Zaqatalanın Car və Yuxarı Tala kəndləri ərazisinə dolu düşüb. Güclü külək səbəbindən bir-neçə ağac aşıb. Rayonun yüksək dağlıq ərazilərinə isə qar yağıb. Dağlıq və dağətəyi ərazilərinə yağan leysan yağışları səbəbindən rayonun Tala, Zilban, Bəkməz və digər çaylarında su səviyyəsi artıb və çaydan qısa müddətli sel keçib. Bəkməz çayında yaranan sel səbəbindən Car kəndi və Qazangül qəsəbəsi ərazisində üç körpü yararsız hala düşüb. Yuxarı Tala kəndini Meşleş kəndi ilə birləşdirən yol yararsız hala düşüb. Nəticədə 20-dən çox ailənin yaşadığı Meşleş kəndinin mərkəzlə əlaqəsi məhdudlaşıb. Məcrasından çıxan Zilban çayı Zilban kəndinin körpüsünü yararsız hala salıb. Həmçinin ərazidən keçən qaz xətti də zədələnib. Bu səbəbdən rayon mərkəzinin bir hissəsinə təbii qazın verilməsində fasilə yaranıb. Tala çayının məcrasından çıxması səbəbindən rayonun Yolayrıc kəndini sel suları basıb. Sel suları kənddə 100-dən çox sakinin təsərrüfatına ciddi ziyan vurub. Rayonun bir çox ərazisində elektrik enerjisinin verilməsində fasilə yaranıb. Hazırda müvafiq idarə və təşkilat nümayəndələri ərazilərə ezam edilib, təmizlik və təmir işləri aparılır, dəymiş ziyanın miqyası hesablanır. Qeyri-sabit hava şəraiti Balakən rayonunda da bir-sıra fəsadlar törədib. Qabaqçöl qəsəbəsinə dolu yağıb. Rayon mərkəzinə, Hənifə və Tülü kəndləri ərazisinə isə leysan yağıb. Leysan nəticəsində bir sıra evlərin birinci mərtəbəsinə, zirzəmilərinə və həyətyanı sahələrə yağış suları dolub. Rayon mərkəzində iki irigövdəli ağac yıxılıb. Bir çox yaşayış məntəqəsində qeyri-sabit hava şəraiti səbəbindən elektrik enerjisinin verilməsində fasilə yaranıb. Hazırda aidiyyəti qurumlar ərazidə müvafiq tədbirlər həyata keçirirlər.

Balakən Rayon Polis Şöbəsinin əməkdaşları tərəfindən rayon ərazisində narkotik vasitələrin qanunsuz dövriyyəsi və satışı ilə məşğul olan şəxslərə qarşı əməliyyat keçirilib. Daxil olmuş əməliyyat məlumatı əsasında keçirilən tədbir zamanı rayon sakinləri, əvvəllər də məhkum olunmuş Harun Layıcov, Zaur İslamov və Məhəmməd Cəyiyev şübhəli şəxs qismində saxlanılıblar. Şəxsi axtarış zamanı onlardan qurudulmuş marixuana aşkarlanaraq götürülüb. Araşdırma zamanı Harun Layıcovun üzərindən aşkarlanan narkotik vasitəni Zaur İslamovdan, sonuncunun isə Məhəmməd Cəyiyevdən 200 manata aldığı və hissələrə bölərək ayrı-ayrı vaxtlarda ümumilikdə 400 manata satdığı müəyyən edilib. Davam etdirilən tədbirlərlə Məhəmməd Cəyiyevin yaşadığı ünvana da baxış keçirilib və oradan satış məqsədilə hazırladığı ümumilikdə 1 kiloqramdan marixuana aşkar olunaraq götürülüb. O, ifadəsində həmin narkotik vasitəni çöllük ərazidə becərdiyi çətənə bitkilərindən əldə etdiyini bildirib. Faktlarla bağlı cinayət işi başlanılıb, zəruri əməliyyat-istintaq tədbirləri davam etdirilir.

Şəkidə 18 sentyabr – Milli Musiqi Günü ilə bağlı tədbir keçirilib. Həydər Əliyev mərkəzində keçirilən tədbirdə şəhər ictimaiyyəti iştirak edib. Çıxış edənlər bildirib ki, Milli Musiqi Günü Ümummilli lider Heydər Əliyevin Fərmanı ilə 1995-ci ildən etibarən qeyd edilir. Eyni zamanda Sentyabrın 18-nin - Azərbaycan klassik musiqisinin banisi Üzeyir Hacıbəylinin anadan olduğu günün, ölkəmizdə Milli Musiqi Günü kimi geniş qeyd edilməsinin dahi bəstəkarın irsinə, yaradıcılığına, şəxsiyyətinə olan hörmət və ehtiramın bariz nümunəsi olduğu vurğulanıb. Həmçinin bəstəkar Üzeyir Hacəbəylinin həyat və yaradıcılığına həsr olunmuş videoçarx nümayiş etdirilib. Daha sonra isə tədbir konsert proqramı ilə davam edib.

