Azərbaycanın XX əsr tarixinin əlli ildən artıq bir dövrü Ulu Öndər Heydər Əliyev şəxsiyyəti və onun böyük quruculuq fəaliyyəti ilə sıx bağlıdır. Heydər Əliyev xalqımızın yaddaşında yaradıcı, qurucu və xilaskar obrazını daim yaşadıb, qəlblərdə özünə əbədi məhəbbət qazanıb. Ulu Öndər müstəqil Azərbaycan dövlətini yaradıb və onun bütün sahələrdə sarsılmaz təməllərini müəyyən edib. Bu fikirlər Ümummilli Lider Heydər Əliyevin anadan olmasının 100 illiyi münasibətilə Qax Rayon İcra Hakimiyyətinin təşkilatçılığı ilə keçirilən “Tarix yazan əbədiyaşar Lider Heydər Əliyev” mövzusunda tədbirdə səsləndirilib. YAP Qax rayon təşkilatının inzibati binasında təşkil olunan tədbirdə müasir, müstəqil Azərbaycan dövlətinin memarı və qurucusu Heydər Əliyevin Azərbaycan tarixindəki əvəzolunmaz fəaliyyətindən, o cümlədən demokratik, hüquqi dövlət quruculuğunda, ölkəmizin qüdrətlənməsindəki misilsiz xidmətlərindən danışılıb. Vurğulanıb ki, müstəqilliyin ilk illərində xalqımız qarşıya çıxan çətin problemlərin həllini, xilaskarlıq missiyasını Heydər Əliyevdə görürdü. Ümummilli Lider öz xilaskarlıq missiyasının öhdəsindən layiqincə gəlib, ölkəmizi xaos və anarxiyadan qurtarıb. Sonda Ulu Öndər Heydər Əliyevin həyat və fəaliyyətinə həsr edilmiş film nümayiş olunub.

Ökəmizdə ikinci dəfə keçirilən Peşələr Festivalının növbəti dayanacağı İsmayıllı şəhəri olub. Dövlət Məşğulluq Agentliyi tərəfindən keçirilən festivalda Agentliyin rəsmiləri, İsmayıllı Rayon İcra Hakimiyyətinin, dövlət və özəl qurumların nümayəndələri, yerli ekspertlər, işəgötürənlər, tələbə və gənclər iştirak edib. Yeniyetmə və gənclərin müasir əmək bazarı barədə məlumatlılığının və peşələrə marağının artırılmasında, əmək bazarının tələblərinə uyğun peşə seçimində festivalın rolu yüksək qiymətləndirilib. Bildirilib ki, bu dəfə ölkənin 10 rayon və şəhərində “Peşəni peşəkardan soruş!” devizi ilə keçiriləcək festivalda iştirakçılar peşələr üzrə hansı bacarıqların tələb olunduğunu öyrənəcək, müxtəlif peşələr üzrə ekspertlərin təqdimatlarında iştirak edəcək və peşələrlə əyani şəkildə tanış ola biləcəklər.

Qəbələdə Ulu Öndər Heydər Əliyevin anadan olmasının 100 illik yubileyinə həsr olunmuş nə? harda? nə zaman? intellektual oyunu üzrə açıq kuboku keçirilib. Yarışda 11 rayonu təmsil edən 30-a yaxın məktəbli komandası mübarizə aparıb.

Gərgin keçən yarışmada Şəkini təmsil edən \\\"Çələbixan\\\" komandası qələbə qazanaraq final oyununa vəsiqəni təmin edib. İkinci yeri Qəbələnin \\\"Avengers\\\" komandası, üçüncü yeri isə Kimya Biologiya Təmayüllü Liseyin\\\"Kvebek\\\" komandası tutub. Qaliblər diplom və müxtəlif hədiyyələrlə mükafatlandırılıblar.

TƏBİB -nin tabeçiliyində fəaliyyət göstərən Şamaxı Rayon Mərkəzi Xəstəxanasının təşkilatçılığı ilə Milli Hematologiya və Transfuziologiya Mərkəzi tərəfindən irsi qan (talassemiya, hemofiliya) və digər qan xəstəliklərindən əziyyət çəkən vətəndaşlarımıza yardım məqsədilə qanvermə aksiyası keçirilib.

Şamaxı sakinləri bu nəcib və humanist xarakterli aksiyaya qoşularaq fəallıq nümayiş etdiriblər. Tibb briqadasının hematoloqları tərəfindən hər bir donor tibbi müayinədən keçdikdən sonra, onlardan qan analizi götürülüb və aksiyaya qoşulması ilə bağlı rəy verilib. Aksiyada İcra Hakimiyyətinin, şəhərdə fəaliyyət göstərən idarə, müəssisə, təşkilatların əməkdaşları və könüllülər iştirak ediblər. Ümumilikdə aksiyada 103 donor iştirak edib. Toplanan qan ehtiyacı olan xəstələrin müalicəsində istifadə olunacaq .