Ölkənin müxtəlif regionlarında silsilə şəklində keçiriləcək toxum sərgi-satış yarmarkalarının növbəti ünvanı Şamaxı rayonu olub. Toxum sərgi-satış yarmarkası Kənd Təsərrüfatı Nazirliyinin Aqrar İnnovasiya Mərkəzinin təşkilatçılığı ilə Aqrar İnnovasiya Festivalları çərçivəsində keçirilib. Heydər Əliyev parkında keçirilən festivalda Şamaxı, Qobustan, İsmayıllı, Ağsu, Göyçay rayonlarından olan fermerlər iştirak edib. Aqrar İnnovasiya Mərkəzi, Aqrar Xidmətlər Agentliyi, Dövlət Toxum Fondu, Azərbaycan Toxumçular Assosiasiyasının təşkilatçılığı ilə keçirilən yarmarkalar yerli toxum bazarının formalaşması, sertifikatlı toxumlara əlçatanlığın təmin edilməsi, toxum istehsalçıları ilə fermerlər arasında birbaşa münasibətlərin qurulması məqsədi daşıyır. Yarmarkada fermerlərə regionun torpaq-iqlim xüsusiyyətlərinə uyğun olaraq sortların seçilməsi, toxumun təmizlənməsi, dərmanlanması, aqrotexniki qulluq qaydaları barədə ətraflı məlumatlar verilib. Toxum sərgi-satış yarmarkası ilə yanaşı festivalda kənd təsərrüfatında ixtisaslaşmış çoxsaylı şirkətlər tərəfindən texnika, aqreqatlar, pilotsuz uçuş aparatları, suvarma texnologiyaları, gübrə, pestisid nümunələri, əkin materialları sərgilənib. Növbəti toxum sərgi-yarmarkası avqustun 25-də Ağstafa rayonunda təşkil olunacaq.

Qaxda, Qax Gənclər və İdman idarəsinin və respublika güləş federsiyasının təşkilatcılıgı ilə, Azərbaycan idman ustası, əməkdar məşqci Nəsrullah Məmmədovun xatirəsinə həsr olunmuş yeniyetmələr arası respublika turniri kecirilib.Yarışda respublikanın on şəhər və rayonlarından 25 kamanda və 250 ə yaxın idmancı iştirak edib. Əməkdar məşqci Nəsrullah Məmmədovun xatirəsi anılıb, onun həyat yolundan danışılıb. Daha sonra yarışlara start verilib və idmancılar öz cəki dərəcələrindəki idmancılarla güclərini sınayıblar. Fərqlənən idmancılar və ilk yerləri qazananlar Qax Gənclər və idman idarəsi və Respublika Güləş Federasiyası tərəfindən diplom və medallarla təltif olunublar.

Şamaxı rayonu, Mədrəsə qəsəbəsi yaxınlığında Kərkənd adlanan ərazidə yanğın baş verib. Yanan ərazi kol-kos və otlaq sahədən ibarətdir. İlkin məlumata görə, yanğın ümumilikdə 3 hektar ərazini əhatə edir. Əraziyə Şamaxı Yanğından mühafizə bölməsinin 25 nəfər şəxsi heyəti, yanğınsöndürən avtomobilləri cəlb olunub. Yanğınsöndürmə işləri mürəkkəb dağlıq relyef şəraitində, əsasən əl əməyindən istifadə edilərək həyata keçirilir.

Azərbaycan dili xalqımızın milli-mənəvi sərvəti, eyni zamanda, dövlət müstəqilliyimizin əsas amili, rəmzidir.  Zəngin söz ehtiyatına, gözəl ahəngə malik olan Ana dilimiz ulu babalardan xalqımıza miras qalan ən qiymətli sərvətdir. Bu fikirlər “Heydər Əliyev İli” çərçivəsində Qax Rayon İcra Hakimiyyətinin təşkilatçılığı ilə keçirilən “Heydər Əliyev və Azərbaycan dili” mövzusunda dəyirmi masada səsləndirilib. Yeni Azərbaycan Partiyası Qax rayon təşkilatının inzibati binasında keçirilən tədbirdə rayon icra hakimiyyətinin, hüquq-mühafizə orqanlarının rəhbər şəxsləri, idarə, müəssisə və təşkilatların nümayəndələri, ziyalılar iştirak ediblər.  Azərbaycan dilinin bugünkü səviyyəyə çatmasında, dövlət dili kimi işlədilməsində, dünya dilləri arasında öz layiqli yerini tutmasında Ümummilli Lider Heydər Əliyevin tarixi xidmətlərindən bəhs edilib. Bildirilib ki, Ana dilimiz dövlət rəmzlərimiz olan himn, gerb, bayraq kimi müqəddəsdir. Müstəqil dövlətin müqəddəs atributlarına hörmətlə yanaşmaq hamının borcudur.  Çıxış edənlər Azərbaycan dilinin dünya dilləri arasında öz layiqli yerini tutmasında Ümummilli Liderin tarixi xidmətlərini xüsusi vurğulayıblar. Qeyd olunub ki, hazırda bu siyasi xətt Prezident İlham Əliyev tərəfindən uğurla davam etdirilir, Azərbaycan dilinin geniş təbliğ olunması istiqamətində məqsədyönlü tədbirlər həyata keçirilir.

