Balakəndə narkotik vasitənin və spirtli içkinin təsiri altında avtomobil idarə edən sürücülər məsuliyyətə cəlb olunub. Rayon Polis Şöbəsinin Dövlət Yol Polisi Bölməsinin şəhərin küçə və prospektlərində, eləcə də təhsil müəssisələrinin qarşısında yol hərəkəti təhlükəsizliyinin təmin edilməsi məqsədilə keçirdiyi tədbirlər nəticəsində narkotik vasitənin təsiri altında və sərxoş vəziyyətdə sükan arxasına əyləşən intizamsız sürücülər aşkar olunub. Yanvar-fevral ayı ərzində spirtli içkinin və narkotik vasitənin təsiri altında 27, sürücülük hüququ olmadan avtomobil idarə edən isə 58 nəfər barəsində qanunvericiliyə uyğun tədbir görülüb. Həmçinin, dövlət qeydiyyat nişanı olmadan avtomobil idarə edən, təhlükəsizlik kəmərindən istifadə etməyən, nəqliyyat vasitəsində konstruksiya dəyişikliyinə yol verən və digər kobud qayda pozuntuları törədən sürücülər müəyyən olunaraq barələrində inzibati protokollar tərtib edilib. Tədbir zamanı avtomobillərin atmosferə ixrac etdiyi dəm qazının miqdarı da xüsusi cihaz vasitəsilə yoxlanılıb. Yoxlama zamanı ekoloji normalara cavab verməyən avtomobil sürücüləri inzibati qaydada məsuliyyətə cəlb olunublar. Rayon polis şöbəsinin əməkdaşları tərəfindən keçirilmiş digər profilaktiki tədbirlər nəticəsində isə tütün məmulatlarından istifadə qaydalarını pozan, qapalı məkanlarda siqaret çəkən, qanunsuz küçə ticarəti ilə məşğul olan və məişət tullantılarını urnalardan kənara atan şəxlərlər müəyyən olunub. Son 2 ay ərzində bu istiqamətlədə keçirilmiş tədbirlər nəticəsində tütün məmulatlarından istifadə qaydalarını pozan 268 nəfər, qanunsuz küçə ticarəti ilə məşğul olan 46 və ətraf mühiti çirkləndirən 22 nəfər barəsində İnzibati Xətalar Məcəlləsinin müvafiq maddələri ilə protokollar tərtib olunub.

İsmayıllı rayonunun Xanagah kəndi ərazisində “MAZ” markalı yük avtomobili ilə “Azsamand” markalı minik avtomobili toqquşub. Hadisə nəticəsində minik avtomobilindəki sərnişin, 34 yaşlı Nigar Bayramova aldığı xəsarətlərdən vəfat edib. Sürücü isə xəstəxanaya yerləşdirilib, vəziyyəti ağır qiymətləndirilir. Faktla bağlı araşdırma aparılır.

Təhsil nazirliyinin VII qrant layihələrinin müsabiqəsində qalib layihələrdən biri olan Şəki şəhər 18 saylı orta məktəbinin “Olimpiada mərkəzinin yaradılması ilə təhsilalanların RFO-ya (respublika fənn olimpiadaları) hazırlaşdırılması” layihəsi yekunlaşıb.

Layihənin yekununa həsr olunan tədbirdə çıxış edənlər həyata keçirilən işlərdən danışıblar. Vurğulanıb ki, Şəki-Zaqatala regionunda ilk dəfədir ki, bu tipli layihə həyata keçirilir. Nəticədə 8-11-ci siniflərdə təhsil alan 20 müəllim tərəfindən 133 nəfər şagirdə 8 fənn üzrə RFO-ya hazırlıq üzrə peşəkar məşğələlər təşkil olunub. Bildirilib ki, layihə nəticəsində Şəkidə təhsilalanlar arasında RFO-ya marağın artırılması və olimpiadalara qatılan şagirdlərin nəticələrinin yüksəldilməsi hədəflənib. Tədbirin sonunda layihədə iştirak edən müəllimlər fəxri fərman və hədiyyələrlə mükafatlandırılıb.