Hadisə Qax rayonunun Ləkit kəndində baş verib. Kənd sakini 69 yaşlı Vaqif Aydınov öz həyətində ilan sancıb. Yaralı Təcili Tibbi Yardım avtomobili ilə Qax Rayon Mərkəzi Xəstəxanasına çatdırılıb. İlan sancan şəxsin yaxınlarının verdiyi məlumata görə, onlar ilk olaraq ilanın su olmayan hovuzun içərisində yatdığını ailə başçısına xəbər veriblər. Vaqif Aydınov isə əlində olan ağac parçası ilə ilanı hovuzdan kənarlaşdırmaq istəyib. Ani bir ehtiyatsızlıq nəticəsində ilan onun sağ əlindən sancıb. İlan sancan Vaqif Aydınova ilan zəhəri əleyhinə zərdab vurulub, müalicəsi xəstəxananın reanimasiya şöbəsində davam etdirilir.

Oksimedia və Vaytrup prodakşının birgə ərsə gətirdiyi serialın çəkilişlərinə iyul ayının əvvəlindən start verilib. Öz ölkələrində kifayət qədər tanınan əcnəbi rejissorlar, Azərbaycanda da bundan sonra öz dəsti- xətti ilə seçilmək niyyətindədirlər. Onlar Azəbaycanda olmaqdan həm məmnundurlar, həm də serialın müəyyən tamaşaçı kütləsinə xitab edəcəklərini düşünürlər. Beynəlxalq proyekt olan “Sara” serialının ARB televizyası ilə yanaşı, Pakistan televiziyalarının birində də nümayişi planlaşdırılır.  

Bazarlardakı qiymətlər meyvələrə görə dəyişir. Beləki, alma, armud, əriyin, alçanın dəyəri keçən ilə nisbətən bu il daha münasibdir. Ancaq qarğıdalı, şaftalı kimi meyvələrin qiymətində isə keçən ilə nisbətən 20-30 qəpik bahalaşma var.  Bəs, bazarda alıcılıq qabiliyyəti necədir? Qarpızın qiymətində də bahalaşma var. Bunun səbəbi məhsula təlabatın artması və hava şəraitidir.  Bəzi məhsulların qiymətlərində müəyyən dərəcədə ucuzlaşma isə məhsul bolluğu ilə əlaqələndirilir. İqtisadçılar isə məhsul bolluğu ilə yanaşı, inflyasiya kimi amillərin də qiymətlərə təsirini vurğulayırlar. Məhsulun sahədən satış dəyəri ilə son istehlak qiyməti arasında fərq illərdir elə müzakirə mövzusu olaraq qalır. Yəni qiymətlərin formalaşmasında əsas rolu istehsalçıdan tədarükçüyə qədər gedən proseslər oynayır. Çatdırılma mexanizmi olmadığından Azərbaycan fermerləri öz məhsulunu birbaşa çıxara bilmir. Birbaşa satış yalnız hökumətin təşkil etdiyi kənd təsərrüfatı yarmarkaları vasitəsilə mümkün olur. Nəticədə məhsul bir neçə əl dəyişir və fermerlərin təyin etdiyi qiymətlərlə son bazar qiymətləri arasında kəskin fərq hiss olunur. O da vurğulanır ki, ölkədə logistik xərclər, anbar təsərrüfatlarının mövqeyi, enerji daşıyıcıları da məhsulun dəyərinə təsiri göstərir. Onu da qeyd edək ki, bu ilin 6 ayında Azərbaycan meyvə-tərəvəz ixracından 350 milyon dollardan çox gəlir əldə edib. 2022-ci ilin hesabat dövrü ilə müqayisədə ixracdan gəlirlər azalıb. Belə ki, bu il təsərrüfatçılar 348 min 774 ton meyvə-tərəvəz ixracına görə, 350 milyon dollar qazanıblarsa, ötən il 306 min 376 ton meyvə-tərəvəz üçün 328 mln. 109 min dollar əldə etmişdilər.

Qəbələdə gecə saatlarında ölümlə nəticələnən ağır yol qəzası olub. Rayonun Nohurqışlaq kəndində iki minik avtomobili toqquşub. Hər iki nəqliyyat vasitəsinin sürücüsü hadisə yerində ölüb. 57 yaşlı Akif Abdurrəhmanov və 35 yaşlı Anar Nəsrullayevin meyitləri ailələrinə təhvil verilib.

Oktyabr ayından etibarən ARB televiziyasında yayımlanacaq serial yay mövsümü boyunca Şəkidə çəkilişlərinə davam edəcək. İlk dəfə olaraq Pakistanlı rejissorların iştirakı ilə ərsəyə gələn ekran işinin ssenari müəllifi isə İlqar Fəhmidir.  OksiMedia və Vaytrup prodakşının birgə layihəsi olan serialın kadr arxasında çalışanların əksəriyyəti peşakarlardır. Həmçinin gənclərə də özlərini tanıtmaq imkanı yaradılıb. 

