Tərtər rayonunun Şəhidlər xiyabanında naməlum şəhid kimi dəfn edilmiş, Birinci Qarabağ müharibəsində itkin düşmüş hesab olunan Səbuhi Süleymanovun meyitinin qalıqları Şəkiyə gətirilərək rayonun Cəfərabad kəndində ailəsinə təhvil verilib.

 Vida mərasimindən şəhidin nəşi Cəfərabad kənd qəbiristanlığında dəfn olunub. Dəfn mərasimində şəhidin doğmaları, Şəki Rayon İcra Hakimiyyətinin vəzifəli şəxsləri, rayon hüquq-mühafizə orqanlarının əməkdaşları, hərbçilər və ictimaiyyət nümayəndələri iştirak ediblər. Qeyd edək ki, Səbuhi Süleymanov 1972-ci ildə Şəkinin Cəfərabad kəndində anadan olub. O, 1992-ci ilin noyabr-dekabr aylarında Ağdərə rayonu ərazisində itkin düşüb.

Vətən müharibəsində şəhid olan Səbuhi İskəndərli və Elşən İbrahimovun bir vaxtlar təhsil aldığı Şəki şəhər 11 saylı tam orta məktəbin girişində barelyefinin açılışı olub.

Tədbirdə şəhidlərin ailə üzvləri, dostları, rayon ictimaiyyəti iştirak edib. Vətən uğrunda şəhid olan igidlərimizin xatirəsi yad edilib. Çıxış edənlər qəhrəmanlarımızın şərəfli ömür yolundan söz açıb, onların yüksək mənəvi keyfiyyətlərə malik olan nümunəvi gənclər kimi xatırlandığını qeyd ediblər.

Vətən uğrunda canından keçən qəhrəmanlarımıza layiqli ehtiramın hər birimizin mənəvi borcu olduğu vurğulanıb. Çıxışlardan sonra xatirə barelyefinin açılışı olub. Abidə önünə gül dəstələri düzülüb.

Dövlət Dil Komissiyası yanında Monitorinq Mərkəzi Azərbaycan dilinin saflığının qorunması və dövlət dilindən istifadənin daha da təkmilləşdirilməsi ilə bağlı tədbirlərini davam etdirir. Bu məqsədlə Mərkəzin mütəxəssisləri "Kanal S" televiziyasında Azərbaycan dilinin saflığının qorunması mövzusunda seminar keçiriblər.

Seminarda Azərbaycan ədəbi dilinin qorunmasında və inkişafında KİV-in rolundan bəhs edilib, bir sıra təkliflər dinlənilib. Səfər çərçivəsində mərkəzin mütəxəssisləri Şəkinin orta ümumtəhsil müəssisələrində də olub, “Dilimizə sevgi ilə” adlı interaktiv təlimlər keçiriblər.

Mütəxəssislər Azərbaycan dilinin mövcud vəziyyəti, orta məktəblərdə ana dilinin tətbiqi, Azərbaycan dilində səlis danışıq və düzgün yazı vərdişlərinin inkişafından bəhs etməklə mövcud problemlərin həlli istiqamətində tövsiyə və təkliflərini bildiriblər. Görüşlərdə sözlərin düzgün tələffüz qaydaları misallarla müzakirə edilib, şagirdlərin dil bilikləri yoxlanılıb. Təlimlərdə aktiv iştirak edərək fərqlənən şagirdlər müxtəlif hədiyyələrlə mükafatlandırılıb.