İsmayıllıda Ümumilli lider Heydər Əliyevin 100 illiyi münasibəti ilə 100 min Sidr ağacı əkilib. Tədbirdə Azərbaycanda olan xarici ölkə səfirləri, Türkdilli Dövlətlərin Parlament Assambleyasının, Beynəlxalq Türk Mədəniyyəti və İrsi Fondunun rəhbərliyi, diplomatlar, iş adamları iştirak edib. Aksiya çərçivəsində həmçinin Azərbaycanla Qırğızıstan arasında diplomatik münasibətlərin qurulmasının 30 illiyi münasibəti ilə əkilmiş ağaclara baxış həyata keçirilib.

Qəbələdə bostan bitkilərinin arasında çətənə kolu yetişdirən keçmiş məhkum saxlanılıb. Polis Şöbəsinin əməkdaşları Bum qəsəbə sakini, əvvəllər məhkum olunmuş Elnur Eyyubovu şübhəli şəxs kimi saxlayıb. Onun yaşadığı ünvana baxış keçirilən zaman evin həyətyanı sahəsindəki yarımçıq tikilidən və bostan bitkilərinin becərildiyi dirrikdən Elnur Eyyubov tərəfindən xüsusi aqrotexniki qulluq göstərməklə yetişdirilən, ümumi çəkisi 20 kiloqrama yaxın çətənə kolları aşkar edilib. Bitkilər kökündən çıxarılaraq maddi sübut kimi götürülüb. Saxlanılan şəxs ifadəsində çətənə kollarını bir neçə ay bundan öncə becərdiyini və xüsusi qulluq göstərdiyini etiraf edib. Faktla bağlı Qəbələ Rayon Polis Şöbəsində Cinayət Məcəlləsinin müvafiq maddəsi ilə cinayət işi başlanılıb.

Beynəlxaq layihə olan “Sara” serialının çəkilişləri davam edir. Serial oktyabrdan ARB və Pakistan televiziyasında yayımlanmağa başlayacaq. Layihənin anons edilən tarixə çatması üçün qızğın iş prosesi gedir. Ətraflı sujetdə.... \"Sara\" serialının çəkilişləri hər gün daha çox marağa və səs küyə səbəb olur. Layihənin yayımlanmadan məşhurlaşması seriala olan maraqdan bəllidir. Serialın sujet xətti əsasən gündəlik həyatda qarşıalaşdığımız hadisələrdir. Aktyorlar isə daha təbii və xalqa yaxın olmaq üçün rollarını peşəkarcasına ifa etməyə çalışırlar. Məqsəd oynadıqları obrazları tamaşaçıya sevdirmək və serialın daha geniş kütlə arasında yayılmasına nail olmaqdır. Qızğın iş prosesinin davam etdiyi layihədə hər kəs bir nəfər kimi ən mükəmməl işi ortaya çıxarmaq üçün çalışır.

Qəbələ rayon Mədəniyyət Mərkəzində Azərbaycanın Milli Qəhrəmanı, şəhid general-mayor Polad Həşimovun xatirəsinə həsr olunmuş “Şanlı Zəfərə aparan yol” adlı tədbir keçirilib.  Milli Qəhrəman Polad Həşimovun və ərazi bütövlüyümüz uğrunda canlarından keçən şəhidlərin xatirəsi yad edilib. Çıxış edənlər Azərbaycan Prezidenti, Müzəffər Ali Baş Komandan İlham Əliyev tərəfindən ordu quruculuğu sahəsində həyata keçirilən məqsədyönlü tədbirlərdən bəhs edib, 2020-ci ilin iyul hadisələrinin 44 günlük Vətən müharibəsindəki şanlı Qələbənin qazanılmasında mühüm əhəmiyyəti olduğunu diqqətə çatdırıblar. Həmçinin Milli Qəhrəmanın döyüş yolundan bəhs olunub.Tədbirdə rayon Mədəniyyət Mərkəzinin əməkdaşlarının hazırladığı Polad Həşimova həsr olunmuş ədəbi-bədii kompozisiya nümayiş etdirilib.Sonda tədbir iştirakçıları Polad Həşimova həsr olunmuş videoçarxa baxıblar.

İsmayıllıda 35 yaşlı qadın qətlə yetirilib. Şübhəli şəxs qismində əri saxlanılıb. Hadisə bu gün günorta saatlarında rayonunun Təzəkənd kəndində törədilib. Kənd sakini Aytən Bədəlovanın kəsilmiş-deşilmiş xəsarətlərdən ölməsi barədə polisə məlumat daxil olduqdan sonra hüquq-mühafizə orqanlarının əməkdaşları hadisə yerinə cəlb olunub. İlkin istintaq tədbirlərindən sonra qadını həyat yoldaşı, 35 yaşlı Etibar Bədəlovun öldürdüyü müəyyən edilib. Cinayət ailə münaqişəsi zəminində baş törədilib. Faktla bağlı Rayon Prokurorluğunda araşdırma aparılır. 

