Hadisə səhər saatlarında, rayonun Baş Kəldək kəndində, kənd sakini Abduləziz Süleymanova məxsus ikimərtəbəli mənzildə baş verib. Əraziyə Fövqəladə Hallar Nazirliyinin Dövlət Yanğından Mühafizə Hissəsinin texnikası və şəxsi heyəti cəlb edilib. Yanğın nəticəsində ev əşyaları ilə birlikdə yanıb. Yaxınlıqdakı digər yaşayış evi yanğından mühafizə edilib. Hadisə nəticəsində xəsarət alan olmayıb. Yanğının hansı səbəbdən başverməsi hələ ki, məlum deyil.

Qax rayonunda ölümlə nəticələnən yol qəzası qeydə alınıb. Şəhərin mərkəzində hərəkətdə olan "BMW" markalı minik avtomobili idarəetmədən çıxaraq yol kənarındakı şam​ ağacına​ çırpılıb. Sürücü, 60 yaşlı Şövkət Yusifov hadisə yerində ölüb. İlkin ehtimala görə, o ürəktutmasından dünyasını dəyişib.  Faktla bağlı araşdırma aparılır.

29 yanvar-4 fevral tarixlərini əhatə edən təlimlər xizəksürmə və qar uçqunlarında axtarış-xilasetmə üzrə keçirilir. FHN-in müvafiq qurumlarının şəxsi heyət və texnikaları, xüsusi təlim görmüş itlər təlimə cəlb edilib. Məqsəd mürəkkəb relyefli və çətin iqlim şəraitində, eləcə də qar uçqunları zamanı yaranmış vəziyyətin qiymətləndirilməsi, axtarış-xilasetmə, zərərçəkmişlərin təxliyəsi və onlara ilkin yardımın göstərilməsi üzrə xilasedicilərin bilik və bacarıqlarının artırılması, habelə müasir texnika və avadanlıqlardan istifadə üzrə peşəkar vərdişlərinin gücləndirilməsi, bu istiqamətdə beynəlxalq təcrübənin öyrənilməsidir. Təlimin gedişində avstriyalı mütəxəssislər tərəfindən şəxsi heyətə qar uçqunları zamanı istifadə olunan müasir axtarış-xilasetmə texnika və avadanlıqları, onların taktiki-texniki xüsusiyyətləri və istifadə qaydaları, qar uçqunu altında qalan zərərçəkmişlərin xilas edilməsi və təxliyəsi, müvafiq təhlükəsizlik qaydaları üzrə nəzəri məşğələlər keçirilib. Təlimdən sonra FHN-in xilasedicilərinə Avstriya Daxili İşlər Nazirliyinin müvafiq sertifikatları təqdim olunur. Qeyd edək ki, bu tədbir iki nazirlik arasındakı əməkdaşlıq çərçivəsində həyata keçirilən sayca altıncı təlimdir.

Şəkidə “Heydər Əliyev və Azərbaycan gəncliyi”  mövzusunda gənclərin ümumrayon tədbiri keçirilib. Tədbirdə rayon icra hakimiyyətinin rəsmiləri, ictimaiyyət nümayəndələri və gənclər iştirak ediblər. Çıxış edənlər Ulu Öndər Heydər Əliyevin hakimiyyəti illərində gənclərə göstərilən diqqət və qayğıdan, qəbul edilən sərəncam və fərmanlardan, gənclərin Ümummilli Liderin təşəbbüsü ilə keçirilən forumundan danışıblar. Xatırladılıb ki, ötən il Şəki gəncləri üçün də uğurlu olub. Belə ki, il ərzində gəncləri əhatə edən 70-dən artıq tədbir keçirilib və yüzlələrlə gənc müxtəlif yarış və müsabiqələrdə fəxri yerlərə laiq görülüblər.  Tədbirdə həmçinin gəncliyi təhdid edən narkotik, erkən nigah kimi problemlərə də toxunulub. Çıxışlardan sonra Heydər Əliyevə həsr olunan “Xalqın adamı” sənədli filmi nümayiş olunub. Tədbirin sonunda fərqlənən gənclərə fəxri fərmanlar verilib. Təltif edilənlərin sırasında “Kanal S”-in Xəbərlər Xidmətinin əməkdaşı Məmməd Məmmədov da olub. Gənclər günü münasibəti ilə Şəki Dövlət Rəsm qalereyasında rəssam Rəhman Yunuslunun əl işlərinin nümayiş olunduğu sərgi də keçirilib. Tədbirdə bildirilib ki, mədəniyyət işçilərinə dövlət dəstəyi sayəsində hər il bu sahəyə maraq göstərən gənclərin sayı artır. Rəssam Rəhman Yunuslunun müxtəlif janrlarda və mövzularda çəkdiyi 30-dan artıq rəsm əsərinə baxış keçirilib. 

