Şəkidə yaşayış evində partlayış baş verib. Hadisə Şəkinin Baş Göynük kəndində qeydə alınıb. Belə ki, evin mətbəxinə sızan qaz partlayışa səbəb olub. Partlayış nəticəsində iki nəfər - 78 yaşlı Məhəmməd Seyidov və 72 yaşlı Güllü Seyidova əl və üz nayihələrindən yanıq xəsarətləri alıblar. Yaralılar Şəki Rayon Mərkəzi Xəstəxanasına çatdırılıblar. Xəstəxanadan verilən məlumata görə, hər iki şəxsə tibbi yardım göstərildikdən sonra ambulator müalicə şərtilə evə buraxılıblar. Faktla bağlı araşdırma aparılır.

1 İyun - Uşaqların Beynəlxalq Müdafiəsi Günü qeyd edilib

Balakən polisi qadınlardan hədə-qorxu ilə pul tələb edən 35 yaşlı Samir Əmrahovu saxlayıb. O, sosial şəbəkədə tanış olduğu qadınlara özünü vəkil “Adil Həsənov” kimi təqdim edib, daha sonra onların şəkillərini fotomontaj vasitəsilə əxlaqsız formaya salaraq internet resurslarında yayacağı ilə hədələyib. Bu üsulla zərərçəkmişlərin müxtəlif məbləğlərdə maddi vəsaitini ələ keçirib. Araşdırmalarla saxlanılan şəxsin Zərdab rayonunda da dələduzluq etdiyi məlum olub. S.Əmrahov barəsində həbs qətimkan tədbiri seçilib, araşdırmalar davam etdirilir.

Zaqatalada 6 otaqlı fərdi yaşayış evini ildırım vurub. Hadisə gecə saatlarında rayonun Yuxarı Tala kəndində baş verib. Kənd sakini Maarif Aslanova məxsus, ümumi sahəsi 182 kv/m olan fərdi yaşayış evini ildırım vurub. Daha sonra evdə yanğın başlayıb.

Yanğının söndürülməsi üçün əraziyə Zaqatala rayon Dövlət Yanğından Mühafizə Hissəsinin yanğınsöndürən maşınları və şəxsi heyəti cəlb edilib. Evin yanar konstruksiyaları yanıb, yaxınlıqdakı digər tikililər yanğından mühafizə olunub. Yanğın zamanı xəsarət alan olmayıb. Faktla bağlı araşdırma aparılır.

“Yaşıl dünya naminə həmrəylik ili” çərçivəsində Qobustanda “Qlobal iqlim dəyişikliyi şəraitində ərzaq təhlükəsizliyi: dəmyədə taxılçılığın inkişafı və müasir yanaşmalarla quraqlığa davamlılıq və məhsuldarlığın artırılması” mövzusunda tarla seminarı keçirilib.

Tədbir KTN, Əkinçilik Elmi-Tədqiqat İnstitutu və Elm və Təhsil Nazirliyinin Molekulyar Biologiya və Biotexnologiyalar İnstitutunun birgə təşkilatçılığı ilə baş tutub. Çıxış edənlər dünyanı narahat edən ekoloji problemlərdən, iqlim dəyişiklikləri və onların canlı aləmə mənfi təsirlərindən söhbət açıb, bu sahəyə diqqətin artırılması, beynəlxalq həmrəyliyin gücləndirilməsi məqsədilə 2024-cü ilin “Yaşıl dünya naminə həmrəylik ili” elan edilməsinin əhəmiyyətini vurğulayıblar.

Qeyd edilib ki, bu, Azərbaycanın qlobal təşəbbüslərə ilk qoşulan ölkələrin sırasında olduğunu bir daha sübut edir. Sonda əkin sahələrinin və tədqiqat prosesinin nümayişi həyata keçirilib,

Şəkidə "Narkomaniya ilə mübarizə" və "Dini Radikalizm" mövzusunda tədbir keçirilib. Şəki ŞRPŞ-nin rəsmiləri və şəhər 11 nömrəli məktəbin şagirdlərinin iştirak etdiyi tədbirdə narkomaniya ilə mübarizənin sağlam cəmiyyətin formalaşması üçün zəruri şərtlərdən olduğuna diqqət çəkilib. Vurğulanıb ki, cəmiyyətdə “ağ ölüm” kimi tanınan narkomaniya bəlası insan həyatında sağalmaz fəsadlar yaradır.

