Ölkənin şimal və şimal-qərb bölgəsində  kəskin hava şəraiti davam edir. Qar bəzi istiqamətlərdə hərəkəti çətinləşdirib, kəndlərlə əlaqə kəsilib.  

Şamaxıya yağan güclü qar nəticəsində kəndlərlə əlaqə kəsilib. Rayonun ucqar dağ kəndlərinə 70  santimetrədək qar yağıb.  Şamaxı-Pirqulu yolunda, eləcə də Qızmeydan, Qaleybuğurd, Pirbəhli, Keçmədil, Qaladərəsi, Sis, Dəmirçi, Zaradxeyberi kəndlərinə gedən yolda avtomobillərin hərəkəti məhdudlaşıb. Hazırlıqsız yola çıxan sürücülər öz minik avtomobilini yolun kənarında saxlamalı olub, bəziləri isə digər yük avtomobillərinin köməyi ilə hərəkət ediblər. Əraziyə Şamaxı rayon 19 saylı yol istismar idarəsinin canlı qüvvəsi və texnikası cəlb olunub, yollara qum-duz qarışığı səpilib. Lakin fasiləsiz yağan güclü qar və çovğun yenidən yolların bağlanmasına səbəb olur. Şimal rayonlarında isə ən çox yağıntı  Xızının Altıağac qəsəbəsinə düşüb. Burda qarın hündürlüyü 32 santimetrə çatıb. Qubanın Qrız kəndində 16, Xaltana isə 27 santimetr qar yağıb. Ən aşağı temperatur Qubanın Qrız kəndində qeydə alınıb. Burda havanın temperaturu mənfi 15 dərəcəyə enib. Ölkə ərazisində bir neçə gündür davam edən qeyri-sabit hava şəraitinin martın 20-dək davam edəcəyi proqnozlaşdırılır. Gecə saatlarında şimal və şimal-qərb istiqamətlərində yolların buz bağlayacağı gözlənilir. Bu istiqamətdə hərəkət edəcək sürücülərə ehtiyyatlı olmaları tövsiyyə olunur.

Vətəndaşlara Xidmət və Sosial İnnovasiyalar üzrə Dövlət Agentliyinin Elektron Hökumətin İnkişafı Mərkəzi media və ictimaiyyət nümayəndələri ilə görülmüş işlərə dair hesabat xarakterli görüş keçirib. Qurumun fəaliyyətinin 4 illiyi münasibətilə təşkil olunan görüşdə  təqdimatla çıxış edən Mərkəzin direktoru  elektron hökumət ekosistemi, Mərkəzin strateji hədəfləri, son dövrdə həyata keçirilən layihələr, bu layihələr üzrə standartların tətbiqi və risk analizi, 2021-ci il üzrə layihələrin artım dinamikası və gələcəyə olan planlar haqda məlumat verib. Tədbirdə həmçinin dövlət informasiya ehtiyatlarının, sistemlərinin və elektron xidmətlərin vahid reyestrinin təşkili, Elektron Hökumətin İnkişafı İndeksində ölkənin mövqeyinin yaxşılaşdırılması ilə bağlı taktiki addımlar, dövlət informasiya sistemlərinə aid verilənlər bazasında mövcud olan məlumatların yenidən strukturlaşdırılması, “ASAN Bridge” Milli Məlubat Mübadiləsi Sistemi, kibertəhlükəsizlik alt qrupunun hesabatı ətrafında məruzələr edilib, geniş fikir mübadiləsi aparılıb.

Ailə, Qadın və Uşaq Problemləri üzrə Dövlət Komitəsinin sədri Bahar Muradova Şamaxı və Qobustan rayonlarından olan vətəndaşların müraciətini dinləyib. Vətəndqaşlar əsasən qadın sahibkarlara kömək, işsizlik, əlil və xəstə uşaqların müalicəsi, erkən nikah və boşanmaların yaratdığı problemlər, təhsildən yayınma, uşaq hüquqlarının müdafiəsi və digr məsələlər barədə müraciət ediblər. Müraciətlərin bir qismi yerindəcə həll olunub. Araşdırılmağa ehtiyacı olan bir sıra müraciətlər isə qeydiyyata götürülüb və onların operativ həlli üçün konkret tapşırıqlar verilib. Komitənin səlahiyyətlərinə aid olmayan bəzi müraciətlər isə müvafiq qurumlara çatdırılmaq üçün qeydiyyata alınıb.

Novruz bayramının son- yazın gəlişini, torpağın oyanışını simvozilizə edən ilaxır və ya Torpaq çərşənbəsi zamanı süfrə açmaq da milli adət-ənənələrimizdəndir. Axır çərşənbədə həmçinin Novruza hazırlıq görülür, şirniyyatlar bişirilir. Maraqlıdır, bayram şirniyyatlarının hazırlanması, bayram süfrəsinin bəzədilməsi üçün insanların nə qədər xərci çıxır, bazarlarda qiymətlər necədir? Əməkdaşlarımız bu suallara cavab tapmaq üçün Şəki bazarında məhsulların qiyməti ilə maraqlanıb. 

“Novruz bayramı ilə bağlı xalq arasında belə bir inanc var ki, ilaxır çərşənbəni necə keçirsən növbəti 7 ili elə keçirəcəksən. Bu səbəbdən də hər kəs bu günü süfrəsinin bolluq içində olmasını istəyir. Bəs, qiymətlər necədir? Bunu araşdırmaq üçün Şəki bazarına gəlmişik. Nar neçəyədir?” Bazarda qısa gəzintimiz zamanı satıcılar bildirdi ki, əksər məhsulların qiymətində artım var. Bu, özünü xüsusən də xaricdən və ya başqa regionlardan gətirilən məhsullarda göstərir. Havaların qeyri sabit, qarlı, şaxtalı keçməsi də qiymətlərə öz təsirini göstərib. Əgər bayram süfrənizdə təzə tərəvəzin olmasını istəyirsinizsə, pomidorun kiloqramını 3-4, xiyarınsa 4-5 manatdan əldə etmək mümkündür. Meyvələrə gəlincə isə qiymətlər fərqlidir...

Novruz şirniyyatlarının vazkeçilməzi olan qoz ləpəsinin qiyməti 10-20, fındıq ləpəsinin isə 8-14 manat arasındadır. Satıcılar qiymətlər yüksək olduğu üçün alıcı qıtlığı yaşandığını deyirlər. Bazarda dəyişməyən yeganə məhsul onsuz da baha olan şabalıdın qiymətidir. Bayram süfrəsinin əsas neməti olan plovu bişirmək istəyənlər üçün düyünün qiyməti 3 manatdan başlayır, aş-qara üçün lazım olan kişmiş və digər quru meyvələrin qiyməti isə əl yandırır.  Bayram süfrəsinin bəzəyi olan səməninin qiyməti isə ölçüsündən və bəzəyindən asılı olaraq 1-10 manat arasında dəyişir. Bir sözlə, nə qədər xərcləməyinizdən asılı olmayaraq əsas odur ki, süfrəniz bərəkətli olsun...  

Bayramınız mübarək!