Naxçıvan-Bakı avtobusunda 6 kiloqramdan çox narkotik aşkar edilib. “Biləsuvar” gömrük postunda Naxçıvan-Bakı marşrutu üzrə hərəkət edən avtobusun sərnişininə məxsus çantaya baxış keçirilib. Bu zaman çantadakı şirniyyat və yuyucu vasitələr qutusunda xalis çəkiləri 2 kq 6 q qram olan psixotrop maddə-metamfetamin və 4 kq 328 qram narkotik vasitə-heroin aşkarlanıb. Həmin narkotik vasitələri təhvil alan iki nəfər şəxs saxlanılıb, idarə etdikləri nəqliyyat vasitəsinə baxış keçirilib. Bu zaman avtomobildən xalis çəkiləri 1,64 q olan qurudulmuş marixuana və 1,82 qram tiryək, eyni zamanda, bu narkotik vasitələrin istifadəsi üçün nəzərdə tutulduğu ehtimal edilən 2 ədəd metal boru aşkar olunub. Qubada narkokuryerliklə məşğul olan şəxs saxlanılıb. Abşeron rayon sakini Vasif Hacıyev narkotik vasitələrin istifadəsi, əldə etməsi, saxlaması və daşıması ilə məşğul olub. Həmin şəxsin üzərinə və avtomobilinə baxış keçirilən zaman 2 kiloqrama yaxın narkotik vasitə olan heroin aşkar olunaraq götürülüb. Məhkəmənin qərarı ilə həmin şəxsin barəsində həbs qətimkan tədbiri seçilib. İsmayıllıda da narkotik vasitələrin satışı və kultivasiyası ilə məşğul olan şəxs ifşa olunub. Şəhər sakini Elnur Mahmudovun evindən 3 kiloqrama yaxın qurudulmuş marixuana, eləcə də xüsusi qulluq göstərməklə yetişdirdiyi çətənə kolları aşkar edilərək götürülüb. Saxlanılan şəxs ifadəsində narkotik vasitələrin becərmə vaxtını ötən ilin yay aylarında narkotik tərkibli bitkilərdən əldə etdiyini deyib. Hər 3 faktla bağlı araşdırmalar davam etdirilir.

Zaqatala Rayon Polis Şöbəsinə rayonun Çobankol kəndi ərazisində naməlum şəxsin quldurluq etməsi barədə məlumat daxil olub. Polis əməkdaşlarının keçirdiyi əməliyyat-axtarış tədbirləri nəticəsində quldurluq əməlini törətməkdə şübhəli bilinən Natiq Əzizov saxlanılıb. Dindirilmə zamanı Əzizov törətdiyi əməli etiraf edərək gecə saatlarında həmkəndlisinin qarşısını kəsdiyini, 100 manat pulunu və 500 manat dəyərində mobil telefonunu ələ keçirdiyini bildirib.Faktla bağlı saxlanılan şəxs barəsində Zaqatala RPŞ-nin İstintaq Bölməsində cinayət işi başlanılıb , araşdırmalar davam etdirilir.

Zaqatala Rayon Mərkəzi Xəstəxanasında təşkil edilən növbəti qanvermə aksiyasında 162 nəfər könüllü qan verib. Rayon İcra Hakimiyyətinin, TƏBİB-in və Milli Hematologiya və Transfuziologiya Mərkəzinin təşkilatçılığı ilə “Qan ver, həyat qurtar!” devizi ilə keçirilən aksiyanın əsas məqsədi talassemiya və hemofiliyalı xəstəliklərdən əziyyət çəkən insanlara kömək göstərmək, onlara dəstək olmaqdır. Aksiyada rayonun ayrı-ayrı əmək kollektivlərinin nümayəndələri, həmçinin sakinlər fəal iştirak ediblər. Toplanan qan laboratoriya müayinəsindən keçirildikdən sonra Mərkəzi Qan Bankına təhvil veriləcək və irsi qan xəstəliklərindən əziyyət çəkən insanların müalicəsində istifadə olunacaq.

ADPU-nun Şamaxı filialında şəhid məzunların anım günü və “Qorxmaz leytenant” kitabının təqdimat mərasimi keçirilib. Tədbirdə rayon icra hakimiyyətinin, Səfərbərlik və hərbi xidmətə çağırış üzrə dövlət xidmətinin rəsmiləri, şəhid ailələri və filialın kollektivi iştirak edib. Əvvəlcə şəhid məzunların xatirəsinə həsr olunmuş sərgiyə baxış keçirilib. Ardınca “Qorxmaz leytenant” adlı videoçarx nümayiş olunub. Çıxış edənlər “Qorxmaz leytenant” ləqəbi qazanmış qəhrəman şəhid Orxan Nəbiyeva həsr olunan eyniadlı kitabdan bəhs ediblər.Vurğulanıb ki, filialın fəxri olan şəhid məzunlar da daima qürurla yad edilir. Tədbir tələbələrin ifasında səsləndirilən kompozisiya ilə davam etdirildi. Tədbirdən kitabda yer alan şeirlərdən ibarət kompozisiya ilə davam edib. 

Yanğın bu gün günorta saatlarında rayonun Yeni Şərif kəndində, kənd sakini 62 yaşlı Paşa Urkayevə məxsus yaşayış evində baş verib. Yanğın yerinə Balakən YMH-nin yanğınsöndürən texnikaları və şəxsi heyyəti cəlb olunub. Ümumi sahəsi 130 kv metr olan 1 mərtəbəli 4 otaqlı yaşayış evinin 100 kv metr hissəsi içərisindəki əşyalarla birlikdə yanıb.Evin qalan hissəsi və yaxınlıqdakı tikililər yanğından mühafizə olunub.Yanğının söndürülməsi zamanı Balakən YMH -nin bir nəfər yanğınsöndürəni yanıq xəsarətləri alaraq Balakən rayon Mərkəzi xəstəxanasına yerləşdirilib.