Bu səbəbdən də Azərbaycanda narkomaniyaya qarşı sistemli mübarizə aparılır. Tədbirdə dini radikalizm və onun fəsadlarından da danışılıb. Qeyri-ənənəvi dini cərəyanlar və dini radikalizmin xüsusilə də gənclər üçün təhlükəli olduğu bildirilib. Qeyd olunub ki,dini radikalizmə qarşı mübarizədə maarifləndirmənin gücləndirliməsi, dinimizin düzgün şəkildə insanlara aşılanması radikalizmin qarşısını alan ən güclü vasitədir. Sonda şagirdlərin sualları cavablandırılıb.

Mədəniyyət Nazirliyinin təqdim etdiyi “Yaradıcı müzakirələr” layihəsi Şamaxı şəhərində davam edib. Şamaxı Mədəniyyət Mərkəzində keçirilən layihə çərçivəsində 10-dan çox yaradıcı klaster üzrə seminar, ustad dərsləri, tanınmış şəxslərlə görüş və təlimlər təşkil olunub.

Sessiyalar kino, rəsm, dizayn, kulinariya, animasiya, yaradıcı startaplar, fotoqrafiya, bədii şüşə sənəti, dəb və digər mövzular üzrə olub. May ayı ərzində Şamaxı ilə yanaşı, Quba, Gəncə, Mingəçevir və Şəki şəhər və rayonlarında təşkil olunan maarifləndirici sessiyalara ümumilikdə 3000 nəfərdən artıq iştirakçı qoşulub.

Etibarnamə ilə satın alınan avtomobil sonradan üçüncü şəxsə satıla bilir. Ancaq bu sənəd avtomobilin şəxsiləşdirilməsi anlamına gəlmir. Bu səbəbdən etibarnamə ilə avtomobil alan bəzi insanlar sonradan müəyyən problemlərlə üzləşirlər. Şamaxı sakini Kənan Məmmədov kimi... O, bir müddət əvvəl etibarnamə ilə aldığı minik avtomobilini idarə edə bilmir, nəqliyyat vasitəsinə həbs qoyulub. Səbəbini araşdırdıqda öyrənib ki, avtomobili etibarnamə ilə satan əsl sahibi banklardan kredit ala bilmədiyi üçün telefon dükanından kreditə telefon alıb və onu sataraq pulu nağdlaşdırıb. Krediti ödəmədiyi üçün etibarnamə ilə satdığı avtomobilə həbs qoyulub. Nəticədə ziyan nəqliyyat vasitəsinin indiki sahibinə dəyib. Artıq 3 aydır ki, Kənan Məmmədov nağd şəkildə aldığı avtomobilindən istifadə edə bilmir. Zərərçəkən nəqliyyat vasitəsinin əsl sahibini taparaq məsələni kökündən həll etməsini istəyib. Amma qarşı tərəfin bu işdə maraqlı olmadığını görüb. Ekspertlərsə əmlakın şəxslər arasında bir-birinə ötürülməsinin yalnız alqı-satqı müqaviləsi əsasında həyata keçirilməli olduğuna diqqət çəkir. Əks təqdirdə yaranan bu cür problemdən yeganə çıxış yolunu isə məhkəməyə müraciət etməkdə görürlər. Ancaq məhkəmədə həmin avtomobilin etibarnamə ilə başqa şəxsə satılmasını sübut edə bilmədikdə isə avtomobili etibarnamə ilə almış faktiki sahib məhkəmədə hüquqi cəhətdən haqsız duruma düşür. Nəticədə həbs qoyulmuş avtomobil hərrac vasitəsi ilə satılaraq, banka olan borc ödənilir. Bir sözlə, adından da göründüyü kimi etibarnamə verən şəxs sizə öz əmlakını satmır, sadəcə etibar edir. Odur ki, xoşagəlməz sürprizlərlə üzləşmək istəmirsinizsə alqı-satqı prosesində diqqətli olmaq vacibdir.