Şəkidə park dedikdə ağla ağacları budanmaqdan kölgəsiz qalan, fəvvarələrin çox zaman işləmədiyi, oturacaqları qırıq məkanlar yada düşür. 190 min əhalisi olan rayonda uşaqların əylənəcəyi, böyüklərin dincələcəyi parkların əksəriyyəti çayxanalar tərəfindən istismar edilib. Hazırda insanların əksəriyyətinin üz tutduğu yeganə park Mirzə Fətəli Axundov adına parkdır ki, burda köhnə, digərlərinə nisbətən işlək vəziyyətdə olan atraksionlar fəaliyyət göstərir. Məhz bu səbəbdən bayram günlərində bu parkda hədsiz insan sıxlığı yaşanır. Yaşıllığa gəldikdə isə insanların kölgəsinə yığışdığı hündür ağacların anormal şəkildə budanmasından sonra parkda çox az sayda yaşıllıq ərazi qalıb. Şəkinin Məhəmməd Füzuli parkında da vəziyyət fərqli deyil.  Parkın girişinə Məhəmməd Füzulinin büstünün olduğu yer isə boş qalıb. Şəki şəhər kommunal təsərrüfat istehsalat birliyindən bildirildi ki, şəhərin aşağı hissəsində,    yeni salınmış olimpiya məhəlləsində 3 hektar yeni park ərazisinin salınması planlaşdırılır. Parklardakı oturacaqların azlığı məsələsi barədə isə baxış keçirilib nəzarətə götürüləcəyi, ehtiyac varsa yeni oturacaqların quraşdırılacağı vurğulandı. Məhəmməd Füzuli parkında büstün olmaması məsələsinə gəlincə, Regional Mədəniyyət şöbəsindən tezliklə yeni büstün yerləşdiriləcəyi bildirildi.

KİV nümayəndələrinə müəssisənin tarixi, istehsal prosesi, quraşdırılan yeni avadanlıqlar və tətbiq olunan texnologiya barədə məlumat verilib. Bildirilib ki, “Azərtütün” ASC-nin özəlləşdirilməsi üzrə elan edilən investisiya müsabiqəsinin qalibi üzərinə götürdüyü öhdəliklərin alqı-satqı müqaviləsində müəyyən edilmiş qaydada icrasını artıq başa çatdırıb. Belə ki, dövlət büdcəsinə 6,4 milyon manat məbləğində vəsaitin köçürülməsi, ümumi həcmi 8,2 milyon manat təşkil edən İnvestisiya Proqramının icrası təmin edilib. Müəssisədəki istehsal avadanlıqları əsaslı təmir olunub, yeni avadanlıqlar quraşdırılıb, tütün qəbulu məntəqələrində və emal zavodunda təmir-tikinti işləri aparılıb, nəqliyyat və texnika alınıb. Müəssisənin yenidən qurulması istehsal olunan tütün məhsullarının keyfiyyətinin artmasına və ixrac imkanlarının genişlənməsinə imkan verir. İndiyə qədər ölkə daxilində tütünə təlabat ödəniməklə yanaşı 500 tondan artıq məhsul Bolqarıstan və Rusiyaya satılıb. Bildirilib ki, hazırda şirkətin istehsal etdiyi tütünün İtaliya, Belçika və Almaniyaya da satılması istiqamətində danışıqlar aparılır. 2023-cü ildə zavodun xammala olan tələbini ödəmək üçün xaricdən tez yetişən və məhsuldar tütün sortları gətirilərək Şəki, Qax, Balakən, Zaqatala rayonlarında 620 hektar tütün əkilib. Yetişdirilən tütünə aqrotexniki xidmətin düzgün təşkili məhsuldarlığın yüksəldilməsinə imkan yaradır. Həyata keçirilmiş tədbirlər nəticəsində ötən il məhsuldarlıq 20 faiz artıb. Fermerlər də özəlləşdirilən müəssisənin fəaliyyətindən razılıq edirlər. Fermerlərdən 1 kiloqram yaşıl tütünün alış qiyməti də artıb. 2023-cü ildə bu göstərici I növ üzrə 36 qəpik, II növ üzrə 25 qəpik, III növ üzrə isə 20 qəpik olub. Müəssisədə 20 daimi, 150 mövsümi olmaqla, 170 yeni iş yeri yaradılıb. Ümumilikdə, hazırda müəssisədə 130 nəfər daimi işçi çalışır, mövsümi işlərə 250 nəfər cəlb edilib. Müəssisədə orta aylıq əməkhaqqı 700 manatdır.