Bu gün peşə bayramını qeyd edən Azərbaycan Avtomobil Yolları Dövlət Agentliyinin əməkdaşları qeyri-sabit hava şəraiti səbəbilə fəaliyyətlərini gücləndirilmiş iş rejimində davam etdirirlər.

Şamaxıda 19 saylı Xüsusi Təyinatlı Yol İstismarı idarəsinin əməkdaşları gecə boyu qarın ən çox yağdığı və buzlaşmanın olduğu ərazilərdə vəziyyətə nəzarət edib, hərəkətin təhlükəsizliyinin təmin olunması məqsədi ilə buzlaşma baş verən yollara qum-duz qarışığı səpilib.

Çoxillik ağacların qanunsuz budanması ilə bağlı cinayət işi üzrə istintaq davam etdirilir. Zaqatala-Danaçı-Aşağı Çardaxlar avtomobil yolunun kənarındakı çoxillik ağacların qanunsuz budanması bir neçə vəzifəli şəxsin işini itirməsi ilə nəticələnib.

Baş Prokurorluq və Ekologiya və Təbii Sərvətlər Nazirliyinin birgə məlumatına əsasən, cinayət işi üzrə istintaq davam edir. Aparılan araşdırmalar zamanı müəyyən olunub ki, çoxillik qovaq ağaclarının təhlükəsilik məqsədilə budanmasına zərurət olub. Amma nə yazıq ki, budanma adı ilə ağacları əməlli başlı məhv ediblər.

Qarın yağması fermerlər üçün ümid işığı olub. Belə ki, son 3 ayda havanın quraq və isti keçməsi səbəbindən ən iri taxılçılıq rayonlarından olan Şəkidə əkin sahələrinin 50%-dən çoxu təhlükə altında idi. Sahələrdə gəmiricilər xeyli artdığından fermerlər çıxış yolu kimi qarın yağmasını gözləyirdilər.

Ölkə ərazisində yağıntılı hava şəraiti davam edir, hazırda əksər ərazilərə qar yağır. Ən çox qar şimal-qərb bölgəsində müşahidə olunur. Günorta saatlarına olan məlumata görə, qarın hündürlüyü Zaqatalanın dağlıq ərazisi olan Əlibəydə 76, Qaxın dağ kəndi olan Sarıbaşda 52, Şəkidə 29 sm qeydə alınıb.