Azərbaycanın qədim sənət və mədəniyyət mərkəzlərindən olan Şəkidə növbəti musiqi bayramı – Şəki “İpək Yolu” XIV Beynəlxalq Musiqi Festivalına start verilib. Mədəniyyət Nazirliyi, Azərbaycan Bəstəkarlar İttifaqı və Şəki Şəhər İcra Hakimiyyətinin birgə təşkilatçılığı ilə reallaşan musiqi festivalının ilk konserti “Yuxarı Karvansaray” mehmanxana kompleksində baş tutub. Konsertdə Azərbaycanda yaşayan azsaylı xalqlardan ibarət xor, mahnı və rəqs kollektivləri çıxış edib.

Şəkidə Bəxtiyar Vahabzadənin 100 illik yubileyinə həsr olunmuş tədbirlər davam etdirilir. Bu çərçivədə Şəki Dövlət Dram Teatrında dahi dramaturqun möhtəşəm “Dar ağacı” tamaşasının premyerası olub.

Ölkənin müxtəlif bölgələrində olduğu kimi, iri əkinçilik rayonlarından biri olan Şəkidə də taxıl biçini sürətlə davam edir. Əkin sahələrinin əhəmiyyətli hissəsində proses artıq yekunlaşıb.

Şəki Dövlət Dram Teatrında yerli rəssam və dekorativ- tətbiqi sənət ustalarının əsərlərindən ibarət “Gələrsən, görərsən” adlı sərgi təşkil edilib. Azərbaycan Rəssamlar İttifaqının Şəki təşkilatının təşəbbüsü ilə yaradılan sərgidə 50-dək şəkili rəssam və sənətkarın 110 əsəri nümayiş olunur. Çıxış edənlər belə sərgilərin təşkilinin qədim diyarın mədəni irsinin təbliğinə, şəkili rəssamların, sənətkarların, dekorativ-tətbiqi sənət ustalarının yaradıcılığının inkişaf etdirilməsinə müsbət təsir göstərdiyini vurğulayıblar. Daha sonra ziyarətçilər sərgilənən əsərlərlə tanış olublar. Tamaşaçıların böyük maraq göstərdiyi sərgi iyulun 7-dək davam edəcək.

Şəkidə Azərbaycan polisinin yaranmasının 107-ci ildönümü münasibətilə tədbir keçirilib. Tədbir iştirakçıları əvvəlcə Şəki şəhər Heydər Əliyev Mərkəzinin qarşısında ucaldılan Ulu öndər Heydər Əliyevin abidəsi önünə gül dəstələri düzüb, xatirəsinə ehtiramlarını bildiriblər. Ardınca Polis Şöbəsində davam edən tədbirdə çıxış edənlər ötən 107 ildə polisin keçdiyi şərəfli və zəngin xidmət yolundan, daxili işlər orqanlarının fəaliyyətinin təşkili, milli ruhlu vətənpərvər kadrlarla möhkəmlənməsi sahəsində görülən mühüm işlərdən danışıblar. Müstəqil dövlətçiliyimizin qorunmasında, ölkədə sabitliyin təmin edilməsində, cinayətkarlığa qarşı mübarizədə Azərbaycan polisinin müstəsna xidmətləri xüsusi vurğulanıb. Daha sonra xidmətdə fərqlənən bir qrup əməkdaş fəxri fərman və qiymətli hədiyyələrlə təltif olunublar.