Əməkdşlarımız Şimal-Qərb bölgəsinin ən yaşlı sakinlərindən olan Fatimat nənənin qonağı olub. 100 yaşını ötən ay qeyd edən Fatimat nənə uzun ömürlülüyün sirrini uşaqlıq və gəncliyini keçirdiyi dağların səfalı təbiətində görür.  

Balakən rayonunun Gərəkli kənd sakini Xəlilova Fatimat Əli qızı 1922-ci ilin fevral ayında dünyaya göz açıb. 100 yaşlı nənənin 3 oğul övladından 15 nəvəsi və 13 nəticəsi var. Ömrünü zəhmətə həsr edən Fatimat nənənin gəncliyi dağlarda keçib. Elə gəncliyindən sakit təbiətli olan nənəmiz öz həyatı barədə çox danışmaq istəməsə də ailəsi, yaxınları Fatimat ananın uzun ömürlülüyünü işgüzarlığı və səfalı təbiətlə yanaşı, həm də gözəl xasiyyəti və təmiz ürəyi ilə əlaqələndirir. Fatimat nənəni təkcə öz ailəsi, qohumları deyil, bütün el, oba ağbirçək sayır. Bir çox məsələlərdə dəyərli mələhətlərindən yararlanırlar.   Beynəlxalq Qadınlar günü ərəfəsində  nəvə-nəticələri təbrik üçün Fatimat nənənin ocağına toplaşırlar. İkinci Qarabağ müharibəsinin iştirakçıları olan nənənin nəvəsi Bayram Xəlilov və nəticəsi Muradov Ramazanda təbrikə gələnlər sırasında idi. "Hər kəs 100 il yaşamasa, günah onun özündədi"-deyib atalarımız. Fatimat nənənin ömür yolu da buna nümunədir. Bəlkə bir çoxumuz səfalı təbiətdə yaşamaq imkanlarına sahib deyilik. Amma yaşadığımız şərtlər altında xoşbəxt olmağı bacarmaq,həyata pozitiv baxmaq, xoş günlərimizi, xoş anlarımızı yetərincə dəyərləndirməklə sağlamlığımıza dəstək ola bilərik. Təbii ki, aktiv həyat tərzi də əsas şərtlərdəndir.

Qəbələdə baş verən tükürpədici qətlin təfərrüatları məlum olub. Əməkdaşlarımız hadisə yerində olub, yaşananları qonşulardan öyrəniblər. Hadisə Zarağan qəsəbəsindəki 61 saylı binanın 4 cü blokunun 4 cü mərtəbəsində baş verib.

Hadisə zamanı yaranan səs küyü eşidən qonşu mənzilin qapısını döyərək səs küyün səbəbini öyrənmək istəyib. İçəridən gələn səs uşaq yatdırdığını deyib. Şübhələnən qonşu daha sonra evdən böyük bir bükülünün qadın və oğlan tərəfindən daşındığını görüb. Qətlə yetirilən 23 yaşlı Aytac Əliyevanın 3 yaşlı övladı da evdə olub. Qonşuları mərhumun çox yaxşı insan olduğunu deyir. Aytac Əliyevanın qətlə yetirilməsi ilə əlaqədar rayon prokurorluğunun və polis şöbəsinin əməkdaşları təxirəsalınmaz istintaq-əməliyyat tədbirləri həyata keçirib. Qətli törədənin  Şəki sakini Kəmalə Maksmbekova olduğu müəyyən olunub. Belə ki, Kəmalə Aytacın ərinin sevgilisinin rəfiqəsi olub.  O, tutularaq istintaqa cəlb olunub. Faktla bağlı Qəbələ rayon prokurorluğunda araşdırmalar davam edir.

 Güclü külək və yağışla müşahidə olunan hava şəraiti bəzi rayonlarda fəsadlar törədib. Ağaclar aşıb, elektrik dirəkləri qırılıb.

