Oğuzda zəncirvarı yol qəzası olub. Hadisə Qaraməryəm-İsmayıllı – Şəki magistral yolunun Oğuz rayonunun Kərimli kəndi ərazisindən keçən hissəsində baş verib. Üç minik avtomobilinin iştirakı ilə baş verən zəncirvarı yol qəzasında bir nəfər - Şəki rayon sakini 45 yaşlı Elvin Əliyev xəsarət alıb. Yaralı Oğuz Rayon Mərkəzi Xəstəxanasına yerləşdirilib.

Zaqatalada “VAZ-2106” markalı iki minik avtomobili toqquşub, qəzadan sonra maşınlardan biri çaya düşüb. Hadisə səhər saatlarında rayonun Aşağı Tala kəndində qeydə alınıb. Qəza zamanı müxtəlif dərəcəli bədən xəsarətləri alan rayonun Yuxarı Tala kənd sakini 40 yaşlı Elçin Məmmədov və Aşağı Tala kənd sakini 39 yaşlı Yaşar Zamanov Zaqatala Rayon Mərkəzi Xəstəxanasına yerləşdiriliblər. Faktla bağlı araşdırma aparılır.

Zaqatala bazarı demək olar ki, şəhər mərkəzinə gedən yoldan başlayır. Yolun hər iki səkisində quraşdırılan piştaxtalarda müxtəlif ərzaq və qeyri ərzaq məhsulları satılmaqdadır. Satıcıların arqumentləri isə maraq doğurur. Avtomobil yolunda da bazar bağlananadək sıxlıq müşahidə edilir. Bunun əsas səbəblərindən biri də alıcı və satıcıların istifadə etdikləri nəqliyyatların, sərnişin daşıyan taksilərinin, yük maşınlarının harda gəldi, necə gəldi saxlamalarıdır. Çəkiliş müddətində yol polisinin dayanma-durma qaydalarını pozan sürücülərə xəbərdarlıq etməsinin şahidi olduq. Bununla belə, sözügedən ərazidə yenə də müəyyən sıxlıq müşahidə olunurdu. Yol kənarında ticarətlə məşğul olanların da, taksi və başqa yük daşıma ilə məşğul olanların da özlərinə görə arqumenti var. Kimin haqlı,kimin isə haqsız olmasından asılı olmayaraq, problem sakinləri narahat edir. Ümumiyyətlə, bu məsələ qanunla necə tənzimlənməlidir? Həmçinin qeyd edək ki, inzibati xətalar məcəlləsində sürücülər dayanma durma qaydalarının pozulmasına görə 20 manat, nəqliyyat vasitəsini dayanacaqlarda  saxlamağa görə 40 manat, qanunsuz küçə ticarəti ilə məşğul olanlar isə 80 manat cərimə olunurlar. 

Şəkidə \"ARB\" televiziyasının dəstəyi ilə çəkilən “Sara” serialının səhnə arxasında qızğın iş prosesi gedir. Çəkiliş heyyəti serialın ən mükəmməl şəkildə izləyiciyə təqdim olunması üçün əzmlə çalışır. Sonda hər kəs tərəfindən bəyəniləcək bir layihənin ortaya çıxması üçün həm baş rol ifaçıları, həm də digər aktyor heyəti rollarını peşəkarcasına oynayır. Eyni zamanda rejissor, operator və digər çəkiliş heyyəti də öz təcrübələri ilə Azərbaycan teleməkanında adından söz etdirəcək bir serialın ərsəyə gəlməsi üçün əlindən gələni edirlər. Serialın çəkilişləri bir həftədən çoxdur ki, davam edir. Artıq işin çətin hissəsi geridə qalıb. Eyni zamanda hər keçən gün layihədə rol alan aktoyorların sırasına yeni, peşəkar və tanınmış aktyorlar da qatılır. Zəngin aktyor heyətinin “Sara” serialının uğur qazanmasında böyük rolu olacağı danılmazdır.

Azərbaycan Dövlət Akademik Musiqili Teatrı Şəkidə musiqili-tarixi esse ilə çıxış edib. Şəki Dövlət Dram teatrında nümayiş olunan “Sən elə bir Zirvəsən” adlı səhnə əsəri Ulu Öndərin 100 illik və peşəkar milli teatrın 150 illik yubileyinə həsr olunub. Tədbirdə, rayon rəsmiləri, ziyalılar və şəhər ictimaiyyəti iştirak edib. Tamaşanın bədii rəhbəri teatrın direktoru, Əməkdar incəsənət xadimi Əliqismət Lalayev, ssenari müəllifi əməkdar artist Mübariz Həmidov, quruluşçu rejissoru Cavid İmamverdiyev, quruluşçu drijoru əməkdar incəsənət xadimi Fəxrəddin Atayev, xormeysteri əməkdar artist Vaqif Məstanov, baletmeystyer Emin Əliyev, rejissor asistenti Afər Tağıyeva olub. Səhnə əsərində teatrın solistləri, həmçinin xor və balet heyətinin üzvləri iştirak edib. Çıxışlar alqışlarla qarşılanıb.