2 fevral – Gənclər günü respublikamızın bütün bölgərində olduğu kimi Lənkəranda da təntənə ilə qeyd olunub. Lənkəran Olimpiya İdman Kompleksində baş tutan tədbirdə çıxış edənlər vuğulayıb ki, Ümummilli Liderin təməlini qoyduğu gənclər siyasəti bu gün Prezident İlham Əliyev tərəfindən aparılan məqsədyönlü siyasət nəticəsində özünün inkişaf mərhələsini yaşayır. Ölkəmizdə vətənpərvər, dövlətinə sadiq, milli maraqları hər şeydən üstün tutan gənclik formalaşıb.Daha sonra rayonun ictimai-siyasi həyatında fəallığı ilə seçilən bir qrup gəncə İcra Hakimiyyətinin fəxri fərmanları təqdim olunub. Mərasim maraqlı əyləncəli-konsert proqramı ilə davam edib.

Salyan rayonunda 2 fevral Gənclər günü münasibətilə tədbir keçirililb. Əsası ulu öndər Heydər Əliyev tərəfindən qoyulan və ölkə başçısı İlham Əliyevin rəhbərliyi ilə uğurla davam etdirilən gənclər siyasətinin əhəmiyyətindən söz açan tədbir iştirakçıları Vətən müharibəsində qazanılan zəfərdə gənclərin böyük rolunun olduğunu xüsusi vurğulayıblar. Gənclər onlara verilən dəstəyə və etimada görə ölkə başçısına minnətdarlıqlarını ifadə ediblər. Tədbirin sonunda rayonun ictimai-siyasi həyatında fəal iştirak edən bir qrup gəncə qiymətli hədiyyələr və fəxri fərmanlar təqdim olunub. Daha sonra rayonun istedadlı gənc incəsənət nümayəndələrinin ifasında geniş konsert proqramı təqdim olunub.

Ulu Öndər Heydər Əliyevin hakimiyyətə dönüşü ilə başlayan Qurtuluş missiyası Azərbaycan gəncliyinin taleyində də inqilabi dönüş yaratdı. Gənclərimiz müdrik Liderinin sayəsində həm himayədar və qayğıkeşini tapdı, həm də ona düzgün yol göstərən, onu ümidsizlikdən xilas edən bir şəxsiyyət gördü. Bu gün Azərbaycan gəncliyini qürurlandıran əsas səbəb də onun Zəfər gəncliyi olmasıdır. Yevlaxda 2 Fevral-Gənclər günü münasibətilə təşkil olunan tədbirdə bu məqamlara diqqət çəkilib.  Vurğulanıb ki,tarixi vəzifəsini, milləti və dövləti qarşısında borcunu böyük ləyaqət və vicdanla yerinə yetirən gəncliyimiz möhtəşəm qələbənin müəllifi olub. Tədbirdə 2 Fevral-Gənclər Gününə həsr edilən videoçarx nümayiş etdirilib. Fəallığı ilə seçilən bir qrup gəncə Yevlax Şəhər İcra Hakimiyyətinin Fəxri Fərmanları təqdim olunub.

Zaqatalada keçirillən “Vətənpərvər Azərbaycan Gəncliyi" adlı tədbirdə çıxış edənlər   müasir iqtisadi-siyasi, mədəni həyatımızda gənclərin böyük çəkiyə malik olduğunu, ölkəmizdə sağlam, müstəqil düşüncəyə sahib olan, kreativ düşüncəli gənclərin yetişdiyini diqqətə çatdırıblar. Vurğulanıb ki, göstərilən qayğının nəticəsi olaraq, Zaqatala gəncləri də hər zaman əldə etdikləri uğurlarla öz sözlərini deyiblər. Elə Vətən müharibəsi zamanı da rayon gəncləri könüllü olaraq ön və arxa cəbhədə dəmir yumruq kimi birləşərək düşmənlə mübarizəyə qoşulub. Tədbir konsert proqramı ilə davam edib.