İsmayıllıda ağır yol-nəqliyyat hadisəsi baş verib. Hadisə zamanı 5 nəfər yaralanıb. Yol qəzası rayonunun Quşencə kəndində ötən gün axşam saatlarında meydana gəlib. Kənd sakini 30 yaşlı Şəhriyar Babazadənin idarə etdiyi “Ford Tranzit” və Arzu Məcidovun idarə etdiyi “VAZ-2107” markalı avtomobillər toqquşub. Hadisə nəticəsində sürücülər və Ford markalı mikroavtobusda biri azyaşlı olmaqla 3 sərnişin xəsarət alıb. Hadisə zamanı sərnişinlər Ruzi Məcidov, Şəhriyar Abdulazaqov, Fatimə Abdulazaqova, Kamilə Abdulazaqova və sürücü Şəhriyar Babazadə xəsarət alıblar. Yaralılar İsmayıllı rayon Mərkəzi Xəstəxanasına aparılıb. İsmayıllı sakini, 32 yaşlı Ruzi Məcidovun vəziyyəti ağır olduğundan reanimasiya şöbəsinə yerləşdirilib. Faktla bağlı İsmayıllı rayon Polis Şöbəsi tərəfindən araşdırma aparılır.

Şəhid Cavidan Bədəlovun xatirəsi anılıb. Cavidan Bədəlov Vətən müharibəsində Kəlbəcər, Murovdağ istiqamətində gedən döyüşlərdə iştirak edib. Yaralanmasına baxmayaraq, döyüşü davam etdirərək düşmənin xeyli sayda texnikasını və canllı qüvvəsini məhv edib. Hərbçi olan Cavidan Bədəlov müharibədən sonra da öx xidmətini davam etdirib. Müharibədən 2 il keçdikdən sonra sentybrın 13 düşmənin təxribatı nəticəsində Cavidan Bədəlov Kəlbəcər istiqamətində qəhramancasına şəhidlik zirvəsinə ucalır. Baş leytenant Cavidan Bədəlovun ildönümü şəhidin doğulub boya-başa çatdığı İsmayıllının Talıstan kəndində keçirilib. Anım mərasimində şəhidin ailə üzvləri, şəhər rəhbərliyi, şəhid ailələri, hüquq-mühafizə orqanları və kənd sakinləri iştirak ediblər. Şəhidin Talıstan kənd qəbiristanlığındakı məzarı ziyarət olunub, önünə gül dəstələri düzülüb, ruhuna dualar oxunub. Çıxış edənlər şəhidin ailəsinə başsağlığı verərək, şəhidlərimizin döyüş zamanı göstərdiyi qəhrəmanlıqlarından söz açıb və şəhidlərimizin şərəfli döyüş yolundan danışıblar. Qeyd edək ki, şəhid Cavidan Bədəlov göstərdiyi qəhramanlıq nümunəsinə görə ölümümdən sonra \"Azərbayacan Bayrağı\" ordeni, \"Vətən uğrunda\"medalı ilə ilə təltif edilib.

Şəhid Fərid Lətifovun ildönümü qeyd edilib. 44 günlük Vətən müharibəsində şücaətlə döyüşən və düşmənə qan udduran qəhrəman, müharibədən 2 il sonra ermənistan ordusunun təxribatı nəticəsində şəhidlik zirvəsinə ucalır. Şəhidin xatirəsi qəbri başında anılıb. Anım mərasimində şəhidin ailəsi və yaxınları, diğər şəhidlərin valideynləri, şəhər rəhbərliyi, hüquq-mühafizə orqanları və digər qurumların rəsmi şəxsləri, eləcə də ictimaiyyət nümayəndələri iştirak ediblər. Şəhidin qəbri üstündə dua verilib. Daha sonra çıxış edənlər şəhid Fərid Lətifov haqda öz xatirələrini bölüşüblər. Bildirilib ki, Fərid Lətifov mərd, cəsur və çox vətənpərvər biri olub. Daha sonra məktəblilər şəhidin qəbri üstünə gül dəstələri düzüblər. Qeyd edək ki, şəhid Fərid Lətifov Vətən müharibəsi dövründə demək olar ki, bütün cəbhə boyu döyüşlərdə iştirak edib. O, Füzulinin, Cəbrayılın, Xocavəndin, Kəlbəcərin və Şuşanın azad edilməsinə görə medalları ilə təltif edilib. Eyni zamanda Vətən uğrunda və Bayraq ordeni ilə də mükafatlandırılıb.

