Bir neçə gün davam edən aramsız yağışlar dağ çaylarında suyun səviyyəsini xeyli artırıb. Zaqatala rayonundan keçən ən böyük və sel təhlükəli çaylardan olan Tala çayında da suyun səviyyəsinin artması bəzi ərazilərdə sahilbərkitmə bəndlərində çat və yuyulmaya yol açıb. Rayonun Nizami küçəsində isə bəndin 80 metrə yaxın hissəsində xüsusi təhlükəli vəziyyət mövcuddur. Ətraflı sujetdə izləyək.

Ölkənin hər yerində olduğu kimi ən böyük taxılçılıq rayonlarından biri olan Şəkidə taxıl biçini davam edir. Havaların yağıntılı keçməsi digər kənd təsərrüfatı sahələrində məhsuldarlığa mənfi təsir etsə də taxılçılığa müsbət təsir göstərib. İlkin nəticələr məhsuldarlığın, ötən illərə nisbətən yüksək olacağını göstərir.

Şəkidə "VII Beynəlxalq Bəxtiyar Vahabzadə Türk dünyası dil, tarix, mədəniyyət və ədəbiyyat" konfransına start verilib. Bəxtiyar Vahabzadənin ev muzeyinin və ADPU-nun Şəki filialının birgə təşkilatçılığı ilə keçirilən konfransda Mahmud Kaşğari adına Beynəlxalq Fond, Türkiyənin İqtisadi İnkişaf və Sosial Tədqiqatlar institutu, AMEA, Azərbaycanda fəaliyyət göstərən ali təhsil müəsisələrinin nümayəndələri iştirak ediblər. Konfransın bu ilki mövzusu "Bəxtiyar Vahabzadə: Vətənpərvərlik və millilik" olub. Açılış mərasimində çıxış edənlər, Bəxtiyar Vahabzadənin sözünün qüdrətindən, şairin yaradıcılığının rəngarəngliyindən, həyatın hər sahəsini əhatə etməsindən danışıblar. Türk dünyasının şairinin bütün əsərlərində millilik, vətənpərvərlik motivlərinin ana xətt təşkil etdiyi vurğulanıb. Tədbir Bəxtiyar Vahabzadənin sözlərinə yazılmış mahnıların ifa edildiyi bədii hissə ilə davam edib.