Çoxillik ağacların qanunsuz budanması ilə bağlı cinayət işi üzrə istintaq davam etdirilir. Zaqatala-Danaçı-Aşağı Çardaxlar avtomobil yolunun kənarındakı çoxillik ağacların qanunsuz budanması bir neçə vəzifəli şəxsin işini itirməsi ilə nəticələnib.

Baş Prokurorluq və Ekologiya və Təbii Sərvətlər Nazirliyinin birgə məlumatına əsasən, cinayət işi üzrə istintaq davam edir. Aparılan araşdırmalar zamanı müəyyən olunub ki, çoxillik qovaq ağaclarının təhlükəsilik məqsədilə budanmasına zərurət olub. Amma nə yazıq ki, budanma adı ilə ağacları əməlli başlı məhv ediblər.

Qarın yağması fermerlər üçün ümid işığı olub. Belə ki, son 3 ayda havanın quraq və isti keçməsi səbəbindən ən iri taxılçılıq rayonlarından olan Şəkidə əkin sahələrinin 50%-dən çoxu təhlükə altında idi. Sahələrdə gəmiricilər xeyli artdığından fermerlər çıxış yolu kimi qarın yağmasını gözləyirdilər.

Ölkə ərazisində yağıntılı hava şəraiti davam edir, hazırda əksər ərazilərə qar yağır. Ən çox qar şimal-qərb bölgəsində müşahidə olunur. Günorta saatlarına olan məlumata görə, qarın hündürlüyü Zaqatalanın dağlıq ərazisi olan Əlibəydə 76, Qaxın dağ kəndi olan Sarıbaşda 52, Şəkidə 29 sm qeydə alınıb.

Şamaxı və İsmayıllı rayonlarına yağan qar yollarda hərəkəti iflic vəziyyətə salıb. Şaxtalı hava səbəbindən əsasən də İsmayillı-Muğanlı yolunun bir hissəsi bağlanıb. Gecədən səhərədək həmin ərazilərdə xeyli sayda avtomobil yolda qalıb.

Mədəniyyət Nazirliyi Respublika Xatirə Kitabı Redaksiyası -- bu gün Zaqatalada “ 44 gün- Tarixi zəfər” adlı kitabın 1, 2, və 3-cü cildlərinin təqdimat mərasimini keçirib. Tədbirdə rayon ziyalıları ilə yanaşı, şəhid ailələri və qazilər iştirak edib.

Şəkidə Azərbaycan Ordusunun qələbəsi ilə yekunlaşan 44 günlük Vətən müharibəsinin şəhidi Şahmar Soltanlı 28-ci doğum günündə anılıb. Əvvəlcə dəfn olunduğu xiyabanda şəhidin məzarı ziyarət olunub, önünə gül dəstələri qoyulub, əziz xatirəsinə dualar oxunub. Daha sonra tədbir şəhər 7 nömrəli tam orta məktəbdə davam edib. Şəhid ailələri, qazilər, müharibə iştirakçıları və ictimaiyyət nümayəndələrinin iştirak etidiyi tədbirdə şəhidin şərəfli ömür yolundan bəhs edən videoçarx nümayiş edilib.

Çıxış edənlər şəhid Şahmar Soltanlı ilə bağlı xatirələrinin bölüşüb, onun Vətən sevgisindən, müharibədə göstərdiyi igidlikdən qürurla bəhs ediblər. Daha sonra tədbir musiqiçilərin və şagirdlərin vətənpərvərlik ruhunda çıxışları ilə davam edib.