Kiçik və Orta Biznesin İnkişafı Agentliyinin (KOBİA) təşkilatçılığı ilə Şəki şəhərində regionlarda fəaliyyət göstərən mikro və kiçik sahibkarların istehsal etdiyi məhsul və xidmətlərin tanıdılması, satışına dəstək olmaq, istehsalçılar və təchizatçılar arasında əlaqələrin genişləndirilməsi məqsədilə “KOB FEST” sərgi-satış yarmarkası təşkil olunub.

“KOB FEST”də Şəki şəhəri və ətraf rayonlardan olan KOB subyektləri tərəfindən bölgəyə xas olan sənətkarlıq nümunələri, o cümlədən ipək kələğayı, xalçalar, rəssamlıq nümunələri, dəri üzərində tikmə, taxta üzərində oyma, müxtəlif əl işləri, Şəki şirniyyatları, arıçılıq məhsulları, qurudulmuş meyvələr, konservləşdirilmiş məhsullar, yüngül sənaye məhsulları nümayiş olunur və satılır.

Festivalda ölkənin müxtəlif regionlarından olan 80-ə yaxın mikro və kiçik sahibkarlıq subyektinin 1500-dən çox adda qida və qeyri-qida məhsulları, eləcə də sənətkarların və yaradıcı şəxslərin əl işləri sərgilənir.

Xatırladaq ki, Sərgi-satış yarmarkası iyulun 20-dək hər gün saat 10.00-dan 18.00-dək fəaliyyət göstərəcək. Növbəti “KOB FEST” sərgi-satış yarmarkasının isə Gəncə şəhərində keçirilməsi planlaşdırılır.

Xarici ölkədən Vətənə dönən sakinlərin şərəfinə təşkil edilən ziyafət yaxşı sonluqla bitməyib. Qidadan zəhərlənən qonaqlar xəstəxanalıq olublar. Təfərrüatlar sujetdə...

Şamaxıda kütləvi zəhərlənmə olub. Hadisə Məlikçobanlı kəndindəki fərdi yaşayış evində təşkil olunan qonaqlıq zamanı baş verib. Məclis iştirakçıları üçün hazırlanan yeməklər süfrəyə veriləndən bir qədər sonra ardıcıl 21 nəfərin halı pisləşib. Onlar dərhal Şamaxı rayon Mərkəzi Xəstəxanasına çatdırılıblar.

Hadisə ilə bağlı Qida Təhlükəsizliyi Agentliyi açıqlama verib. Qurumdan bildirilib ki, zəhərlənmənin dəqiq səbəblərinin müəyyənləşdirilməsi üçün mərasimdə istehlak edilən müxtəlif qida məhsullarından nümunələr götürülərək laborator müayinələrə cəlb edilib.

Qurum rəsmisi evdə keçirilən məclislərdə vətəndaşları bir daqha diqqətli olmağa çağırır. Faktla bağlı araşdırmalar davam etdirilir.

Sentyabrın 1-də keçiriləcək növbədənkənar parlament seçkilərinin yüksək səviyyədə, azad, ədalətli və şəffaf təşkili məqsədilə Mərkəzi Seçki Komissiyası tərəfindən Şəkidə regional seminar keçirilib. Seminarda MSK Katibliyinin rəsmiləri, respublikanın şimal-qərb bölgəsində, ətraf şəhər və rayonlarda fəaliyyət göstərən 17 seçki dairəsi -dairə seçki komissiyalarının hər birindən 3 ekspert olmaqla, ümumilikdə aşağı seçki komissiyalarının 51 təmsilçisi iştirak edib. Tədbirdə “Seçki hüququnun pozulması ilə əlaqədar müraciət və şikayətlərə baxılması üzrə qanunvericiliyin tələbləri və şikayətlərin araşdırılması prinsipləri”, “Seçkilərlə bağlı müraciətlərə dairə seçki komissiyaları tərəfindən baxılması, Ekspert qruplarının fəaliyyətinin əsasları” və digər mövzularda çıxışlar edilib. Tədbirin praktiki hissəsində kazuslar üzrə müxtəlif şikayət nümunələri nəzərdən keçirilib, seçki komissiyaları tərəfindən həmin şikayətlərə dair müvafiq qərarların qəbul edilməsi məsələlərinə baxılıb. Sonda seminar iştirakçılarını maraqlandıran suallar ətrafında müzakirələr aparılıb.