Yanğın Danaçı kəndində Mohuma Məmmədova məxsus, ümumi sahəsi 392 kv/m olan ikimərtəbəli, 9 otaqdan ibarət fərdi yaşayış evində baş verib. Əraziyə Zaqatala rayon Dövlət Yanğından Mühafizə Hissəsinin iki yanğınsöndürən maşını və şəxsi heyəti cəlb edilib. Yanğınsöndürənlərin səyi nəticəsində yanğının genişlənərək yaxınlıqdakı digər tikililərə keçməsinin qarşısı alınıb. Yanğın nəticəsində ikimərtəbəli 9 otaqlı evin ikinci mərtəbəsi əşyalarla birlikdə yanıb. Xəsarət alan olmayıb. Faktla bağlı araşdırma aparılır.

Şəkidə Azərbaycan xalqının tarix səhifəsinə qanla yazılmış günlərdən biri - Xocalı Soyqırımının günahsız qurbanları anılıb. Qətliamın 32-ci ildönümü münasibətilə keçirilən anım tədbirində şəhid ailələri, qazilər, şəhər ictimaiyyəti, Xocalı faciəsinin şahidləri iştirak edib. Soyqırımın canlı şahidləri o gün baş verən dəhşətlərdən danışıb, itirdikləri ailə üzvləri haqqında məlumat veriblər. Vurğulanıb ki, Ali baş komandanın qətiyyəti və uğurlu siyasəti nəticəsində artıq digər Vətən torpaqları kimi Xocalı da azaddır.Tədbirin sonunda Xocalı soyqırımına həsr olunan videoçarx nümayiş olunub. Digər çıxış edənlər faciənin baş vermə səbəblərindən, onun tarixi-dini aspektlərindən, soyqrımla bağlı milli idealogiyanın formalaşdırıması istiqamətində aparılan təbliğatın zəruriliyindən və beynəlxalq səviyyədə verilmiş huquqi qiymətlərindən geniş söhbət açıblar.

Şəkidə 8 nömrəli tam orta məktəbdə də xalqımızın qan yaddaşı, insanlığa qarşı törədilən cinayətlərdən biri olan Xocalı Soyqırımı anılıb. "Xocalı- uşaqlı, cavanlı, qocalı, unutmayacağıq!" şüarı ilə keçirilən tədbirdə çıxış edənlər şagirdlərə Xocalı soyrıqımı haqqında məlumat veriblər. Vurğulanıb ki, erməni millətçilərinin xalqımıza qarşı apardıqları etnik təmizləmə və soyqırım hadisəsinin milli yaddaşımızdan heç vaxt silinməyəcək. Tədbirin bədii hissəsində şagirlərin hazırladıqları ədəbi-bədii kompozisiya nümayiş olunub.

Qaxda Xocalı faciəsinin 32-ci ildönümü münasibətilə anım tədbiri keçirilib. Tədbirdə Rayon rəsmiləri, şəhid ailələrinin üzvləri, müharibə iştirakçıları, ictimaiyyət nümayəndələri iştirak ediblər. Şəhid məzarları önünə gül dəstələri düzülüb. Faciə qurbanlarının, o cümlədən Vətən uğrunda canından keçən şəhidlərimizin xatirəsi ehtiramla yad edilib. Rayon mədəniyyət mərkəzinin kollektivi faciəyə həsr edilmiş kompozisiya nümayiş etdirib.

Xocalı soyqırımının qurbanlarının xatirəsi Zaqatala rayonunda da anılıb. Rayon rəhbərliyi və ziyalıların qatıldığı tədbirdə öncə soyqırım qurbanlarının xatirəsinə ucaldılmış abidə kompleki ziyarət edilib. Soyqırım qurbanları, eləcə də ərazi bütövlüyümüz uğrunda şəhid olan vətən oğulları ehtiramla yad edilib. Çıxışlar zamanı, erməni vandallarının törətdiyi insanlığa sığmayan vəhşiliklər bir daha xatırlanıb. Tədbir çərçivəsinə Xocalıdan olan məcburi köçkünlərə ərzaq yardımları paylanılıb.

Qəbələ də Xocalı faciəsi qurbanlarının xatirəsi ehtiramla yad edilib. Xocalı faciəsinin 32-ci ildönümü ilə əlaqədar abidə önünə güllər qoyulub, soyqırımı qurbanlarının xatirəsinə ehtiram ifadə olunub. Daha sonra rayon rəsmiləri Xocalıdan olar sakinlərlə görüşüb. Onlarla həmsöhbət olublar.

Şamaxıda da Xocalı soyqırımının 32-ci ildönümündə faciə qurbanlarının xatirəsi anılıb. Rayon İcra Hakimiyyətinin, hüquq-mühafizə orqanlarının rəsmiləri və ictimaiyyət nümayəndələri soyqırım abidəsini ziyarət edib, faciə qurbanlarının xatirəsinə ehtiramlarını bildiriblər. Daha sonra keçirilən tədbirdə çıxış edənlər Xocalı soyqırımının insanlığa qarşı törədilmiş ən dəhşətli cinayətlərdən biri olduğunu vurğulayaraq, Xocalı həqiqətlərinin dünyaya çatdırılması, bu soyqırımın beynəlxalq aləmə yayılması, qətliama obyektiv hüquqi-siyasi qiymət verilməsi istiqamətində Ümummilli Lider Heydər Əliyev tərəfindən əsası qoyulmuş siyasətin bu gün Prezident İlham Əliyev tərəfindən uğurla davam etdirildiyini bildiriblər.

Ölkə ərazisində davam edən qeyri-sabit iqlim şəraiti Şimal-Qərb bölgəsində bir sıra problemlər yaradıb. Qəbələdə gecə saatlarından yağan qar eləcədə şaxtanın olması yolların buz bağlamasına və yollarda böyük tıxaclar yaranmasına səbəb olub. Qəbələ-Şəki avtomobil yolu və bu istiqamətdə kəndlərdən gələn avtomobillərin hərəkətində problemlər var.

Şəkidə də şaxta səbəbindən səhər saatlarında şəhərdaxili yollar buz bağlayıb. Səhərin erkən saatlarında yola çıxan avtomobillərin hərəkəti buzlu yollarda çətinləşib. Günorta saatlarına doğru yollarda yaranan problemlər aradan qalxıb.