Balakən Rayon Polis Şöbəsinin əməkdaşları tərəfindən narkotik vasitələrin qanunsuz dövriyyəsi ilə məşğul olan və üzərində odlu silah gəzdirən şəxslərə qarşı əməliyyat keçirilib. Rayonun Qullar kənd sakini, əvvəllər dəfələrlə məhkum olunmuş Asluddin Motuxovun üzərində odlu silah gəzdirməsi barədə şöbəyə əməliyyat məlumatı daxil olub. Keçirilmiş tədbir nəticəsində o, şübhəli şəxs qismində saxlanılıb. Şəxsi axtarış zamanı keçmiş məhkumdan “PM” markalı tapança, həmin silaha məxsus sandıqça və patron, eləcə də narkotik vasitə olan marixuana aşkarlanıb. Asluddin Motuxov ifadəsində tapançanı təxminən 2 ay əvvəl balıq ovuna gedərkən çayın kənarından tapdığını, lakin polisə təhvil verməyərək özündə saxladığını bildirib. Polis əməkdaşları tərəfindən keçirilən digər əməliyyatlar nəticəsində isə rayon ərazisində narkotik vasitələrin satışı ilə məşğul olan Samiddin Quliyev, Fərid Layıcov və Habil Butdayev tutulub.Üzərlərinə keçirilən baxış zamanı onlardan heroin və marixuana aşkar edilərək götürülüb. Faktlarla bağlı cinayət işi başlanılıb, əməliyyat-istintaq tədbirləri davam etdirilir.

Oğuzda buzlu yol qəzaya səbəb olub. Hadisə Oğuz-Bayan avtomobil yolunun rayon ərazisindən keçən hissəsində qeydə alınıb. "Mercedes" markalı avtomobil idarətmədən çıxaraq yol kənarındakı ağaca çırpılıb.Hadisə nəticəsində sürücü müxtəlif dərəcəli xəsarətlər alıb.Yaralı Oğuz Rayon Mərkəzi Xəstəxanasına yerləşdirilib. Faktla bağlı araşdırma aparılır.

Bakı-Şamaxı-Yevlax və Muğanlı-İsmayıllı magistrallarında artıq iki gündür nəqliyyatın hərəkəti çətinləşib, bəzi ərazilərdə avtomobillərin hərəkəti tamamilə dayanıb. Baş Dövlət Yol Polisi İdarəsinin əməkdaşları tərəfindən səhər saatlarında yük avtomobilləri və qış fəsli üçün nəzərdə tutulan şinləri olmayan nəqliyyat vasitələri alternativ yollara istiqamətləndirilib.

Ağsu dolaylarında da qar avtomobillərin hərəkətində çətinliklər yaradıb. Qarın qalınlığı 15 santimetrə qədər yüksəlib. 4 nömrəli Magistral Yolların İstismarı MMC-nin əməkdaşları qarı ərazidən təmizləmək üçün çalışsalar da gecə saatlarına doğru buzlaşmanın olacağı istisna edilmir.  

Muğanlı-İsmayıllı yolundan fərqli olaraq Şamaxı-Qobustan yolunda gecə saatlarından 19 saylı yol istismar sahəsinin əməkdaşları yollarda olublar. Qum duz qarışığı tökülüb və yolda qalan avtomobillərə köməklik göstərilib. Şamaxının daxili yollarında da avtomobillərin hərəkəti məhdudlaşıb, qəza şəraiti yaranıb.  

Günorta saatlarına doğru isə KTİB tərəfindən yollara qum, duz, kəpək tökülüb. Qaxda da yağan qar yollarda hərəkəti məhdudlaşdırıb. Ancaq bu rayona üz tutan turistləri sevindirib. Qarlı və şaxtalı havanın davam etməsi və xüsusən gecə saatlarında yolların buz bağlaması səbəbindən sürücülərə mümkün qədər yola çıxmamaları tövsiyyə olunur.

Balakəndə yanğın olub. Rayonun Gərəkli kənd sakini Rauf İsmayılova məxsus mal tövləsində baş verən yanğın zamanı ev sahibinə xeyli ziyan dəyib. Yanğın nəticəsində 50 kvadrat metr sahə və tövlənin içərisindəki 300 cücə, qurudulmuş xurma və otbağlamaları yanıb. Ev sahibinin dediyinə görə, ona ümumilikdə 2 000 manata qədər ziyan dəyib.Hadisə yerinə Balakən Rayon Dövlət Yanğından Mühafizə Hissəsinin texnikaları və şəxsi heyəti cəlb edilib. Ümumi sahəsi 90 kvadrat metr olan tövlənin qalan hissəsi və həyətdəki ev yanğından mühafizə olunub.Xəsarət alan olmayıb. Faktla bağlı araşdırma aparılır.

Qaxda avtomobil dirəyə çırpılıb, bir nəfər dünyasını dəyişib. Hadisə Qax-Qıpçaq avtomobil yolunun rayonun Kötüklü kəndi ərazisindən keçən hissəsində baş verib.Qax rayon sakinin idarə etdiyi "VAZ-2106" markalı minik avtomobili idarəetmədən çıxaraq yolun kənarındakı elektrik dirəyinə dəyib. Qəza zamanı avtomobildə olan iki nəfər - rayonun Qarabulaq kənd sakini 24 yaşlı Şəmsəddin Kərimov və 21 yaşlı Nihad Süleymanzadə aldıqları müxtəlif dərəcəli bədən xəsarətləri ilə Qax Rayon Mərkəzi Xəstəxanasına yerləşdiriliblər. Yaralılardan Şəmsəddin Kərimovun həyatını xilas etmək mümkün olmayıb. O, aldığı ağır xəsarətlərdən xəstəxanada dünyasını dəyişib. Nihad Süleymnazadənin xəsarətləri yüngül olduğundan ona lazımi tibbi yardım göstərildikdən sonra evə buraxılıb.