Şəki şəhər 2 nömrəli tam orta məktəbin məzunları 50 il sonra doğma təhsil ocağında yenidən bir araya gəliblər.   1973-cü ildə doğma məktəblərindən məzun olmuş yarım əsrin məzunları yenidən parta arxasında əyləşib, müəllimləri ilə söhbətləşiblər. Müxtəlif sahələrdə əmək fəaliyyətləri ilə məktəblərinin  adını yüksəldən, müəllimlərinin etimadını doğruldan 50 ilin məzunları məktəb illəri ilə bağlı xoş və kövrək xatirələrini bölüşüb, keçmiş fotolarına baxıblar. Sonra məzunların riyaziyyat müəllimi Məhəbbət Abdullayeva 50 il əvvəl dərs dediyi məzunlara işlərində uğurlar arzulayıb. Sonda isə görüşdə iştirak edənlər xatirə fotosu çəkdiriblər. 

Düşərgənin rəsmi açılış mərasimində diqqətə çatdırılıb ki, ölkəmizin ərazi bütövlüyü və suverenliyi uğrunda canlarını fəda etmiş qəhrəman Vətən övladlarının əziz xatirəsi daim ehtiramla yad edilir. Eyni zamanda bu cür düşərgələr onların yadigarlarının həm yeni biliklər və bacarıqlar əldə etmələrinə, həm də asudə vaxtlarını səmərəli keçirmələrinə dəstək olacaq. Ümumilikdə 300-dən çox uşağı əhatə edəcək 7 düşərgənin həyata keçirilməsi nəzərdə tutulur. Layihə çərçivəsində hər düşərgədə uşaqlar üçün əyləncə saatları, öyrədici təlimlər, teatr tamaşaları, öz sahəsində müsbət imicə malik olan peşəkarlarla, qurum rəhbərləri ilə görüşlər, ekskursiyalar, psixoloqların iştirakı ilə təlimlər, konsultasiyalar və müğənnilərin iştirakı ilə konsert proqramları keçiriləcək.  Balaca fidanların ilk üz tutduqları məkan isə Nəsirəddin Tusi adına Şamaxı Astrofizika Rəsədxanası olub. Qəhrəmanlarımızın övladlarına göy cisimlərini izləmək üçün nəzərdə tutulan teleskoplar göstərilib. Xatırladaq ki, Şamaxıda baş tutacaq hər bir düşərgə 5 gecə 6 günü əhatə edəcək.Sentyabr ayının əvvəlinədək reallaşdırılacaq düşərgələrdə şəhidlərimizin 10-11, 12-14 , 15-17 yaş kateqoriyasında olan övladları iştirak edəcəklər. Düşərgə boyunca uşaqlar sığortalanmış olacaqlar və davamlı olaraq həkim nəzarəti, psixoloqlar tərəfindən müşayiət olunacaqlar. Sponsorlar və dəstəkçilər tərəfindən iştirakçılara müxtəlif hədiyyələr də təqdim ediləcək.

Xəqani Məmmədov adına reabilitasiya mərkəzi 5 ildir ki, bütün Azərbaycana xidmət verir. Burada respublikanın hər bir yerindən olan uşaqlar müalicə alır. Psixoloji, pedaqoji, laqopedik, fizyaloji, sosial və sair yardımlar göstərən ilk müəssisələrdən biridir. Bu gün isə mərkəzin yeni binasının açılışı baş tutub. Mərkəzin yeni binasında ən müasir müalicə metodları və ən yeni texnalogiyalardan istifadə edilir. Reabilitasiya mərkəzində artıq hovuz da istifadəyə verilib. Hovuz xidmətlərindən isə yalnız xanımlar və uşaqlar istifadə edə bilər. Onu da qeyd edək ki, mərkəzdə 16 mütəxəssis çalışır. Onların hər biri öz sahəsinin peşəkarlarıdır. Mərkəz rəhbərliyi yuxarıda sadalan diaqnozlarla bağlı onlara müraciət edənləri tam sağlamlıqlarına qovuşduracaqlarını bildirir. Mərkəzdə şəhid və qazi övladlarının müayinəsi və müalicəsi isə tam ödənişsiz həyata keçirilir.