Şəki şəhərində 18-ci rayon Tolstoy küçəsində torpaq sürüşməsi qeydə alınıb. Uzunluğu 36m, hündürlüyü 5 metr olan torpaq sahəsi çöküb. Sürüşmədən sonra ərazidəki evlər üçün təhlükəli vəziyyət yaranıb.

Evlərin divarlarında iri çatlar əmələ gəlib , dəmir dirəklər havada qalıb. Evlərin uçmasından ehtiyyat edən sakinlər deyir ki, ərazidə aktiv sürüşmə 2015 –ci ildəki zəlzələdən sonra başlayıb. Son günlər aramsız yağan yağışlar sürüşməni daha da intensivləşdirib.

Sakinlər deyir ki, 2022-ci ildə aidiyyatı orqanların nümayəndələri yaranmış vəziyyətlə bağlı sözügedən əraziyə baxış keçiriblər. Sürüşən torpaq qatının qarşısını almaq üçün qoruyucu divar çəkiləcəyi vəd olunub. Amma bu istiqamətdə heç bir iş görülməyib.

Yağıntılı havaların davam etməsi ərazidə növbəti torpaq sürüşməsi ehtimalını da artırır . Qısa zaman ərzində tədbirlər görülməsə hər an faciəyə yaşana bilər.

Ümummilli lider Heydər Əliyevin anadan olmasının 101 illiyi münasibətilə Şəki rayonu ərazisində fəaliyyət göstərən idarə, müəssisə və təşkilatlar arasında futzal üzrə “Şəki kuboku 2024” turnirinin bağlanış mərasimi keçirilib.

Turnirin əsas mükafatı olan kuboku Şəki Şəhər İcra Hakimiyyətinin komandası sahiblənib. Qalib komanda eləcə də 2 və 3-cü yeri tutan komandalar medal və diplomlarla mükafatlandırılıb. Qeyd edək ki, turnirdə ümumilikdə 24 komanda mübarizə aparıb.

Kiber üsullarla törədilən cinayətlərdən vətəndaşların zərər görməməsi üçün polis əməkdaşları zəruri tədbirləri davam etdirir. Balakən polisi bu məqsədlə bankomatların, ödəmə terminallarının ətrafında, mağazalarda, eləcə də digər ictimai iaşə obyektlərində məlumatverici lövhələr quraşdırıblar.

Həmçinin, sakinlərlə profilaktik söhbətlər apararaq internet resursları üzərindən dələduzluq və oğurluq əməlləri törədən şəxslərin ən çox istifadə etdikləri üsullar barədə onları məlumatlandırıblar. Polis əməkdaşları kibercinayətkarlıq halları ilə üzləşdikləri təqdirdə vətəndaşları diqqətli olmağa çağırıb və polisə məlumat vermələrini tövsiyə ediblər.

Bu uçuq-sökük bina əvvəllər uşaq bağçası kimi fəaliyyət göstərsə də hazırda xarabalığa çevrilib. Bina Şəkinin Lev Tolstoy küçəsində, təxminən 100-ə yaxın ailənin yaşadığı ərazidə yerləşir. Sakinlər bildirir ki, köhnə tikilinin damından gündəlik olaraq kirəmitlər, daşlar uçaraq tökülür.

Binanın ətrafında azyaşlı uşaqların oynadığını, sakinlərin hərəkət etdiyini nəzərə alsaq təhlükənin nə qədər ciddi olduğunu anlamaq heç də çətin deyil.

Həmçinin uşaqlarını evlərindən dəfələrlə uzaqdakı bağçalara aparan sakinlər acınacaqlı vəziyyətdə olan binanın təmir edilib yenidən uşaq bağçası kimi istifadəyə verilməsini istəyirlər.

Məsələ barədə Şəki-Zaqatala RT idarəsindən isə bildirildi ki, sözügedən 7 saylı uşaq bağçası qəzalı vəziyyətdə olduğu üçün 2012-ci ildə eyni məhəllədə yerləşən Şəki şəhər 9 nömrəli tam orta məktəbin boş sinif otaqlarına yerləşdirilib. Bağçanın qəzalı vəziyyətdə olan binasının təmiri və yenidən fəaliyyətinə gəlincə isə...

Bağçanın yenidən təmir olunmasını gözləyənədək isə ərazidə aidiyyəti qurumlar tərəfindən qabaqlayıcı təhlükəsizlk tədbirləri görülməldir. Ümid edirik problemə bədbəxt hadisə baş vermədən müdaxilə edilər.

Şimal-qərb bölgəsinə yenə güclü yağış yağıb. Zaqatala rayonundan keçən Böyük çay və Tala çaylarında suyun səviyyəsi qalxıb. Bəzi yerlərdə Çaylar məcrasından çıxıb, nəticədə Bəhmətli kəndindəki fındıq bağlarını,həyətyanı sahələri sel suları yuyub.

Yevlax-Zaqatala-Gürcüstan sərhəd magistral yolunun Lahıc və Bəhmətli kəndləri yaxınlığından keçən hissəsində avtomobillərin hərəkəti çətinləşib. Tala çayında yaranan güclü sel Höytala və Yolayrıc kəndlərində evlərə və təsərrüfat sahələrinə ciddi zərər vurub. Müvafiq qurumlar fəsadların aradan qaldırılması istiqamətində işləri davam etdirir.

Hidrometeoroloqlar isə bölgədə yağıntılı hava şəraitinin davam edəcəyini bildirirlər. Yağıntıların bəzi yerlərdə leysan xarakterli intensiv olacağı, şimşək çaxacağı, dolu düşəcəyi, bəzi dağlıq ərazilərdə qar yağacağı ehtimalı var.