Səfər çərçivəsində Şəki şəhər icra hakimiyyəti başçısı ilə görüş keçirilib. İlk öncə səfirə Şəki, onun tarixi, mədəniyyət nümunələri və mətbəxi barədə məlumat verilib. Qeyd edilib ki, Şəki həmçinin festivallar şəhəridir və il ərzində burada bir neçə beynəlxalq festival keçirilir. Daha sonra bir sıra mövzular ətrafında müzakirələr aparılıb. Koreya Respublikasına Şəkidə istehsal olan və ixrac edilə biləcək məhsullar haqda danışılıb. Lavanda yağının, Şəki şərablarının və başqa məhsulların Koreyaya ixracı müzakirə olunub. Səfir də öz növbəsində Koreya Respublikasının Azərbaycanla qarşılıqlı əməkdaşlığa böyük diqqət və önəm verdiyini qeyd edib. Eyni zamanda turizm sahəsi də müzakirə edilən mövzulardan biri olub. Səfir Li İn-Yonq Koreydan çox sayda turistin Azərbayacana səfərə gəldiyini və hər il bu rəqəmin artdığını bildirib. Görüşün sonunda tərəflər bir birilərinə müxtəlif hədiyyələr veriblər.

İsmayıllı-Ruşan yolunda Kürdmaşı kənd sakini, 36 yaşlı Samir Babayev idarə etyi \"VAZ-2103\" markalı maşınla hərəkətdə olarkən qəfl avtomobilin qabaq təkəri partlayıb. Nəticədə sürücü nəqliyyat vasitəsinə idarəetməni itirib. Yoldan çıxan maşın aşıb. Qəza zamanı sürücü aldığı xəsarətlərdən yerində ölüb. 41 yaşlı Variz Ağayev və 36 yaşlı Tərlan Həsənov isə ağır yaralanıb. Onlar Rayon Mərkəzi Xəstəxanasına yerləşdirilib.

Ümummilli lider Heydər Əliyevin 100 illik yubileyinə həsr olunan tədbirlər çərçivəsində idman yarışları da keçirilir. Şəkidə sərbəst və yunan roma güləşi, həmçinin qadın güləşi üzrə yeniyətmələr arasında xatirə turniri başa çatıb. 28 rayon və şəhərdən 550-ə yaxın idmançının 3 yaş qrupu, 10 çəki dərəcəsi üzrə qüvvəsini sınadığı turnirdə əsas məqsəd müasir Azərbaycanın qurucusu Heydər Əliyevin xatirəsini anmaq və istedadlı gəncləri üzə çıxarmaq olub. 2 gün davam edən yarışlarda gərgin mübarizədən sonra qaliblər müəyyənləşib. Qaliblər diplom və medallarla mükafatlandırılıb.

Ölkənin dilbər güşələrindən biri olan Şəkinin tarixi şəhər olması ilə yanaşı yaşıllıqları da turistləri cəzb edən gözəlliyidir. Ancaq studiyamıza müraciət edən şəhər sakinləri şikayətlənir ki, quruyan və təhlükə saçan ağaclara toxunulmur, əksinə yaşıl ağaclar bütün budaqları kəsilərək quruma riski ilə qarşı qarşıya buraxılır. Beləliklə də şəhər özünün yaşıl libasından məhrum olur. Bizdə vəziyyətin nə yerdə olduğunu öyrənməyə çalışdıq. Gəlin birgə izləyək... Şəki küçələrində qısa gəzinti zamanı kimlərinsə ya qəsdən ya da səriştəsizlikdən sanki bu gözəlliyə qənim kəsildiyinin şahidi olursan. Şəhərdə budama adı altında yaşıl ağaclar məhv edilir. Ekspert Dilbazi Cəmilov bildirib ki, ağacların budanması həm vaxtsız, həm də normalara uyğun olmadan aparılır. Məsələyə münasibət bildirən Dövlət Ekoloji Ekspertiza Agentliyindən də ağacların bu cür budanmasının tamamilə yolverilməz olduğu və aqrotexniki qaydaların kobud şəkildə pozulduğu deyildi. Şəki şəhərində yaşıllıqlara və parklara xidmət göstərən şəhər komunal təsərrüfat birliyindən isə bildirilən iradlarla razılaşmayıblar və bildirilib ki, onlar budamanı yalnız verilən rəy əsasında həyata keçirirlər. Beləliklə deyilənlərə inansaq hər kəs işini qaydalara uyğun görür. Ancaq reallıqda aqrotexniki qaydaların pozulması ilə aparılan və ağacların qurumasına səbəb olan budanma var. Və bu cür dırnaq arası qulluq işləri davam edərsə bir müddət sonra Şəki şəhərində gözəl çətirli yaşıl ağac tapmaq müşgülə çevriləcək. Ümid edək ki, parklarda və küçələrdə kölgəsində dinəcələ biləcəyimiz ağaclar yoxa çıxmadan aidiyyat qurumlar budanma işini peşəkarlıqla aparmağa başlayarlar.