Rayon Polis Şöbəsinin Dövlət Yol Polisi bölməsinin əməkdaşları yollarda hərəkətin təhlükəsizliyinin təmin edilməsi məqsədilə reyd keçirib. Təhlükəsizlik kəmərindən, dönmə siqnallarından istifadə etməyən motosiklet və velosiped sürücüləri müəyyən edilib. Həmçinin, xüsusi səs siqnallarından istifadə edən sürücülərə də rast gəlinib və həmin nəqliyyat vasitəsi sahiblərinə bu kimi halların ətrafdakıların haqlı narazılığına​ səbəb olduğu izah edilib. Ümumilikdə reyd zamanı 20 -yə yaxın sürücüyə yol hərəkət qaydalarını pozduğuna görə protokol tədbiq olunub.

 Azərbaycan Dövlət Pedaqoji Universitetinin Şəki filialının 30 illik yubileyinə həsr edilmiş tədbir keçirilib. Şəki şəhər Heydər Əliyev Mərkəzində təşkil olunan tədbirdə rayon administrasiyası, universiettin rektoru , Milli Məclisin deputatı, elm adamları, ziyalılar iştirak ediblər. İştirakçılar Mərkəzin foyesində ADPU-nun Şəki filialının 30 illik fəaliyyətini əks etdirən sərgi ilə tanış olublar. Ardınca universitetin Şəki filialının fəaliyyətindən bəhs edən film nümayiş olunub. Çıxış edənlər gözəl təbiəti, tarix və mədəniyyəti abidələri ilə tanınan Şəkinin həm də, Azərbaycanın qədim sənət, elm və təhsil mərkəzlərindən biri olduğunu vurğulayıblar. Diqqətə çatdırılıb ki, 30 il ərzində filialda 5 mindən çox ali təhsilli pedaqoji kadr hazırlanıb, 6 mindən çox müəllimin ixtisasının artırılması və təkmilləşdirilməsi həyata keçirilib. Hazırda filialda 2 fakültədə 9 ixtisas üzrə 900-dən çox tələbə təhsil alır. Filialın 86 əməkdaşından 3 nəfəri elmlər doktoru, 15 nəfər isə fəlsəfə doktorudur. Universitet rəhbərliyinə xatirə hədiyyəsi və kollektivinin bir sıra üzvlərinə fəxri fərmanlar verilib. Yubiley tədbiri bədii proqramla başa çatıb.

Su həyatdır, amma susuz yaşayanlar, daha doğrusu, yaşamalı olanlar da var. Məsələn, Oğuzun Dəymədərə kəndinin sakinləri illərdir su çiləsi çəkir. Sakinlər içdikləri su üçün kilometrlərlə məsafə qət etməli olur. Məsələ isə suyun olmamasında deyil, su var, amma kəndə suyu çəkən yoxdur. Təfərrüatlar sujetdə...  

Oğuzun Dəymədərə kəndində 800 nəfərə yaxın sakin və 250-yə yaxın təsərrüfat sahəsi susuzluqdan əziyyət çəkir. Əsasən əkinçilik və maldarlıqla məşğul olan kənd sakinləri artıq 18 ilə yaxındır ki, su üzünə həsrət qalıb. Əsası 1980-ci illərdə qoyulan kəndin su sistemi istismar müddətini başa vurduğu üçün tamamilə yararsız hala düşüb. Zamanında kəndi içməli su ilə təmin edən su hövzəsi artıq qurbağa gölünə çevrilib. Kənd sakinləri məsələ ilə bağlı dəfələrlə aiddiyatı qurumlara müraciət etsə də məsələnin həlli istiqamətində heç bir tədbir görülməyib. Kənd İcra nümayəndəsi Qərib Yunusov müraciətimizə cavab olaraq bildirdi ki, kəndin bir neçə hissəsində yeni arteziyan quyusu qazılıb. Lakin bu quyulardan ancaq bir məhəllə istifadə edə bilir. Digər ərazilərdə isə su xətlərinin köhnə olması və ya ümumiyyətlə olmaması səbəbindən sudan istifadə mümkünsüzdür. Problemin həlli istiqamətində aiddiyatı qurumlar qarşısında məsələ qaldırılıb.

Şəkidə Milli Teatr günü ilə bağlı açıq qapı günü keçirilib. Azərbaycan teatrının inkişafında xüsusi yerə sahib olan Şəki Dram Teatrı bu gün də öz adət-ənənəsinə sadiq şəkildə fəaliyyətini davam etdirir.

Şəki Dövlət Dram Teatrının da Аzərbаycаn tеаtrının təşəkkül tаpmаsındа və inkişаfında öz yеri vаr. 143 yaşını qeyd edən Şəki teatrı bu illər ərzində öz sözünü deməyi bacarıb. Teatr günü münasibəti ilə Şəki Dövlət Dram teatrında Açıq qapı günü keçirilib. Dəli Domrul tamaşası ilə teatrsevərlər milli teatr gününü qeyd edib. Şəki Dövlət Dram teatrı artıq gənc rejisorlar, aktyorlar da yetişdirir. Teatrın inkişafı istiqamətində çox saylı işlər görülür,  yeni layihələr həyata keçirilir. Onu da qeyd edək ki, Şəki Dövlət Dram teatrının truppası ilin ikinci yarısından yenidən qastrol səfərlərində və Teatr festivallarında iştirak edəcək . İndi isə aktyor heyəti Novruz bayramı ilə bağlı tamaşaya hazırlaşır.   Martın 19-da başlayacaq tamaşalar 9 gün boyunca kiçik teatr sevərləri sevindirəcək. 

 Turizm şəhərlərində hava limanının olması regionların bu sahədə inkişafına da müəyyən mənada təsirini göstərir. Bu baxımdan, artıq bir neçə il idi ki, Şəki Hava limanının bərpa edilərək işə salınması məsələsi gündəmdə idi. Hazırda ancaq vertolyotları qəbul etmək gücündə olan  bu aeropertun yenidən fəaliyyətə başlayıb-başlamayacağı hökümətin hesabatında öz əksini tapıb.

Nazirlər Kabinetinin 2021-ci il üçün hesabatında qeyd edilib ki, Şəki rayonuna yaxın yerləşən Qəbələ və Zaqatala rayonlarında beynəlxalq statusa malik hava limanları dövlət əsaslı vəsait xərclərindən ayrılmış vəsait hesabına inşa edilərək istismara verilib. İlkin araşdırmalara əsasən, sərnişin və yük təyyarələri üçün hava əlaqələrinin bərpa edilməsi məqsədilə Şəki Hava limanının uçuş-enmə zolağının ölçülərinin artırılması üçün tikinti quraşdırma işlərinin yerinə yetirilməsi tələb olunur. Lakin Şəki hava limanının yenidən qurulması və istismara verilməsi, bu regionda artıq dörd mülki hava limanı - Gəncə, Qəbələ, Zaqatala və Yevlax hava limanları fəaliyyət göstərdiyindən Hava Hərəkəti İdarəsi dispetçerlərinin iş yükünün artmasına səbəb ola və uçuşların təhlükəsizliyinin təmin edilməsində əlavə çətinliklər yarada bilər. Qeyd olunanlar nəzərə alınaraq bu hava limanının yenidən qurulması iqtisadi baxımdan məqsədəuyğun hesab edilməyib.