İsmayıllıda ağır yol-nəqliyyat hadisəsi baş verib. Şəhər ərazisində hərəkət edən \"VAZ 2106\" və \"VAZ 2109\" markalı minik avtomobillərinin toqquşması nəticəsində 4 nəfər İsmayıllı sakini - 33 yaşlı Rahib Süleymanov, Cavid Musayev, Lətifə Şıxalıyeva və 37 yaşlı Tərlan Hacıyev ağır xəsarət alıb. Yaralılar İsmayıllı rayon Mərkəzi Xəstəxanasına aparılıb. Faktla bağlı araşdırma aparılır.

Şəki şəhərində Ümummilli Lider Heydər Əliyevin anadan olmasının 100 illiyi münasibəti ilə Mənəvi Dəyərlərin Təbliği Fondu tərəfindən təşkil olunan “Ulu Öndər: Dəyərlərimizin xilaskarı” adlı üçgünlük seminar öz işinə başlayıb. Tədbirdə Mənəvi Dəyərlərin Təbliği fondunun, Dini Qurumlarla İş üzrə Dövlət Komitəsinin rəsmiləri, məruzəçilər, Balakən, Zaqatala, Qax, Şəki rayonlarından olan gənclər və ictimaiyyət nümayəndələri iştirak edib. Seminarın açılış mərasimində Fondun 5 illik fəaliyyətinə həsr edilmiş film nümayiş olunub. Rəsmi hissədə çıxış edənlər bildirib ki, müasir qloballaşan dünyada və üzləşdiyimiz təhdidlər səbəbindən milli mənəvi kimliyimizin dərki, təbliği, gənc nəsillərə ötürülməsi hər ötən gün daha da önəm qazanmaqdadır. Qeyd edək ki, seminar çərçivəsində ekspertlər tərəfindən müxətlif mövzularda mühazirə və diskussiyaların təşkili, fondun dəstəyi ilə hazırlanmış “Heydər Əliyev və azərbaycançılıq”, “Dəyərlərimizin dastanı” adlı filmlərin nümayişi, şəhər ərazindəki tarixi-mədəni abidələrin ziyarət edilməsi, “Dəyərlərimizi öyrənək” adlı intellektual yarış, eləcə də digər tədbirlərin həyata keçirilməsi planlaşdırılıb. Üçgünlük seminar 27 iyul tarixlərinədək davam edəcək.

Qapalı məkanlarda tütün məmulatlarından istifadəyə dair məhdudiyyətlərə riayət edilməsinin təmini və ətraf mühitin mühafizəsi tələblərinin daha da gücləndirilməsi məqsədilə Polis əməkdaşları tədbir keçirib. Kafe və restoranlarda keçirilən tədbir zamanı qapalı məkanlarda siqaret çəkən, eləcə də tütün məmulatı tullantılarını ətraf mühitə atan şəxslər aşkar olunub. Balakən rayonunda cari il ərzində qeyd olunan qayda pozuntuları ilə bağlı polis əməkdaşlarının keçirdikləri tədbirlər nəticəsində İnzibati Xətalar Məcəlləsinin 212-ci maddəsinin tələblərini pozan 218, 266.3-cü maddəsinin tələblərinə əməl etməyən 90 və 396-cı maddənin tələblərini pozan 42 nəfər barəsində inzibati tənbeh tədbiri görülüb.

Uzun illərdir ki, seriallarda çəkilməyən Gülşad Baxşıyevanın bu layihəni seçməsi heç də təsadüfi deyil. Ancaq, istər ssenarisi, istərsə də füsünkar təbiəti, tarixi- mədəniyyət abidələriylə zəngin olan qədim Şəki əməkdar artistdə seriala çəkilmək arzusu, həvəsi yaradıb. Əməkdar artist, ssenariylə tanış olduqdan sonra, məhz dəli Suğra rolunu, obrazın yaşadığı hissləri tamaşaçıya çatdırmaq qərarına gəlir. Suğra əslində hərkəs tərəfindən haqsızlığa uğrayan, tək tənha, ailəsindən didərgin düşmüş bir obrazdır. Gülşad Baxşıyevanı çox sevindirən bir hal da odur ki, serialda peşəkarlala yanaşı, gənc kadrlar çoxluq təşkil edir. Qeyd edək ki, serialın çəkilişləri hələ davam edir, bu isə o dəməkdir ki, yaxın vaxtlarda layihənin heyətinə yeni və məşhur aktyorlar yenə qatıla bilərlər.

Sentyabrın ortalarında çəkilişləri yekunlaşacaq “Sara” bədii-serialının Şəkinin fərqli məkanlarında çəkilişləri davam edir.  Füsünkar təbiət qoynunda çəkilən serialda rəssamların da rolu əvəz olunmazdır. Film rəssamı obrazların, hadisələrin dolğun və təbii alınması, filmin daha canlı və emosional olmasına mühüm təsir göstərir. Odur ki, rəssam işinin uğurlu həlli ekran əsərini daha da baxımlı edir. Elə serialın gənc rəssamı da bu nüansları əsas tutaraq işinin öhdəsindən peşəkarlıqla gəlməyə çalışır. 

Zaqatalada şəlaləyə gedərkən dağlıq-meşəlik ərazidə itkin düşən şəxslərin axtarışı davam edir. Bakı şəhər sakinləri Əli Əlizadə və Əbdül Rzayevin yeri yüksək dağlıq və relyefi çətin ərazidə müəyyən olunub, hazırda təxliyə edilmələri istiqamətində tədbirlər keçirilir. 24 və 27 yaşlı iki gənc turist sonuncu dəfə rayonun Qəbizdərə istiqamətindən Zaqatala şələləsinə gedərkən dağlıq-meşəlik ərazidə yoxa çıxıblar. FHN-in 112 qaynar xəttinə zəng edərək dağlıq ərazidə azdıqları ilə bağlı məlumat verən yerli turistlərlə daha sonra əlaqə saxlmaq mümkün olmayıb. İtkin düşmüş şəxslərin axtarışı üçün dərhal əraziyə müxtəlif qurumların əməkdaşları cəlb edilib. Yerli sakinlərin sözlərinə görə, ərazini tanımayan şəxslərin bələdçisiz dağa getmələri onların həyatı üçün ciddi təhlükəyə çevrilə bilər. Qeyd edək ki, ötən ilin mayında turist kimi ölkəmizə səyahət edən Hindistan vətəndaşı Kondaveeti Manikath da Zaqatalada çətin relyefə malik yüksək dağlıq ərazidə itkin düşmüşdü. Uuzn müddətli axtarış tədbirlərinə baxmayaraq onun tapılması mümkün olmayıb. 

Şamaxı -Çöl Göylər-Padar avtomobil yolunda Sabirabad sakini 18 yaşlı Fərhad Quliyev idarə etdiyi “Mercedes” markalı avtomobili aşırıb. Qəza zamanı sürücü , eləcə də maşındakı üç sərnişin ağır xəsarətlər alıblar. Yaralılar Sabirabad rayon mərkəzi xəstəxanasına çatdırılsa da, göstərilən tibbi müdaxilələrə baxmayaraq 18 yaşlı sürücünün həyatını xilas etmək mümkün olmayıb.