Şəkinin rayon mərkəzindən 45 kilometr uzaqda yerləşən Çayqaraqoyunlu və ətraf kəndilərinin sakinləri ilkin səhiyyə xidmətinin təşkilindən, xüsusi ilə də müəyyən saat çərçivəsində işləməsindən narazıdırlar.

Sakinlər bildirir ki, onsuz da bərbad olan kənd tibb məntəqəsində günorta saatlarından sonra heç bir xidmət göstərilmir. Bu isə mütamadi olaraq tibbi yardım almağa möhtac olan xəstələrin yaxşı olmayan vəziyyətini bir az da çətinləşdirib.

Məsafə uzaq olduğundan xəstələri mərkəzi xəstəxanaya aparıb gətirmək də sakinlərə iki qat baha başa gəlir. Sakinlər kiminsə halı pisləşəndə təcili tibbi yardıma müraciət etməli olurlar ki, onların da rayon mərkəzindən uzaqda yerləşən kəndə gəlməsi kifayət qədər vaxt alır. Yaxın aylarda atasını itirən Əli Mahmudov xəstə üçün zamanın nə dərəcədə qiymətli olmasının nəzərə alınmamasından gileylənir.

Haqqında danışılan tibb məntəqəsinə də baş çəkdik. Saat 3-ü keçdiyindən məntəqədə tibb işçiləri yox idi. Ancaq iş saatında belə, adı olan özü olmayan tibb müəssisəsində hər hansı tibbi yardımdan söhbət gedə bilməz. 2 minə yaxın sakini olan kənddə fəaliyyət göstərən tibb məntəqəsinin özünün qayğıya ehtiyac var. Tibb məntəqəsində dərmanların saxlanması üçün nəzərdə tutulan soyuducu belə, tamamilə boşdur. Məsələ ilə bağlı TƏBİB-dən isə bildirildi ki, ilkin səhiyyə xidmətinin təkmilləşdirilməsi ilə bağlı İcbari Tibbi Sığorta üzrə Dövlət Agentliyi ilə birgə yeni layihəyə start verilib. Layihənin icrası ən ucqar nöqtələrdə belə vətəndaşların fasiləsiz tibbi xidmət almasına imkan yaradacaq. Qeyd edək ki, layihə çərçivəsində sorğuda adıçəkilən Şəki rayonu Çayqaraqoyunlu kənd məntəqəsinin kadr potensialının artırılması, təmiri və rekonstruksiya işlərinin həyata keçirilməsi də nəzərdə tutulub. Beləliklə, ümid edirik layihə tezliklə yekunlaşar və rəsmilərin verdikləri vəd həyata keçənə qədər heç bir insan faciəsi yaşanmaz.

İsmayıllı Polisi qanunsuz olaraq odlu silah-sursat saxlayan və narkotik vasitələrin dövriyyəsi ilə məşğul olan şəxslərə qarşı əməliyyat keçirib.

Saxlanılan Vüqar Məmmədov, Amil Boyatov, Zaur Şirinov və Səyyar Məmmədovdan “Kalaşnikov” avtomat, daraq və 30 ədəd patron, eləcə də narkotik vasitə olan marixuana, heroin və metamfetamin aşkar edilib.

Onlar maddi gəlir qarşılığında narkokuryerliyə cəlb olunduqlarını , odlu silah və narkotikləri əvvəlcədən razılaşdıqları yerə çatdırmalı olduqlarını bildiriblər. Faktla bağlı cinayət işi başlanılıb.

Zaqatalada atmosferi normadan artıq çirkləndirən avtomobillərin sürücüləri barəsində tədbir görülüb. “Təmiz hava” aylığı çərçivəsində atmosferin nəqliyyatdan atılan zərərli qazlarla çirkləndirilməsinin qarşısının alınması məqsədilə Dövlət Yol Polisi bölməsinin və 7 saylı Regional Ekologiya və Təbii Sərvətlər İdarəsinin əməkdaşları birgə profilaktik tədbirlər keçiriblər.

Şəhər əraisində avtomobillər saxlanılaraq xüsusi cihaz vasitəsilə onlardakı zərərli qazların miqdarı yoxlanılıb. Bəzilərinin atmosferə normadan artıq tullantı ixrac etdiyi müəyyən olunub. Həmin avtomobil sahibləri ilə yol polisi əməkdaşları izahedici söhbətlər aparılıb və ixrac qazlarının normalara uyğunlaşdırılmasını təmin etdikdən sonra nəqliyyat vasitələrindən istifadə etməli olduqları onların diqqətinə çatdırılıb. Standartlara cavab verməyən avtomobillərin sürücüləri barəsində inzibati qaydada tədbir görülüb.

Şəkidə Avropa İttifaqının “Şərq Tərəfdaşlığı” proqramı tərəfindən dəstəklənən “İqlim və Enerji üzrə Merlər Razılaşması” təşəbüsü çərçivəsində müzakirə və seminar reallaşıb.

Tədbirdə yerli və əcnəbi ekpertlər, dövlət qurumlarının nümayəndələri iştirak edib. Müzakirələrdə “Dayanıqlı Enerji və İqlim üzrə Fəaliyyət Planı” haqqında danışılıb, enerji səmərəliliyi haqda fikirlər səsləndirilib. Kənar təsirlərin yumşaldılması, müxtəlif istixana qazlarının azaldılması, enerji səmərəliliyinin artırılmasına diqqət çəkilib.

Eyni zamanda iqlim dəyişilməsinə uyğunlaşma tədbirləri istiqamətində müzakirələr aparılıb. Sonda “Şəkinin İqlim və Enerji Planı”nın təqdimatı olub.