M.F.Axundzadə adına Mədəniyyət Mərkəzinin nəzdində fəaliyyət göstərən Xalq teatrı \"Qız atası\" tamaşasının premyerasını Şəkinin Baş Küngüt kənd diyarşünaslıq evində tamaşaçılara təqdim edib. Tamaşada yazıçı, jurnalist Əfqan Əsgərovun 40 il öncə yazmış olduğu \"Qız atası\" pyesinə yeni nəfəs verilib. Hər kəsin çöhrəsinə gülüş dolu anlar bəxş edən tamaşa rəğbətlə və alqışlarla qarşılanıb. Tamaşanın ən yadda qalan tərəfi isə Cavad kişi obrazını xanım aktrisanın canlandırması olub.

Yeni tədris ilində Heydər Əliyev Fondunun təhsil sahəsindəki layihələrindən biri də Şamaxı rayonunu əhatə edib.  Bu il Bilik Günündə Heydər Əliyev Fondunun 500-cü məktəbi Şamaxı rayonunun Göylər kəndində şagird və müəllimlərin ixtiyarına verilib. Prezidentin köməkçisi, Heydər Əliyev Fondunun icraçı direktoru Anar Ələkbərov, Şamaxı Rayon İcra Hakimiyyətinin , Dağlıq Şirvan Regional Təhsil İdarəsinin rəsmiləri məktəbdə yaradılan şəraitlə tanış olublar. 624 şagird yerlik yeni məktəb binası üçmərtəbəli 4 korpusdan ibarətdir. Bina zəruri mebel və avadanlıqlarla, fənn kabinetləri və laboratoriyalar əyani vəsaitlərlə təchiz edilib. Təhsil müəssisəsində zəngin kitabxana, müxtəlif tədbirlərin keçirilməsi üçün akt zalı, uşaqların fiziki cəhətdən sağlam böyüməsi və idmana həvəsləndirməsi üçün həm məktəbin daxilində idman zalı, həm də həyətyanı ərazidə açıq idman meydançası qurulub.

Yeni tədris ilində İsmayıllıda da yeni məktəb binaları istifadəyə verilib. Heydər Əliyev Fondunun təşəbbüsü ilə 280 şagird yerlik 4 saylı tam orta məktəb üçün yeni bina inşa olunub. 3 korpusdan ibarət təhsil ocağı  zəruri avadanlıq, fənn kabinetləri və labaratoriyalar, eləcə də əyani vəsaitlərlə təchiz edilib. İdman zalı ilə və açıq idman meydançası da istifadəyə verilib. 

Qəbələnin Nic qəsəbəsində də Heydər Əliyev Fondunun təşəbbüsü ilə inşa olunan 1 nömrəli tam orta məktəbin binası şagirdlərin istifadəsinə verilib. Açılış mərasimində Heydər Əliyev Fondunun icraçı direktoru Anar Ələkbərov, Elm və Təhsil naziri Emin Əmrullayev ələcə də Qəbələ rayon icra hakimiyyətininrəsmiləri, təhsil işçiləri iştirak ediblər. 2 mərtəbəli 200 şagird yerlik   məktəbdəki fənn kabinetləri və laboratoriyalar  lazımi avadanlıqla və əyani vəsaitlərlə təchiz edilib. Həmçinin kitabxana, yeməkxana, akt və idman zalı , açıq idman meydançası da şagird və müəllimlərin istifadəsinə verilib. 

Qeyd edək ki, yeni tədris ilində Heydər Əliyev Fondu tərəfindən Bakıda və regionlarda əsaslı təmir və bərpa olunan, eləcə də yeni inşa edilən 22 təhsil müəssisəsi - 19 məktəb və 3 məktəbəqədər müəssisə müəllim və şagirdlərin istifadəsinə verilib.

Azərbaycanın ümumitəhsil müəssisələrində Bilik Günü qeyd olunub. Bu gündən 1 milyon 600 mindən çox şagird orta məktəbdə təhsilə başlayıb. Şəki məktəblərində isə bu rəqəm 29 mindən çoxdur. Bilik Günü münasibətilə məktəblərdə ilk zəng çalınıb, ilk dərs isə \"Heydər Əliyev Azərbaycanın xilaskarı və qurucusudur\" mövzusuna həsr olunub.  

Şəkidə səhər saatlarında piyadanın vurulması ilə nəticələnən ağır yol nəqliyyat hadisəsi baş verib. Hadisə şəhərin Məhəmməd Əmin Rəsulzadə küçəsində qeydə alınıb. Şəki şəhər sakini Vüqar Məmmədov idarə etdiyi “Mercedes” markalı mikroavtobusla yolu keçən piyada, 60 yaşlı Seyfəddin Cəfərovu vurub. Müxtəlif dərəcəli bədən xəsarətləri alan Seyfəddin Cəfərov hadisə yerində ölüb. Faktla bağlı araşdırma aparılır.