Unudulmaz şair, müasir Azərbaycan ədəbiyyatının görkəmli nümayəndəsi Bəxtiyar Vahabzadənin xatirəsi anılıb. İştirakçılar Bəxtiyar Vahabzadənin adını daşıyan parkada onun şərəfinə ucaldılmış heykəlinin qarşısına gül-çiçək düzüb, ehtiramalarını bildiriblər. Ardınca tədbir unudulmaz şairin ev muzeyində davam edib. Dahi mütəfəkkirin anadan olmasının 98 illiyi ilə əlaqədar keçirilən tədbirdə şairin yaxınları ilə yanaşı, qələm sahibləri, ziyalılar,   Şəki-Zaqatala regional Mədəniyyət idarəsinin işçiləri iştirak edib. Daha sonra Bəxtiyar Vahabzadənin Musiqi sədaları altında şairin şeirlərinin ifası ilə davam edən  tədbirdə çıxış edənlər, Bəxtiyar vahabzadə ilə bağlı xatirələrini bölüşüblər. Azərbaycan poeziyasına olduqca dəyərli əsərlər bəxş edən Bəxtiyarın bütün ömrü boyu milli şüur və Azərbaycan dilinin yaşaması uğrunda inamlı mübarizə apardığı diqqətə çatdırılıb. Çıxış edənlər şairin anadan olduğu Şəki şəhərinə bütün ömrü boyu bağlı qaldığı, elə şeirlərini də məhz Şəkinin təbiəti, gözəlliyindən ilham alaraq yazdığını bildiriblər.

Şəki rayonu üzrə bütün qruplardan ən yüksək nəticəni Şəki şəhər 20 nömrəli tam orta məktəbin məzunu Fidan Muradova qazanıb. O, bu uğurunu 1-ci ixtisas qrupu imtahanında 668 bal toplamaqla əldə edib. Bakı Ali neft məktəbinin ingilis dilində informasiya təhlükəsizliyi ixtisasını seçəcəyini deyən Fidan Muradova sonunda gərgin zəhmətinin bəhrə verməsindən qürurlandığını bildirir. Şəki şəhər 7 saylı tam orta məktəbin məzunu Zəhra Sadıxlı 2-ci ixtisas qrupu üzrə qəbul imtahanında 665 bal toplayıb. İqtisad universitetinin maliyyə ixtisasını seçəcəyini bildirən Zəhra deyir ki, yoldaşları əylənəndə istirahət edəndə o vaxtını planlı şəkildə oxumağa ayırıb və bu da öz nəticəsini verib. Şəki şəhər kimya-Biologiya təmayüllü liseyin məzunu Ləman Yaşarlı isə 4-cü ixtisas qrupunda 662 bal toplayıb. Ləman gələcəkdə təhsilini xaricdə davam etdirmək və ölkəmizə layiqli mütəxəssis, peşəkar həkim kimi yetişmək arzusundadır. Qeyd edək ki, imtahanlarda Şimal-Qərb bölgəsinə daxil olan 6 rayon üzrə 78 məzun 600 baldan yuxarı nəticə göstərib ki, onların da 28-i Şəki rayonunun məzunlarıdır.

Son günlərdə havanın temperaturunun iqlim normalarından yüksək keçməsi səbəbi ilə Zaqatala rayonunda günvarma diaqnozu ilə xəstəxanalara müraciət edənlərin sayı artıb. Əsasən də, açıq havada sahədə və fərdi təsərrüfatlarda işləyənlər günvurmaya məruz qalırlar. Bəs vətəndaşlar günvurmadan necə qorunurlar? Günvurmanın əlamətləri zəiflik, baş gicəllənmə, güclü baş ağrıları, qulaqlarda küy, təngnəfəslik, nəbzin tezləşməsi, ürəkbulanma və qusma, bədən hərarətinin yüksəlməsi, qıcolmalar və huşun itirilməsidir. Bu əlamətlər müşahidə edilən kimi təcili tibbi yardım çağırmaq və həkimlər gələnə qədər zərərçəkənə ilkin yardım etmək lazımdır. Xatırladaq ki, Səhiyyə Nazirliyi də günvurma ilə bağlı əhaliyə müraciət edib. Müraciətdə vətəndaşlar günorta saat 11-dən16-a dək günəş şuaları altından uzaq durmağa çağrılıb.

Zaqatalada yol qəzası olub. Hadisə Zaqatala şəhərinin girişində qeydə alınıb. Balakən sakininin idarə etdiyi 08- BF-923 dövlət nömrə nişanlı avtomobil idarəetmədən çıxaraq divara çırpılıb. Nəticədə avtomobildə olan 3 sərnişindən biri - Balakən rayon sakini, 42 yaşlı Qacarova Sona Ramazan qızı ayaq nahiyəsindən xəsarət alaraq Zaqatala Rayon Diaqnostika Mərkəzinə çatdırilib. Ona diz qapağının qırığı diaqnozu qoyulub. Faktla bağlı araşdırma aparılır.

İsmayıllıda avtomobil piyadanı vuraraq öldürüb. İsmayıllı şəhəri ərazisində Azad Şalbuzov idarə etdiyi “Mercedes” markalı avtomobillə yolu keçən piyada, 68 yaşlı Məmmədov Sədiyar Əziz oğlunu vurub. Müxtəlif dərəcəli bədən xəsarətləri alan piyada xəstəxanada vəfat edib. Faktla bağlı cinayət işi başlanılıb.

Balakəndə köhnə tikilidə təmir işləri görən Ağdam rayon sakini hündürlükdən yıxılaraq ölüb. Hadisə Balakən şəhəri ərazisində baş verib. Ağdam rayon sakini 43 yaşlı Teymur Quliyev tikilinin dam hissəsində işləyərkən ehtiyatsızlıqdan yıxılıb. Nəticədə baş nahiyəsindən müxtəlif dərəcəli ağır xəsarətlər alan Teymur Quliyev hadisə yerində ölüb. Fakta bağlı Balakən rayon prokurorluğunda araşdırma aparılır.