Bu möhtəşəm mənzərə Qobustan rayonundandır. Qayaların arasındakı Sündü və Təndirənohur şəlalələri bənzərsiz gözəlliyi ilə görənləri valeh edir.

Bu əsrarəngiz gözəlliyi görmək üçün Qobustanın Sündü kəndindən 3 km-lik məsafəni qət etmək lazımdır. Yolu bir qədər avtomobillərlə getmək mümkün olsa da ardınca avtomobili dağ üzərində saxlayıb, bir qədər enişli-yoxuşlu yolu piyada qalxmaq lazımdır.

Ərazi dağlıq relyefdə olduğundan qayalıqların arasından enişli-yoxuşlu yolu qət etdikdən Təndirənohur şəlaləsinə çatırıq.Dağların arasıyla axan kiçik çay burada möhtəşəm bir görüntü yaradıb. Şəlalənin töküldüyü yerdə, ərazisi kiçik olan dərin göl,ətrafda olan ağaclar, giləmeyvə kolları, sıldırım qayalar sanki bu gözəlliyə əlavə rəng qatır.Bura yerli sakinlərin sevimli istirahət məkanıdır. Şəlaləyə aparan cığırla irəlilədikcə mağara, qrot və qalereyalarla rastlaşırsan.Bu cür mənzərəli vadilər bu yerlərdə çoxdur, yaşayış məntəqəsinin yaşı isə bir neçə min ili ötür.

Şamaxı və Qobustandan olan sakinlər çətinliklə də olsa, gəlib mənzərənin dadını çıxardırlar. Amma gözdən uzaq olması, həmçinin yolsuzluq səbəbindən turistlər bir çox hallarda yarı yoldan geri qayıdırlar. Relyefin çətin olması qadın və uşaqları da bu möhtəşəm mənzərədən məhrum edir. Sakinlər yolun çəkilməsi ilə gələnlərin sayının artacağı, turizmin inkişafına təkan verəcəyi qənaətindədir.

Daha bir xoşagəlməz məqam da ərazidə təmizliyə riayət olunmamasıdır. İstirahətə gələnlər özləri ilə gətirdikləri qida qalıqlarını əraziyə atıb gedirlər ki, bu da mənzərənin gözəlliyinə kölgə salır.

Onu da qeyd edək ki, 5 min illik qədim tarixə malik Sündü başdan-başa əkin sahələrindən ibarət münbit yaylalar qoynunda yerləşən və qədim tarixi olan kənddir. Ətrafdakı sıldırım yamaclı təpələr, nadir şəlalə və bulaqlar, yaşıl örtüklü dərin yarğanlar bu kəndin ecazkar təbiətinin yalnız bəzi cizgiləridir. Sündü kəndində şəlalədən başqa 32 bulaq, 2 kəhriz, 2 su dəyirmanı, 100 yaşlı məktəb, 920-ci ilə aid məscid də var.

Şəkidə narkotik vasitələrin qanunsuz dövriyyəsi ilə məşğul olan 49 yaşlı Astara sakini İlyas Dadaşov saxlanılıb. Ondan 2 kiloqram 100 qram heroin və 3 kiloqram marixuana götürülüb. Araşdırmalarla onun maddi qazanc müqabilində şəxsiyyəti istintaqla araşdırılan şəxs tərəfindən narkokuryerliyə cəlb olunduğu müəyyən edilib.

O, qaçaqmalçılıq yolu ilə ölkəyə göndərilən həmin 5 kiloqram narkotik vasitəni sifariş əsasında Rusiya ilə sərhədyanı əraziyə çatdırmalı və bunun qarşılığında 1500 manat gəlir əldə etməli imiş. Məhkəmənin qərarı ilə Dadaşov barəsində həbs qətimkan tədbiri seçilib.

“Məktəblilər üçün teatr pedaqogikası” layihəsinə start verilib. Elm və Təhsil Nazirliyi, eləcə də Mədəniyyət Nazirliyinin birgə təşkilatçılığı ilə həyata keçirilən layihə çərçivəsində Şəki Dövlət Dram Teatrında Xəqani Əliyevin “Çələbi xan” tamaşası nümayiş olunub. Tamaşada Şəki xanı Hacı Çələbi xanın həyatından, Azərbaycan xanlıqlarını birləşdirmək uğrunda mübarizəsindən bəhs edilir.

Layihədə Şəki rayon ümumi təhsil müəssisələrində təhsil alan 14-17 yaşlı 1200 şagirdin iştirakı nəzərdə tutulub. Layihənin məqsədi uşaq və gənclərdə estetik zövqü formalaşdırmaq, onların incəsənətə marağını artırmaq, həmçinin asudə vaxtlarını səmərəli təşkil etməkdir.