Rayon sakini Ramil Babayev idarə etdiyi “Opel” markalı avtomobillə şəhərin küçə və prospektlərində davamlı olaraq qaydaları kobud şəkildə pozub. Avtoxuliqanlıq hərəkətləri edib. Yol Patrul Xidmətinin əməkdaşları onu saxlayaraq şöbəyə gətiriblər. Ramil Babayev barəsində protokol tərtib olunaraq hüquqi qiymət verilməsi üçün rayon məhkəməsinə göndərilib. Məhkəmənin qərarı ilə o, 15 sutka inzibati həbs olunub. Sürücülük hüququ isə 1 il müddətinə məhdudlaşdırılıb.

Hadisə bu gün səhər saatlarında Zaqatala Rayon Mərkəzi Xəstəxanasında baş verib. Rayonun Aşağı Tala kənd sakini, Rəfail Rəşidov bu gün səhər saat 6 radələrində xəstəxanaya daxil olub. Həkimlərin səyinə baxmayaraq 3 aylıq körpə xəstəxanaya daxil olduqdan bir qədər sonra həyatını itirib. Körpənin bir müddət əvvəl Bakı şəhərindəki xəstəxanalardan birində əməliyyat olunduğu bildirilir. Faktla bağlı araşdırma aparılır.

Şəkinin Qoxmuq kənd tam orta məktəbində Paralimpiya Oyunları çempionu İlham Zəkiyev ilə görüş keçirilib. Görüşdə məktəbin şagirdləri və müəllim kollektivi iştirak edib. Sinifləri gəzib, şagirdlərlə söhbət edən paralimpiyaçı daha sonra məktəbin akt zalında məktəblilərlə uğurlarının sirlərini bölüşüb.

O, vurğulayıb ki, uğura aparan yol zəhmətkeş , əzmkar olmaqdan keçir. Çıxışlardan sonra İlham Zəkiyev məktəblilərin maraqlandığı sualları cavablandırıb. Sonda şagirdlər şeirlər söyləyib və Xudayar təsnifini ifa ediblər. Qeyd edək ki, görüş Vətən müharibəsi şəhidi Kazım Məmmədsalahovun qızının İlham Zəkiyevə yazdığı məktub əsasında baş tutub. 

Mənbəyini Böyük Qafqaz dağlarından götürən, Qax rayonu ərazisindən axan ən böyük çay olan Kürmük çayı yaz aylarında gursululuğu ilə seçilir. Yazqabağı ətraf ərazilərdə yaşayan sakinlər həyəcan təbili çalır. Regionun ən dağıdıcı çaylarından sayılan Kürmük çayında vaxtında qabaqlayıcı tədbirlər görülməzsə, çayın sahilindəki yaşayış məntəqələri su altında qala bilər. Bəs, bu təhlükənin qarşısını almaq üçün aidiyyatı qurumlar nə iş görür?


Qax rayonunun İlisu və Sarıbaş kəndləri istiqamətində yüksək dağlardan mənbəyini götürən Kürmük çayı xüsusilə yaz-yay aylarında təhlükəli olur. Yağan leysan yağışları əriyən qar suları ilə birləşərək selin əmələ gəlməsinə səbəb olur. Çayın sahilində yerləşən yaşayış məntəqələri isə subasma təhlükəsi ilə üz-üzə qalır. Belə təhlükəylə ən çox üzləşən isə Əlibəyli və İbaxlı kəndləridir.

Sakinlər sel təhlükəsinin aradan qaldırılması üçün tədbirlərin görülmasini vacib sayır. Çünki, elə ötən il gələn selin qarşısı çox çətinliklə alınıb. Qax rayon Suvarma Sistemləri İdarəsindən isə bildirildi ki, sel təhlükəsini yaradan təkcə yağıntı deyil. O cümlədən gətirmə materiallarla çay yatağının dolması da sellərin məcradan çıxmasına səbəb olur. Ona görə də bəndqurma işləri ilə yanaşı, məcratəmizləmə və suvarma kanallarında lil təmizləmə işləri də aparılır. İdarə rəsmisi onu da bildirdi ki, bəndqurma və məcratəmizləmə işləri ilboyu rayonun digər çaylarında da aparılacaq. Beləliklə sel təhlükəsi aradan qalxacaq. 

  Şəkidə yol nəqliyyat hadisəsi baş verib. Hadisə Qaraməryəm-İsmayıllı-Şəki avtomobil yolunun Qırxbulaq kəndi ərazisində keçən hissəsində, yolun 145-ci km-də qeydə alınıb.

Şəki şəhər Orta Zəyzid kənd sakini 35 yaşlı Əhməd Ağayev idarə etdiyi VAZ 21015 markalı avtomobillə 24 yaşlı Qəbələ rayon Tikanlı kənd sakini Əsabəli Qocayevin idarə etdiyi VAZ 2104 markalı avtomobil toqquşub.

Qəza nəticəsində VAZ 2104-də olan sərnişin 26 yaşlı Əsgər Məmmədli xəsarət alıb. Müxtəlif dərəcəli bədən xəsarətləri alan sürücü Şəki RMX-yə çatdırılıb. Faktla bağlı araşdırma aparılır.