Zaqatalanın Muxax kənd sakinləri aptek olmamasından, dərman almaqda yaşadıqları çətinliklərdən şikayətlənirlər. Rayonun ən böyük kəndlərindən biri olan, Muxaxda 10 minə yaxın əhali yaşayır. Ətraf kəndləri də saysaq, bu bölgədə ümumi əhali sayı 20 mindən çoxdur. Vaxtilə aptek fəaliyyət göstərsə də bağlanıb. Həmin gündən isə kənd sakinləri adi ağrıkəsici, sanitar-gigiyenik vasitələri almaq üçün belə rayon mərkəzinə üz tutmalı olurlar.

Məsələ ilə bağlı Səhiyyə Nazirliyinin Analitik Ekspertiza Mərkəzinin Əczaçılıq müfəttişliyi şöbəsindən bildirilib ki, aptek açmaq üçün müəyyən qaydalar var. Aptek fəaliyyət göstərəcək məkan qeyri-yaşayış sahəsi olmalıdır və orada dərmanların saxlanılması üçün bütün lazımi şərait yaradılmalıdır.

Həmçinin vətəndaşlar şikayət və təkliflərlə bağlı mərkəzin 012 596 07 12 nömrəli qaynar xəttinə müraciət edə bilərlər.

Həftə içi 5 gün səhər saat 10:00-dan 12:00-a kimi Kanal S-də "Xəbərin var?" adlı verilişin aparıcıları İsa Şükürov və Elyar Sadiqovdur.

Balakənin Katex kəndində çay məcrasında aşkar edilən qəbirlərlə bağlı iddialar öz əksini tapmayıb. Belə ki, əraziyə mütəxəssislər baş çəkib. İlkin araşdırmalarla məlum olub ki, qəbirlər sakinlərin dediyi kimi 20-30-cu illərdə həmin ərazidəki təcridxanada saxlanılan repressiya qurbanlarına məxsus ola bilməz. Aşkar edilmiş qəbirlərin hazırda hansı dövrə aid olduğu dəqiq bilinməsə də antik və ya erkən orta əsrlərə aid olduğu təxmin edilir. Mütəxəssislər ərazidə arxeoloji qazıntıların aparılmasını vacib hesab edir. Qəbirlər çay məcrasının genişlənməsi və sahillərinin yuyulmasından sonra ortaya çıxıb. Əraziyə baxış keçirmiş Şəki REM-in əməkdaşları azı 20 qəbir aşkar ediblər. Sakinlər qəbirlər aşkar edildikdən sonra çay yatağını müəyyən qədər təmizləyib və torpaq qatı ilə hasara alıblar ki, ərazini su yuyub aparmasın. Ancaq mütəxəssislər bunu yetərli hesab etmir və qəbirlərin təcili şəkildə mühafizə edilməli olduğuna diqqət çəkir.