Balakəndə Daxili İşlər Nazirliyinin və Dövlət Sərhəd Xidməti birgə əməliyyat keçirib. Çətin relyefli dağ-meşə massivində narkotik plantasiyası salan, dövlətlərarası axtarışda olan, oğurluq edən və üzərində qanunsuz odlu silah-sursat gəzdirən ümumilikdə 9 nəfər tutulub.Ucqar dağlıq ərazidə yerləri müəyyən edilən narkotik plantasiyasından çəkisi 350 kiloqrama yaxın 568 ədəd çətənə kolu, eləcə də külli miqdarda narkotik vasitə aşkar edilərək qanunsuz dövriyyədən çıxarılıb. Həmçinin, 1-i “PK” markalı pulemyot olmaqla ümumilikdə 8 odlu silah, 290 ədəd patron və 4 əl qumbarası ələ keçirilib. Əməliyyatlar zamanı törətdiyi cinayətə görə barəsində dövlətlərarası axtarış elan edilmiş Vüsal Ömərov və rayonun Qazma kəndində yerləşən uşaq bağçasından kompyuterləri oğurlayan İzzət Məsiyev də saxlanılıb. Faktlarla bağlı araşdırmalar davam etdirilir.

Gecə saatlarında əsən güclü külək Şəkinin 104-cü kvartal massivində ciddi fəsadlar törədib. Belə ki, 10-a yaxın evin damı, bir neçə sakinin divarı uçub. Güclü külək bir evin damını təxminən 200-300 metr aralıdakı əraziyə, bəzilrəini isə digər evlərin damının üzərinə, həyətlərinə tullayıb. Telefon xətlərinə, işıq dirəklərinə ziyanlıq dəyib, ağaclar qırılıb. Əraziyə aidiyyəti orqanların əməkdaşları tərəfindən baxış keçirilib, fəsadların aradan qaldırılması istiqamətində iş aparılır.

Zaqatalada “Sığorta Festivalı” keçirilib. “Həyat sığorta ilə rahat” devizi altında keçirilən festivalda əhaliyə sığorta məhsulları ilə bağlı maarifləndirici məlumatlar verilib. Coşqulu və rəngli atmosfer yaradan enerji dolu musiqilər insanlara əsl festival ab-havası yaşadıb.

Şəkidə Manya Səxavətqızının müəllifi olduğu “Vətən fədailəri: Şəki şəhidləri” kitabının təqdimatı keçirilib. Təqdimat mərasimində şəhid ailələri, şəhər ictimaiyyəti iştirak edib. Əvvəlcə Prezident İlham Əliyevin 44 günlük müharibədə qələbəmizə həsr olunmuş çıxışı nümayiş etdirilib. Daha sonra çıxış edənlər şəhidlərin qəhrəmanlıqlarından, onların Qarabağın işğaldan azad olunması yolunda göstərdikləri şücaətlərdən bəhs ediblər. Təqdim olunan kitabın şəhidlərin qısa və mənalı həyat yoluna işıq saldığı, həmçinin gələcək nəslin vətənpərvərlik ruhunda tərbiyəsində əhəmiyyəti vurğulanıb. 

Bir neçə gün əvvəl Şəkiyə yağan şiddətli yağışlar Aydınbulaq kəndində də bir sıra fəsadlar törədib. Kənddə güclü seldən zərər görən evlərdən biri də İsmayıl Hacıağalıya məxsusdur. Evə dolan sel suları onu yaşamaq üçün yararsız hala salıb. Həmçinin ailəninin 100-ə yaxın toyuq-cücəsi də tələf olub. Onlar aidiyyəti qurumlardan kömək istəyirlər.

