Elm və Təhsil Nazirliyinin təşkil etdiyi Məhəmməd Əmin Rəsulzadənin 140 illiyinə həsr olunmuş “Bir kərə yüksələn bayraq” adlı intellektual məktəb çempionatının şimal-qərb bölgəsi üzrə zona mərhələsi keçirilib.

Şəki şəhər 12 nömrəli tam orta məktəbdə keçirilən yarışda Qəbələ, Oğuz, Şəki, Qax, Zaqatala və Balakən rayonlarının məktəblərini təmsil edən komandalar iştirak ediblər. Yarış Zaqatala rayonunu təmsil edən “Dəmir yumruq” komandasının qələbəsi ilə başa çatıb. Qalib komanda kubok və medallarla mükafatlandırılıb.

Mayın 26-da keçirilən II və III ixtisas qrupları üzrə ali təhsil müəssisələrinə qəbul imtahanında istifadə olunmuş tapşırıqların doğru cavabları açıqlanıb. Bu barədə Dövlət İmtahan Mərkəzindən xəbər verilib. Qeyd edək ki, imtahan prosesini əməkdaşlarımız Şəkidə izləyib.

11 mərkəzdə aparılan imtahanlarda ümumilikdə, 2331 abituriyentin iştirakı nəzərə tutulub. İmtahan mərkəzlərində II və III ixtisas qrupları üzrə qəbul imtahanı mövcud təlimata uyğun şəkildə aparılıb və heç bir qanun pozuntusuna yol verilməyib.

Şəki polisi 49 yaşlı Namiq Məmmədovu saxlayıb. Ondan “Kalaşnikov” avtomatı, daraq və 30 ədəd patron aşkarlanıb. Saxlanılan şəxs silahı bir müddət əvvəl satmaq niyyəti ilə əldə etdiyini bildirib.

Faktla bağlı cinayət işi başlanılıb, Namiq Məmmədov barəsində həbs qətimkan tədbiri seçilib. Qeyd edək ki, son günlərdə polis əməkdaşlarının Şəki şəhərində keçirdikləri tədbirlərlə vətəndaşlardan biri “Makarov” markalı tapança olmaqla ümumilikdə 18 odlu silah götürülüb.

Şəki rayon Baş Zəyzid kənd tam orta məktəbində 28 may Müstəqillik gününə həsr olunan tədbir keçirilib. Çıxış edənlər Azərbaycan xalqının XX əsrin əvvəlində müsəlman Şərqində ilk demokratik respublika yaratmasının mühüm tarixi nailiyyət olduğunu qeyd ediblər.

Həmçnini Vətən müharibəsində qazanılan möhtəşəm qələbə, ərazi bütövlüyümüzün təmini xatırlanaq bu qələbə uğrunda canından keçən şəhidlərimizin əziz xatirəsi yad edilib. Tədbirin bədii hissəsində məktəblilərin hazırladığı vətənpərvər ruhlu, şeir, musiqi, rəqslərin nümayişi baş tutub. Balacaların ifa etdiyi səhnəciklər maraqla qarşılanıb.

Şəki şəhər Kimya-Biologiya Təmayüllü liseydə narkomaniya ilə mübarizə və Dini Radikalizm mövzusunda tədbir keçirilib. Şəki ŞRPŞ rəsmilərinin iştirak etdiyi tədbirdə narkomaniya və digər zərərli vərdişlərin insan orqanizminə neqativ təsirləri, narkotik vasitələrin qanunsuz dövriyyəsinə qarşı polis orqanları tərəfindən aparılan qətiyyətli mübarizə və əldə olunan nəticələrdən bəhs olunub.

Vurğulanıb ki, narkotik vasitələrin əsas qurbanlarını təhsildən uzaqlaşan gənclər təşkil edir. Bu gün ölkədə 30 mindən çox qeydiyyatda olan narkotik vasitə istifadəçisi var ki, onlardan 350 nəfəri Şəkinin payına düşür. Hansı ki, bu rəqəmlər yalnız qeydiyyatda olan istifadəçiləri əhatə edir. Odur ki, gəncləri bu bəladan qorumaq, onlarda sağlam həyat tərzini formalaşdırmaq üçün hamı birgə mübarizə aparmalı, yeniyetmə və gənclər arasında maarifləndirmə işi daim diqqət mərkəzində saxlanılmalıdır.

Tədbirdə dini radikalizm və onun fəsadları, xurafat və cəhalət carçılarına qarşı mübarizə metodlarından danışılıb, erkən nikah və onun fəsadlarından bəhs olunub. Vurğulanıb ki, cəmiyyətimizin sağlam olması üçün gənclər yaxşı təhsil almalı və dövlətimizə daim bütün işlərdə dəstək olmalıdırlar. Sonda narkomaniyanın zərərlərindən bəhs edən videoçarx nümayiş olunub.