Son iki gündür müşahidə olunan güclü külək Şamaxıda fəsadlara səbəb olub. Küləyin təsiri nəticəsində Şamaxı şəhərində və kəndlərdə 10-a yaxın evin, tövlə və sahibkarlıq obyektinin dam örtüyü dağılıb, 20-dən çox irigövdəli ağac,  işıqlandırma dirəkləri, yol nişanları, reklam lövhələri aşıb. Bundan əlavə, güclü külək Həmyəli-Cabanlı yolunun kənarında olan 30-a yaxın beton elektrik dirəyini aşırıb, yüksək gərginlikli elektrik naqilləri qırılıb. Küləyin elektrik təsərrüfatına vurduğu ziyan səbəbindən Şamaxı şəhərinə və kəndlərə elektrik enerjisinin verilişi dayanıb. Hazırda küçələrə yıxılmış ağacların kəsilərək götürülməsi və əhalinin elektrik enerjisi ilə təmin olunması üçün işlər görülür.

Güclü külək Şəkidə də fəsalara səbəb olub. Bəzi kənd yollarında ağaclar aşıb, naqillər qırılıb.  Hazırda küləyin fəsadlarının aradan qaldırılması üçün tədbirlər görülür.Milli Hidrometreologiya Xidmətinin məlumatına görə, bəzi bölgələrdə küləkli hava şəraiti davam edir və temperatur ötən günlərlə müqayisədə 5-8° aşağı enib.

Göyçay rayonunda da güclü külək bir sıra fəsadlar törədib. Küləyin təsiri nəticəsində Göyçay şəhərində və kəndlərdə 10-a yaxın irigövdəli çinar, qovaq ağacı aşıb, yollarda hərəkət edən bir neçə avtomobilə ziyan dəyib. Qeyd olunan ərazilərdə elektrik enerjisinin verilişi dayanıb. Qeyd edək ki, sabahdan başlayaraq yaxın üç gün ərzində havanın temperaturu iqlim normasından yüksək olacaq. Martın 9-u axşamdan başlayaraq isə hava şəraitinin dəyişəcəyi, temperaturun xeyli aşağı düşəcəyi gözlənilir. Temperatur fevral ayı ilə müqayisədə aşağı olacaq və 4-9 dərəcə isti təşkil edəcək.

 Azərbaycan Dövlət Pedaqoji Universitetinin Şəki filialında “Azərbaycan təhsil və pedaqoji fikir tarixinin parlaq səhifəsi- İrəvan müəllimlər seminariyasının 140 illiyi” adlı elmi praktik konfrans keçirilib. Konfrans Azərbaycan Respublikası Prezidentinin “İrəvan Müəllimlər Seminariyasının 140 illiyinin qeyd edilməsi haqqında” sərəncamına uyğun olaraq baş tutub. Çıxış edənlər bildirib ki, İrəvan müəllimlər seminariyasının yubileyinin qeyd edilməsi, milli yaddaşın bərpasına hədəflənib. Natiqlər tələbələrə İrəvanın tarixi, orda yaşayan xalqların türk milli etnik kimliyi, ermənilərin bu diyarlara köçürülməsi prosesi haqqında tarixi faktlar barədə məlumat veriblər. Həmçinin bildirilib ki, 1881-ci ildə fəaliyyətə başlayan İrəvan müəllimlər seminariyasında Azərbaycan dili və şəriət dərslərinin keçirilməsi faktı o zaman İrəvan quberniyasında yaşayanların mütləq əksəriyyətinin azərbaycanlılar olduğunun göstəricisidir. Tədbirdə həmçinin məlumatlandırıcı xarakterli təqdimatlar keçirilib. Maraqlı diskussiyalar aparılıb. 

Bu gün Şəki şəhərində Bədən Tərbiyəsi və İdman Günü münasibəti ilə yeniyetmə və gənc idmançılar arasında turnir keçirilib. Turnirdə gənc cəngavərlər Kikboksinq, MMA, May-Tay, Grappling, Pankration idman növləri üzrə güclərini sınayıblar. Yarışda müxtəlif çəki dərəcələri və 6 yaşdan başlayaraq 7 yaş kateqoriyası üzrə qarşılaşmalar keçirlib. Turnirin sonunda qaliblar diplom və medallarla təltif edilib.