Şəki şəhər Kimya-Biologiya Təmayüllü liseydə narkomaniya ilə mübarizə və Dini Radikalizm mövzusunda tədbir keçirilib. Şəki ŞRPŞ rəsmilərinin iştirak etdiyi tədbirdə narkomaniya və digər zərərli vərdişlərin insan orqanizminə neqativ təsirləri, narkotik vasitələrin qanunsuz dövriyyəsinə qarşı polis orqanları tərəfindən aparılan qətiyyətli mübarizə və əldə olunan nəticələrdən bəhs olunub.

Vurğulanıb ki, narkotik vasitələrin əsas qurbanlarını təhsildən uzaqlaşan gənclər təşkil edir. Bu gün ölkədə 30 mindən çox qeydiyyatda olan narkotik vasitə istifadəçisi var ki, onlardan 350 nəfəri Şəkinin payına düşür. Hansı ki, bu rəqəmlər yalnız qeydiyyatda olan istifadəçiləri əhatə edir. Odur ki, gəncləri bu bəladan qorumaq, onlarda sağlam həyat tərzini formalaşdırmaq üçün hamı birgə mübarizə aparmalı, yeniyetmə və gənclər arasında maarifləndirmə işi daim diqqət mərkəzində saxlanılmalıdır.

Tədbirdə dini radikalizm və onun fəsadları, xurafat və cəhalət carçılarına qarşı mübarizə metodlarından danışılıb, erkən nikah və onun fəsadlarından bəhs olunub. Vurğulanıb ki, cəmiyyətimizin sağlam olması üçün gənclər yaxşı təhsil almalı və dövlətimizə daim bütün işlərdə dəstək olmalıdırlar. Sonda narkomaniyanın zərərlərindən bəhs edən videoçarx nümayiş olunub.

Zaqatalada “İrimiqyaslı fövqəladə hadisələrin nəticələrinin aradan qaldırılması zamanı mülki müdafiə orqan və qüvvələrinin idarə edilməsinin təşkili” mövzusunda kompleks mülki müdafiə təlimi keçirilib. Rayonda fəaliyyət göstərən 16 xidmət orqanlarının hərbiləşdirilməmiş mülki müdafiə qüvvələrinin və texnikalarının qatıldığı təlim zamanı şərti həyəcan siqnallarından istifadə edilib, törədilən şərti yanğınlar irimiqyaslı texnikalardan istifadə edilməklə söndürülüb. 2 gün davam edən təlimin məqsədi fövqəladə hallar zamanı əhalinin və ərazilərin mühafizəsinin təşkili üçün mülki müdafiə tədbirlərinin effektli səviyyədə yerinə yetirilməsinin təmin edilməsi, həmçinin xilasetmə işlərinin təşkili və aparılması üzrə şəxsi heyətin əməli vərdişlərinin daha da artırılmasından ibarət olub.

Sonuncu - XXVII turun oyunları çərçivəsində doğma meydanda "Araz Saatlı"nı 3:1 hesabla məğlub edən "Şamaxı" I Liqanın çempionu olub. Azərbaycanın müstəqillik dönəminin peşəkar futbol tarixində ilk dəfə yüksək liqadan aşağı liqaya düşən klub yenidən bir mövsüm ərzində geri qayıdış edib. Hətta bu dirçəliş son 30 illik idman tariximizdə barmaqla sayıla biləcək nailiyyətdir desək, yanılmarıq.

“Şamaxı” futbol klubunun 2024/2025-ci il mövsümündə Azərbaycan Premyer Liqasında çıxış edəcək olması rayon sakinlərinin və komanda azarkeşlərinin böyük sevincinə səbəb olub. Xüsusi vurğulamaq lazımdır ki, bu nəticə heç bir legioner cəlb etmədən, yalnız azərbaycanlı futbolçularla qazanılıb. Bu ilki mövsümdə I liqanın qalibi olan Şamaxı komandasının mükafatlandırılması tədbiri keçirilib.

Mərasimdə Mədəniyyət və incəsənət kollektivlərinin konserti olub. Ardınca azarkeşlərin alqış sədaları altında Şamaxı komandasının idmançılarına medallar və kubok təqdim olunub. Qeyd edək ki, 2022-ci ildə "Keşlə"nin adının dəyişdirilərək "Şamaxı" futbol klubu adlandırılıb və həmin tarixdən ev oyunları Şamaxı şəhər stadionunda keçirilir...

Səhiyyə Nazirliyinin Şəki Tibb Kolleci ilə birgə “İlk tibbi yardım – ikinci həyata addım” adlı tədbiri baş tutub. Tədbirdə ilkin tibbi yardımın göstərilməsi qaydaları əyani şəkildə nümayiş etdirilib. Kollecin tələbələri və könüllülərin iştirakı ilə “İlk tibbi yardım - ikinci həyata addim” adlı fləşmob təşkil olunub.

Həmçinin viktorina keçirilib. Tədbirin əsas məqsədi isə əhali arasında ilk yardım bacarıqlarının yiyələnməsi, eyni zamanda bu sahədə maarifləndirmə işlərin aparılmasıdır.