2019-cu ilin aprelində hərbi xidmətə yollanan Cavid Abdullayev vətənə olan borcunun bitməsinə bir ay qalmış müharibəyə qatılır. Hər bir Azərbaycan oğlu kimi o da böyük şücaət və qəhramanlıqla vuruşur. Füzuli-Xocavənd istiqamətində gedən döyüşlərdə xüsusilə fərqlənən Cavid 2020-ci ilin oktyabr ayının 21-də döyüş tapşırığını yerinə yetirərkən şəhidlik zirvəsinə ucalır. Onun nəşi 52 gün sonra tapılaraq doğulduğu Qax rayonunun Qaşqaçay kəndinə gətirilir və kənd qəbristanlığında dəfn olunur. Şəhidimizin cənnətdə keçirdiyi 22-ci doğum gününü ailəsi məzarı başında qeyd edib. Onun xatirəösini anıb, ruhuna dualar oxuyublar. Cavid Abdullayevlə bərabər döyüşlərdə eyni gün daha 5 gənc əsgərimiz də şəhidlik zirvəsinə ucalıb. Onlardan biri də Bərdə sakini şəhid Rəşad Nadirovdur. Rəşad Nadirovun anası və Bərdədən gələn digər şəhid valideyinləri də mərasimdə iştirak ediblər. Cavid Abdullayev ölümündən sonra "Vətən Uğrunda" və "Xocavəndin azad olunmasına görə" medalları ilə təltif olunub.

 ÜST-nin Avropa üzrə regional direktoru Şamaxıda Avropa İmmunlaşdırma Həftəsi çərçivəsində keçirilən tədbirlərə qatılıb. Şamaxı Olimpiya Mərkəzində keçirilən tədbirdən sonra qonaqlar Göylər kəndində ilkin səhiyyə xidməti məntəqəsinə, səyyar klinikaya və immunlaşdırma stendinə baş çəkib, tibb tələbələri və icma liderləri ilə görüşüb. “İmmunlaşdırma Həftəsi” çərçivəsində həyata keçirilən tədbirlər haqqında iştirakçılara ətraflı məlumat verilib. Daha sonra qonaqlar ilkin səhiyyə xidmətinin təkrar təşkili modeli ilə tanış olmaq üçün Şamaxı Təlim Mərkəzini ziyarət ediblər. Qonaqlara məlumat verilib ki, ilkin səhiyyə xidmətinin gücləndirilməsi universal tibbi təminatın əsasını təşkil edir. Avropa İmmunlaşdırma Həftəsinə həsr edilmiş Şamaxı səfəri Avropa İttifaqının maliyyələşdirdiyi və ÜST-nin Azərbaycan Nümayəndəliyinin həyata keçirdiyi “COVID-19 əleyhinə Vaksinasiyaya Dəstək” layihəsinin altı kənddə gerçəkləşdirdiyi immunizasiya kampaniyası çərçivəsində baş tutub.

Şəkidə Heydər Əliyev mərkəzində “Bizim Böyük Qələbəmiz” kitabının təqdimat mərasimi keçirilib. Bakı Şəhər İcra Hakimiyyəti və “Regional İnkişaf” İctimai Birliyi tərəfindən birgə hazırlanan kitab azyaşlılar üçün nəzərdə tutulub. Təqdimat mərasimində şəhər rəhbərliyi, ictimaiyyət nümayəndələri, müəllimlər, şagirdlər və könüllülər iştirak ediblər. Öncə mərasim iştirakçıları mərkəzin foyesində rəflərə düzülmüş“Bizim böyük Qələbəmiz” kitabı ilə tanış olublar, burada onlara kitab haqqında qısa məlumat verilib. Mərasim iştirakçıları, həmçinin, mərkəzin foyesində məktəblilərin əl işlərindən ibarət vətənpərvərlik mövzusunda rəsm sərgisinə baxıblar. Daha sonra tədbir mərkəzin akt zalında davam edib. Çıxış edənlər bildirib ki, kitabla tanış olan azyaşlılar Zəfər tariximizi daha yaxından öyrənmək imkanı qazanacaqlar. Sonda iştirakçılar şəhər 3 saylı Uşaq Musiqi Məktəbinin kollektivi maraqlı konsert proqramı ilə çıxış edib.

Şamaxıda su-kanalizasiya xəttinin çəkilişi üçün aparılan qazıntı zamanı Əli Kərimov küçəsinin asfalt örtüyü dağıdılıb. Aradan uzun illər keçməsinə baxmayaraq, ərazidə yolun təmiri istiqamətində heç bir iş aparılmayıb. Sakinlər yolun yağışlı və qarlı havalarda xüsusilə keçilməz olduğunu deyirlər. İri çuxurlar, çay daşları və palçıq qatı piyada və sürücüləri burdan keçmələrinə peşman edir. Yayda isə ətrafı toz dumanı bürüyür. Sakinlərin sözlərinə görə, taksi sürücüləri bir çox hallarda bu əraziyə gəlməkdən imtina edir və ya daha baha qiymətə aparırlar. Yolun təmirsiz olması təcili yardım və yanğınsöndürən maşınların da işini çətinləşdirir. Oxşar vəziyyət şəhərin bir çox daxili küçələrində yaşanır. Rayon icra hakimiyyətindən Şamaxı şəhərinin abadlaşdırılması istiqamətində tədbirlərin davam etdirildiyi, daxili küçələrin asfaltlanması probleminin də tezliklə həllini tapacağı bildirildi. Qurum rəsmisi onu da vurğuladı ki, bu ilin sonunadək Əli Kərimov küçəsinin də asfaltlanması planlaşdırılır.

Ümummilli lider Heydər Əliyevin anadan olmasının 99-cu ildönümü münasibətilə Qax şəhərində mini futbol üzrə rayon turnirinə start verilib. YAP Qax rayon təşkilatının və rayon Gənclər və İdman İdarəsinin birgə təşkilatçılığı ilə keçirilən turnirdə rayonda fəaliyyət göstərən müəssisə və təşkilatları, bələdiyyələri təmsil edən 15 komanda mübarizə aparır.Mərasimdə  çıxış edənlər ümummilli lider Heydər Əliyevin bütün sahələrlə yanaşı, idmanın inkişafına da böyük diqqət yetirdiyini bildirib, hazırda ölkəmizdə bu sahənin inkişafına göstərilən yüksək dövlət qayğısından danışıblar. Diqqətə çatdırılıb ki, turnirin keçirilməsində məqsəd Ulu Öndərin xatirəsini yad etmək, eyni zamanda, gənclərin fiziki sağlamlığını inkişaf etdirmək və idmana olan marağını artırmaqdır. Turnirə mayın 8-də yekun vurulacaq.