəraiti Şəkidə çaylarda sel təhlükəsini artırıb. Bu cür çaylardan biri də Şin çayıdır. Yağan şiddətli yağışlar nəticəsində Şin çayında suyun səviyyəsi artıb. Nəticədə çayda daşqınlar meydana gəlib. Daşın sel suları Şəkinin Babaratma kəndində ciddi fəsadlar törədib. Belə ki, kənd ərazisində bir neçə yol lil qatı və sel sularıyla örtülüb. Hazırda sakinlər çox çətinliklə hərəkət edirlər. Əsasən traktor və digər vasitələrdən istifadə olunur. Eyni zamanda 10-a yaxın ev, sakinlərin tütün və əkin sahələri 1 metrə yaxın hündürlüyə çatan lil qatının altında qalıb. Eyni zamanda kənd sakinlərinin ev heyvanlarına da ziyanlıq dəyib. Ev quşları və digər ev heyvanları lil qatının altında qalıb. Sakinlər əksər heyvanları çıxarsalar da, tələf olanlar da var. Kənd sakinləri aidiyyatı qurumların onlara köməklik etmələrini xahiş edirlər.

Ötən gün axşam saatlarından başlayaraq Zaqatala və Balakən rayonları ərazisində hava yenidən kəskin pisləşib, güclü külək əsib və rayonlara leysan yağıb. Güclü külək və leysan daha çox Zaqatala rayon ərazisində müşahidə olunub. Təbii fəlakət nəticəsində rayon mərkəzində, rayonun dağ ətayi kəndləri olan Yuxarı Çardağlar, Car, Axaxdərə, Mazıx, Qəbizdərə və rayon mərkəzinə yaxın Göyəm, Aşağı Tala, Yuxarı Tala kəndlərinin inzibati ərazilərində ağaclar yıxılıb, elektrik naqilləri qrılıb. Gecə saatlarından rayonun demək olar ki, 80 faiz ərazisində elektrik enerjisinin verilməsində fasilə yaranıb. Leysan səbəbindən Tala, Katex, Balakən və digər çaylarda suyun səviyyəsi hədən artıq qalxıb, çaylardan qısa müddətli sel keçib. Yuxarı Çardaqlar, Car, Axaxdərə, Mazıx, Qəbizdərə, Yuxarı Tala, Göyəm və Aşağı Tala kəndlərində bəzi sakinlərin həyətyanı sahəsinə və evlərinin birinci mərtəbəsinə yağış suları dolub. Əkin sahələrinə, həyətyanı sahəsindəki bostan-tərəvəzə və meyvə ağaclarına ciddi ziyan dəyib. Hazırda müvafiq idarə və təşkilat nümayəndələri əraziyə ezam edilib, təmir bərpa işləri aparır, dəymiş ziyanın miqyası dəqiqləşdirilir.

Şəkidə 2022-2023-cü ilin yekunlarına əsasən rayon üzrə 600-dən yuxarı bal toplayaraq ali məktəblərə qəbul olan məzunlar və respublika fənn olimpiadası, müsabiqəsi və digər yarışların qalib olmuş şagirdlərlə görüş keçirilib. Tədbirdə Şəki şəhər İcra Hakimiyyətinin başçısı, Şəki-Zaqatal Regional Təhsil İdarəsinin müdiri, təhsil işçiləri, qazilər iştirak edib. Çıxış edənlər yüksək nəticə göstərmiş tələbə və şagirdləri təbrik edib, daha da böyük uğurlar arzulayıb. Daha sonra yüksək bal toplamış məzunlar və təhsil aldığı məktəbdə uğurlar ilə fərqlənmiş şagirdlər təltif ediliblər. Tədbir bədii hissə ilə davam edib.

Gecə saatlarında başlayan leysan yağışlar şimal-qərb bölgəsində bir sıra fəsadlar törədib. Təbii fəlakət nəticəsində həm şəhərlərdə həm də kəndlərdə infrostruktura, kənd təsərrüfatına və bir sıra diğər sahələrə ciddi ziyanlıq dəyib.