Şamaxının gələcəkdə ədiblər yurdu kimi UNESCO-nun mədəni irs siyahısına salınması təklif olunacaq. Milli Lider Heydər Əliyevin 100 illiyi çərçivəsində keçirilən Azərbaycan dili və ədəbiyyatı forumunda çıxış edən mədəniyyət naziri Adil Kərimli forumun açılışının Şamaxıda keçirilməsinin təsadüfü olmadığını bildirib. Forumdan əsas gözləntilərə toxunan nazir bu sahədə problemləri müzakirə etmək və bu problemləri gələcəkdə dövlət strategiyasında nəzərə alınacağını deyib. Yazıçılar birliyinin üzvü Sabir Rüstəmxanlı dilçilik sahəsindəki problemlərin müzakirəsi üçün forumun böyük əhəmiyyət daşıdığını bildirib. Bundan əlavə Azərbaycan dili və ədəbiyyatı forumunun davamı olaraq növbəti mərhələdə rəssamlıq və musiqi forumunun da keçirilməsi nəzərdə tutulub. Forumda elm və təhsil naziri Emin Əmrullayev Azərbaycandan kənarda yaşayanların ana dilində təhsillə bağlı problemlərdən də danışıb. Bildirib ki, xaricdəki soydaşlarımızın ana dilində təhsillə bağlı çətinlik çəkməsi nəzərə alınaraq bu tədris ilindən başlayaraq onlar üçün  onlayn Azərbaycan dili dərsləri keçiriləcək. Forum “Qloballaşmanın Azərbaycan dilinə təsiri və Ana dilimizin saflığının qorunması mexanizmləri”, “Azərbaycan dili və ədəbiyyatı zaman kontekstində: klassik ənənələr və müasir trendlər” mövzusunda panel iclasları ilə davam edib. Qeyd edək ki, tanınmış dilçi və ədəbiyyatşünas alimlərin, yazıçı və naşirlərin qatıldıqları Forum işini sentyabrın 3-4-də Bakıda davam etdirəcək. Mütəxəssislərin Forum çərçivəsindəki fikir və təklifləri ümumiləşdirilərək “Azərbaycan mədəniyyəti – 2040” Dövlət Proqramında əksini tapacaq. 

Şəkidə “Sığorta Festivalı” keçirilib. “Həyat sığorta ilə rahat” devizi altında keçirilən festivalda ölkənin aparıcı sığorta şirkətləri iştirak ediblər. Tədbir ərzində müxtəlif hədiyyəli oyunlar oynanılıb, intellektual yarışlar keçirilib və sürprizli şoular təqdim olunub. Həmçinin festival zamanı “Sığorta maarifləndirməsi” layihəsinın tərkib hissəsi olaraq əhaliyə sığorta məhsulları ilə bağlı maarifləndirici məlumatlar verilib. Tədbirin gedişində iştirakçılar yerində sığorta xidmətləri əldə edə biliblər. Festivalın növbəti tədbiri 1 sentyabr tarixində Zaqatalada baş tutacaq.

Ötən gün İsmayıllı rayonu istiqamətində dağlıq ərazidə köməksiz vəziyyətdə qalan iki nəfər Elnur Nəciyev və Emil Cəbrayılov tapılıb. Onlar İsmayıllıya, Şahdağ Milli Parkı ərazisinə gətirilib. Halsız olan hər iki şəxs həkim müayinəsindən keçdikdən sonra ailələrinə təhvil verilib. Onların ümumilikdə 5 gün dağlıq ərazidə olduqları müəyyən edilib. Hər iki səxs Quba rayonundan dağlıq kəndindən yola çıxaraq bir neçə yüksəklik qət etdikdən sonra İsmayıllı Çay qovuşan kəndi istiqamətində çarəsiz qaldıqları məlum olub.  

Dünən axşam saatlarında Şəkiyə yağan leysan yağışı rayonun Əlican çayı ətrafında yerləşən kəndlərinə böyük ziyan vurub. Əlican çaydan qidalanan suvarma kanalında suyun səviyyəsinin artması ilə bənd bir neçə yerdən dağılıb . Nəticədə yaxınlıqda yerləşən kəndləri su basıb. Şiddətli yağışlar nəticəsində əsasən Şəkinin Cəyirli, Aydınbulaq, Şəki, Əliyar, Bolludərə, Qaratorpaq kəndlərindən sel keçib. Ən çox ziyan isə Şəki kəndinə dəyib. Hazırda müvafiq qurumlar əraziyə ezam edilib, fasadların aradan qadırılması istiqamətində iş aparılır. Qeyd edək ki, bölgədə qeyri-sabit hava şəraiti davam edir.

Axşam saatlarında Şəkinin Şəki və Cəyirli kəndlərinin inzibati ərazisinin yaxınlığındakı dağlıq ərazilərə leysan yağışları yağıb. Leysan yağışları nəticəsində ərazidən keçən Əlican çayında suyun səviyyəsi qalxıb. Ərazidən keçən Yexlax-Balakən dəmir yol xəttinin üzərindəki suötürücülərin tutulması səbəbindən yağış suları Şəki və Cəyirli kəndlərinin inzibati ərazisinə axıb. Sel suları kənd daxili yollara basıb, bir çox kənd sakinlərinin həyatyanı sahəsinə və evlərin birinci mərtəbəsinə dolub. Yağan güclü yağış nəticəsində Şəkinin Bolludərə kəndini də sel suları yuyub. Əliyar kəndinə gələn yol isə sel suları səbəbindən bağlanıb, kənd arası yollar dağılıb, bəzi evlərə və obyektlərə sel suları dolub. Hazırda müvafiq qrumlar əraziyə ezam edilib, fasadların aradan qaldırılması istiqamətində iş aparılır. Qeyd edək ki, bölgədə qeyri-sabit hava şəraiti höküm sürür.