Kürdəmir gəncləri də Azərbaycan Gəncləri Günündə bir araya gəliblər. “Gənclər həftəsi” çərçivəsində “Gələcək gənclərindir” devizi ilə rayon gənclərinin toplantısı və konsert proqramı təşkil edilib. Kürdəmir rayon Gənclər və İdman İdarəsinin gördüyü işlərdən bəhs edən videoçarxın nümayişi olub. Dünyanın müxtəlif ölkələrində təhsil alan gənclərin səsləndirdiyi təbriklər gənclərimizə videoçarx şəklində çatdırılıb. Çıxışlarda bildirilib ki, Ulu Öndərin gəncliyə və gənclərə etimadı indi öz təsdiqini tapmaqdadır. Bu gün ölkəmizdə gənclər siyasəti mahiyyət və keyfiyyətcə yeni mərhələsini yaşayır. Tədbirdə bir qrup fəal gəncə fəxri fərman və qiymətli hədiyyələr təqdim edilib.

Balakəndə narkotik vasitələrin qanunsuz dövriyyəsinə qarşı əməliyyat keçirilib. 5 nəfər tutulub. Saxlanılan Qullar kənd sakini Vüqar Ağcayevdən 2 kiloqram 230 qram heroin götürülüb. Araşdırma zamanı məlum olub ki, o pul müqabilində iranlı narkotacirə kuryerlik edib. Polis əməkdaşları Vüqar Ağcayevi həmin narkotiki 2 min manat qarşılığında Balakəndən paytaxta aparanda yaxalayıb. Daha bir əməliyyatda saxlanılan Ruslan Məmmədovun evindən isə narkotiklə yanaşı snayper tüfəngi və həmin silaha məxsus patronlar aşkarlanıb. Saxlanılan digər üç nəfərsə  Mətin Məmmədov, Həmid Göylərov və Murad Bayoqluyevdir. Onların hər üçündən götürülən marixuana istintaqa təqdim olunub. Ümumilikdə isə yanvar ayı ərzində keçirilən əməliyyatlar nəticəsində Balakəndə narkotiklərin satışı, saxlanılması və kultivasiyası ilə məşğul olan 25 nəfər saxlanılıb, 16 kiloqrama yaxın müxtəlif növ narkotik dövriyyədən çıxarılıb.

Şəhid Eltun Kərimovun doğum günündə xatirəsi anılıb. Mərasimdə şəhidin ailəsi, digər şəhid ailələri, qazilər, təhsil işçiləri və şagirdlər iştirak ediblər. Əvvəlcə şəhidlin məzarı ziyarət edilib, ruhuna dualar oxunub, ardınca ehsan mərasimi keçirilib. Məktəblilər, vətənpərlik ruhunda şeirlər ifa ediblər.  Çıxış edənlər, vurğulayıb ki, 2019-cu ildə hərbi xidmətə yola düşən Eltun Kərimovun tərxis olmasına 1 ay qalmış Vətən müharibəsi başlayıb. O, ilk gündən döyüşlərə qatılıb. Talış kəndinin alınmasında və Suqovuşan uğrunda gedən döyüşlərdə  mərdliklə vuruşub. Elə bu döyüşlərdə də 19 yaşlı gənc əsgərimiz şəhidlik zirvəsinə yüksəlib. Tovuz döyüşlərində də iştirak edən Eltun döyüş yoldaşları arasında iriçaplı pulemyotun mahir atıcısı kimi tanınıb. Şəhidlik zirvəsinə ucalan Eltun Kərimova "Vətən uğrunda" və "Suqovuşanın azad olunmasına görə" medalları ilə təltif edilib. 

Hazırda Zaqatala və Balakən rayonlarının meşə zolaqlarına aldadıcı yemlərin səpilməsi işləri tam yekunlaşmaq üzrədir. Mövcud normaya əsasən, meşə zolağında hər kvadratmetrə 20-25 doza aldadıcı yem səpilib. Bundan başqa, Aqrar Xidmətlər Agentliyinin əməkdaşları qeyd olunan ərazilərdə yerləşən şəhər, qəsəbə və kəndlərin ətrafında müəyyən olunmuş yerlərə əllə 62 min doza aldadıcı yemin səpilməsini təmin edib. Bu cür tədbirlər xüsusi təhlükəli xəstəlik sayılan quduzluq xəstəliyinə qarşı epizooloji sabitliyin qorunub saxlanılmasını təmin edir. Vaksin olan qidanı qəbul etdikdən sonra vəhşi və sahibsiz heyvanlarda quduzluğa qarşı bir il müddətinə immunitet yaranacaq. Qeyd edək ki, helikopter vasitəsilə Şamaxı, İsmayıllı, Qəbələ, Oğuz, Şəki, Qax, Zaqatala, Balakən rayonlarının meşələrinə 600 kilometr məsafədə 18 min aldadıcı yemin səpilməsi nəzərdə tutulur.