Şəki-Zaqatala Regional Təhsil İdarəsinin tabeçiliyində olan ümumtəhsil müəssisələrində mövcud vakant yerlərə test imtahanları keçirilib. İmtahanda iştirak etmək üçün 1000 nəfərə yaxın qeydiyyatdan keçib. Onlardan seçim üçün uyğunluğu yoxlanıldıqdan sonra 700 nəfər imtahan buraxılıb. İmtahan bir mərhələdə aparılıb. 80 dəqiqə ərzində namizədlər vəzifələrdən asılı olaraq 45 və ya 50 sualı cavablandırıb. Vəzifə üzrə ən yüksək bal toplayanların ardıcıllığa uyğun olaraq vakant yerlərdə yerləşdirilməsi aparılacaq. Xatırladaq ki, bu Şəki-Zaqatala regional təhsil idarəsi tərəfindən keçirilən 3-cü imtahandır.

Qazaxıstanın Almatı şəhərində "Heydər Əliyev və gənclər siyasəti” mövzusunda beynəlxalq konfrans keçirilib. Konfrans Azərbaycanın Qazaxıstan Səfirliyinin Almatı şəhərindəki nümayəndəliyi, Gənclər Fondunun dəstəyi və Gəncliyin Sosial İqtisadi İnkişafına Yardım İctimai Birliyinin təşkilatçılığı ilə baş tutub. Qazaxıstan Milli Kitabxanasında baş tutan tədbirdə Ümumilli liderin 100 illik yubileyinə həsr edilən fotosərgi təşkil edilib. Daha sonra Ulu Öndər Heydər Əliyevin Azərbaycan Qazaxıstan münasibətlərindən bəhs edən qısametrajlı film nümayiş olunub. Konfransda Qazaxıstanın böyük mütəfəkkiri, Azərbaycan xalqının dəyərli dostu Oljas Süleymenovun iştirakçılara videomüraciəti səslənib. Oljas Süleymenov Heydər Əliyevlə olan xatirələrindən danışıb. Tədbirdə çıxış edən Milli Məclisin deputatı Naqif Həmzəyev öz növbəsində deyib ki, Azərbaycanla Qazaxıstan münasibətləri bu gün ən yüksək səviyyədədir. O bu münasibətlərin qurulmasının Ulu Öndər Heydər Əliyevin adı ilə bağlı olduğunu, Prezident İlham Əliyevin bu münasibətləri uğurla davam etdirdiyini bildirib. Konfransda daha sonra diaspor fəalları, Qazaxıstandan olan professorlar, gənclər çıxış edib.

Şamaxı rayonunun Kərkənc tam orta məktəbində Şəhid Kapitan Nəcəf Şikarovun doğum günündə xatirəsi anılıb. Sözügedən məktəbdə Vətənimizin ərazi bütövlüyü uğrunda döyüşlərdə şəhid olmuş qəhrəmanlarımızın adlarının əbədiləşdirilməsi məqsədi ilə sinif otaqlarına şəhidlərin adı verilib. Tədbirdə Dağlıq Şirvan Regional Təhsil İdarəsinin rəsmiləri, şəhid ailələri, müəllim və şagirdlər iştirak ediblər. Əvvəlcə Şəhid Nəcəf Şikarovun ömür yolundan bəhs edən videoçarx izlənilib. Ardınca çıxış edənlər Azərbaycan Ordusunun Vətən müharibəsində qazandığı tarixi qələbədən, igid oğullarımızın, eləcədə Nəcəf Şikarovun göstərdiyi qəhrəmanlıq və şücaət nümunələrindən danışıblar. Vurğulanıb ki, Füzuli və Xocavəndin azadlığı uğrunda gedən döyüşlərdə qəhrəmanlıqla vuruşan Nəcəf Şikarov şəhadətindən sonra II Fəxri Xiyabanda torpağa tapşırılıb. Şəhidimizin Zinyət və Zəhra adlı iki övladı yadigar qalıb. Qəhrəmanımız düşmənin məhv edilməsi üzrə qarşıya qoyulmuş döyüş tapşırığını yerinə yetirərkən göstərdiyi qəhrəmanlıq örnəyinə, igidlik və mərdlik nümayiş etdirdiyinə görə “Qarabağ” ordeni ilə , həmçinin “Vətən uğrunda", "Füzulinin və Xocavəndin azad olunmasına görə" medalı ilə də təltif edilib. Tədbir məktəblilərin ifasında ədəbi-bədii kompozisiyalarla davam edib. Məktəb kollektivi Şəhid Kapitan Nəcəf Şikarovun qəbrini ziyarət ediblər.