Hadisə saat 11 radələrində Zaqatala şəhər ərazisində Tala çayı üzərində tikilmiş asma körpünün girişində baş verib. Hərəkətdə olan VAZ 2106 markalı avtomobil Opellə toqquşub. Qəza zamanı VAZ 2106 markalı avtomobilin sürücüsü Zaqatala rayon Yuxarı Tala kənd sakini 28 yaşlı Əhməd Əhmədov aldığı müxtəlif dərəcəli bədən xəsarətləri ilə Zaqatala Rayon Mərkəzi Xəstəxanasına yerləşdirilib. Faktla bağlı Zaqatala rayon Polis Şöbəsində araşdırma aparılır.

Qida Təhlükəsizliyi Agentliyi fitosanitar müşahidələri davam etdirir. Növbəti müşahidələr Şəkinin Cumakənd kəndi ərazisində qarpız sahəsində həyata keçirilib. Bostan sahəsində qarpızda nitrat və nitritin qalıq miqdarı yoxlanılıb. Təsərrüfat sahibinə aqrokimyəvi maddələrdən istifadə qaydaları ilə bağlı maarifləndirici məlumatlar verilib. Bildirilib ki, torpağın aqrokimyəvi analizi aparılmadan ammonium nitrat gübrəsinin normadan artıq verilməsi qarpızda nitrat və nitritin qalıq miqdarının normadan artıq yığılmasına səbəb olur. Bu da insan orqanizmində bəzi fəsadlara gətirib çıxara bilər. Odur ki, aqrokimyəvi maddələrdən istifadə edərkən diqqətli olmaq və müəyyən edilən normanı keçməmək lazımdır. Daha sonra laboratoriyada yoxlanış üçün parpızlardan nümunələr götürülüb.

Nəticədə yolun uzunluğu 9.7 km qısalaraq 76.8 km təşkil edəcək. Mövcud 2 zolaqlı yol genişləndirilmədən sonra 4 hərəkət zolağından ibarət olacaq. Layihə çərçivəsində ərazidə mövcud qruntun qazılaraq layihə səviyyəsinə endirilməsi və yamacların eroziyadan mühafizəsi üçün bərkitmə işləri görülür. Layihələndirilən yolda ümumilikdə 1 tunel, 1-i asma körpü olmaqla 8 böyük və 5 kiçik körpü olacaq. Belə ki, Girdmançay, Talıstançay, Ax-ox çayı, Göyçay çayı və Vəndamçay üzərində yerləşən 5 mövcud körpü 4 zolağa uyğun yenidən qurularaq genişləndirilir. Ağsuçay, Gülyançay və Dəmiraparançay çayları üzrəində yerləşən 3 körpü isə yolun dəyişdirilmiş yeni oxu üzərində 4 zolağa uyğun yenidən layihələndirilib. “Təbii ki, layihədə turizm sektoru da nəzərə alınıb. Durduğumuz ərazi Qəbələ rayonunun Dəmir aparan çayı əraizisidir. Yeni yolun istiqaməti də məlumdur. Yeni yol Qəbələ rayon mərkəzinə girmədən Nohurqışlaq kəndi ərazisində Qəbələ Ağdaş yoluna calanır”. Bundan başqa yol boyu kiçik dərələr üzərində yerləşən 5 körpü sökülüb yeni boru şəkilli kiçik körpülərlə əvəzlənir. Artıq Gülyançay və Qurudərə çayları üzərində körpülərin tikintisi yekunlaşıb. Hazırda Ağsuçayla kəsişmədə 1200 metr uzunluqda və 76.5 m hündürlüyündə böyük asma körpü inşa edilir. Yolun Ağsuçayı üzərindəki körpüdən sonra qarşıya çıxan hündür dağdan uzunluğu 884 metr olan tunel tikintisi aparılır. Qeyd edək ki, Muğanlı-İsmayıllı-Qəbələ avtomobilin yenidən qurulması layihəsinin 2025-ci ilədək yekunlaşdırılması nəzərdə tutulur.