Balakəndə güclü külək səbəbindən Heydər Əliyev prospektində beşmərtəbəli çoxmənzilli yaşayış binasının dam örtüyünün bir hissəsi uçub. Şəhər ərazisində iki yerdə iri gövdəli ağac aşıb. Rayonun bəzi ərazilərində elektrik enerjisinin verilməsində qısamüddətli fasilə yaranıb. Eyni zamanda təbii fəlakət nəticəsində Katex kəndinin Kombinat yaşayış massivi ərazisində bir-çox fərdi yaşayış evlərinin dam örtüyü yarasız hala düşüb. Meyvə ağaclarına, bostan-tərəvəzlərinə ciddi ziyan dəyib. Əraziyə adiyyatı qurumların nümayəndələri cəlb edilib. Dəymiş ziyanın aradan qaldırılması istiqamətində işlər aparılır.

Təbii fəlakət Zaqatalada da bir sıra fəsadlar törədib. Şəhərlə yanaşı rayonun Yuxarı Tala, Car, Mazıx və Qəbizdərə kəndlərinə də ziyanlıq dəyib. Mazıx və Qəbizdərə kəndlərinə isə yumurta iriliyində dolu yağıb. Nəticədə dolu evlərin dam örtüyünü yararsız hala salıb. Eyni zamanda bir neçə avtomobilə də ziyan dəyib. Meyvə və fındıq ağcları da ciddi ziyan görüb. Şəkidə isə çay daşıb.

Şəkin Baş Göynük kəndi ərazisindən keçən Şin çayında suyun səviyyəsi artıb, çaydan sel keçib. Nəticədə kəndin girişindəki körpünün bir hissəsi sel sularının altında qalıb. Ancaq sel körpüyə ziyan vurmayıb. Eyni zamanda çayın yaxınlığında yerləşən əkin sahələrini də sel suları yararsız vəziyyətə salıb. Əkin sahələri lil, palçıq qatı ilə örtülüb.

Yağış Qəbələ və ətraf kəndlərdə də bir sıra fəsadlar törədib. Rayonun mərkəzində mağaza, eləcədə bəzi anbar kimi istifadə olunan zirzəmiləri su basıb. Mərkəzi bazar adlanan hissədə quraşdırılmış yeraltı keçid də yağışdan nəsibini alıb. Belə ki, sel nəticəsində yeraltı keçid tamamilə su ilə dolub. FHN-nin Şimal Qərb Regional Mərkəzinin qüvvələri tərəfindən sel suları xüsusi qurğular vasiəsi ilə sovrularaq keçid boşaldılıb. Bununla yanaşı rayonun Zarağan, Daşca, Abrığ, Mıxlı qovaq,Tikanlı, Uludaş eləcədə Mirzəbəyli kəndlərində şəxsi təsərrüfatlara ciddi ziyan dəyib. Dolu bəzi evləri və dam örtüklərini də yararsız hala salıb. Hazırda dəymiş ziyanın aradan qaldırılması işləri aparılmaqdadır.

İsmayıllı da təbii fəlakətin qurbanına çevrilib. Dağlardan gələn sel suları nəticəsində rayon ərazisindən keçən Girdiman, Göyçay və Cülyan çaylarında su həddindən çox artıb. İsmayıllı–Lahıc yolunun Girdiman çayı üzərindən keçən hissəsindəki avtomobil körpüsü üçün təhlükə yaranıb. Körpünün dayaqları zədələnib, insanlar körpünün dağılma təhlükəsində narahatdı. Sel səbəbindən İsmayıllı-Lahıc avtomobil yolu müvəqqəti bağlanıb. Dağlardan gələn lil qatı və qaya parçaları yolu keçilməz edib, həmçinin, bəzi yerlərdə asfalt qatı yuyulub. Sel səbəbindən rayon ərazisində elektrik və rabitə dirəkləri, həmçinin naqillər qəzalı vəziyyətə düşüb. Səhər saatlarından etibarən fəsadların aradan qaldırılması üçün əraziyə xüsusi briqadalar cəlb edilib. Artıq şəhər mərkəzində elektrik verilişi və rabitə əlaqəsi bərpa edilib, hazırda bu istiqamətdə kəndlərdə işlər davam edir.

Qeyd edək ki, Sentyabrın 12-dək ölkə ərazisində qeyri-sabit hava şəraitinin davam edəcəyi, fasilələrlə leysan xarakterli yağış yağacağı gözlənilir. Bəzi yerlərdə yağıntıların intensiv və güclü olacağı, şimşək çaxacağı, dolu düşəcəyi ehtimalı var.