Ətraf mühitin mühafizəsi tədbirlərinin daha da gücləndirilməsi, sanitar-gigiyena qaydalarının pozulmasının qarşısının alınması məqsədilə Balakəndə polis əməkdaşları tərəfindən nəzarət tədbirləri keçirilib. Polis şöbəsinin əməkdaşları tərəfindən bu istiqamətdə keçirilən tədbirlər zamanı rayonun Qaysa, Yeni Şərif və Şambul kəndlərində sənaye və məişət tullantılarının qalaqlanması, eləcə də yandırılması zamanı ətraf mühitin mühafizəsi tələblərinə əməl edilməməsi faktları aşkar olunub. Aşkar olunmuş faktlarla bağlı adları qeyd olunan kəndlərin bələdiyyə sədrləri barəsində İnzibati Xətalar Məcəlləsinin 271-ci (sənaye və məişət tullantılarının qalaqlanması və yandırılması zamanı ətraf mühitin mühafizəsi tələblərinə əməl edilməməsi) maddəsi ilə protokol tərtib olunaraq aidiyyəti üzrə Ekologiya və Təbii Sərvətlər Nazirliyinin regional idarəsinə göndərilib. Həmçinin,çirkləndirilmiş ərazilərin tullantılardan təmizlənməsi təmin edilib.

Zaqatalanın Lahıc kəndində 48 yaşlı Habil Bayramova məxsus 120 kvm sahəsi olan mal tövləsi və içərisində olan 12 ton ot bağlamaları tamamilə yanıb. Həmçinin tövlədə olan 2 iri buynuzlu heyvandan biri də yanğından tələf olub. Zaqatala rayon yanğından mühafizə xidmətinin əməkdaşlarının səyi ilə yuanğının digər tikililərə yayılmasının qarşısı alınıb.

Bir müddətdir ki, Azərbaycanın qədim və tarixi diyarı olan Şəkidə \"Sara\" serialı çəkilir. Serialın çəkilişləri üçün məkan olaraq Şəkinin seçilməsi isə heç də təsadüfi deyil. Belə ki, Şəki daim mədəniyyətlərin kəsişdiyi, öz tarixi şəxsiyyətləri ilə seçilən bir şəhərdir. Sovet dövründə belə Şəki həmişə kinorejissorlar tərəfindən sevilən məkan olub. İndi də film və serial çəkilişləri üçün Şəkiyə üz tutan kinorejissorlar heç də az deyil. Elə \"Sara\" serialının da layihə rəhbərləri məhz bütün bunlar rəhbər tutaraq Şəkini seçiblər. Serialın çəkilişləri əsasən Şəkinin özündə, Qoxmuq və Kiş kəndlərində aparılır. 36 bölümdən ibarət bədii serial daha öncəd qeyd etdiyimiz kimi oktyabrdan etibarən ARB televiziyasında yayımlanmağa başlayacaq. Siz də serialı izləyərək həm qəhrəmanlarımızla yaxından tanış ola, həm də Şəkinin füsunkar təbiətini görə bilərsiniz.

Balakəndə isə 62 yaşlı kişi işıq dirəyindən yıxılıb. Rayon sakini Ömər Ustayev hadisə vaxtı çoxsaylı sınıq xəsarətləri alıb. Dərhal xəstəxanaya aparılsa da onun həyatını xilas etmək mümkün olmayıb. Aldığı xəsarətlərdən xəstəxanada dünyasını dəyişib. Ömər Ustayev rayonun İşıq idarəsinin əməkdaşı olub.

İsmayıllıda kişi meyiti tapılıb. Təxminən 30-40 yaşlarında kişiyə məxsus olan cəsədi kənd sakinləri səhər saatlarında rayonunun Diyallı kəndi ərazisində, internet kabelləri çəkilən çuxurda aşkar ediblər. Əraziyə dərhal hüquq -mühafizə orqanlarının müvafiq ekspert qrupu çağrılıb. Cəsəd müayinə olunması üçün tapıldığı yerdən götürülüb, morqa aparılıb.

Oğuzda ağır yol qəzası olub. Bir ailənin dörd üzvü xəsarət alıb. Hadisə rayonun Yaqublu kəndi ərazisində baş verib. 35 yaşlı Bakı sakini Kəbirağa Şirinov idarə etdiyi \"Chevrolet Cruze\" markalı avtomobillə hərəkətdə olarkən sükana nəzarəti itirib. İdarəetmədən çıxan maşın yol kənarına aşıb. Qəza zamanı sürücü, onun həyat yoldaşı 30 yaşlı Sevda Şirinova, övladları 11 yaşlı Elbrus və 10 yaşlı Muhamedhüseyn müxtəlif dərəcəli bədən xəsarətləri alıblar. Yaralılar əvvəlcə Rayon Mərkəzi Xəstəxanasına aparılıb. Onlara ilkin tibbi yardım göstərildikdən sonra müayinə və müalicələrini davam etdirmək üçün Qəbələ Rayon Mərkəzi Xəstəxanasına göndəriliblər.